Read dhopadhola Ezekiel 11 Bible Online

Ezekiel 11 - dhopadhola bible

Ezekiel 11

¹Cuny otiŋan to kelan yuwok ceŋ ma waŋkac ma Ot pa Rwoth, ma ŋiyo yuwok ceŋ. Kenyo yuwaŋ waŋkac, oyido nitie cwo piero ario g'abic. I dier jo aneno Jazania wod pa Azur, kodi Pelatia wod pa Benaya, jotel pa ji.

²Were owaco ran ni, “Wod dhano, me ji ma jocano kidakana aka jomiyo rieko marac i tindi madwoŋ me.

³Jowaco ni, hongo fodi k'otundo ma geto udi; tindi madwoŋ me obedo dak, aka wan wabedo riŋo.”

⁴Riameno tuci wac kwoŋ jo, tuci wac, awi wod dhano.

⁵Kenyo cuny pa Rwoth opie kwoŋan to waco ran ni, “Waci ni, Rwoth waco. Me a gima wiparo, Awi ot pa Isiraili. Aŋeyo gima bino i paro mewin.

⁶Witieko neko ji kweth i tindi madwoŋ me, aka witieko poŋo royin mere gi delkwoŋ jom'otho.”

⁷“Riameno, Rwoth Were waco ama: Delkwoŋ jom'otho ma wineko i iye obedo riŋo, aka tindi madwoŋ me obedo dak. To win, alawodho woko win i iye.

⁸Wilworo abor, to alakelo kwoŋ win, Rwoth Were waco.

⁹Alawodho woko win i iye, aka alajwango win i cingi jopath, t'athumo riwin banja.

¹⁰Wilapodho g'abor, alathumo riwin banja i kew pa Isiraili, aka wilaŋeyo ni An Abedo Rwoth.

¹¹Tindi madwoŋ me kilabedo dak mewin, aka wikilabedo riŋo i iye; alathumo riwin banja i kew pa Isiraili.

¹²Kenyo wilaŋeyo ni An Abedo Rwoth, ma wikiluwo cik pere, aka wikikuro or pere, to wiluwo cik pa nonin ma jothoko win.”

¹³Onyo wac m'atuco otundo i kare, Pelatia wod pa Benaya otho. Kenyo agore piny gi nyiman, t'aywak gi dwondan malo ka waco ni, “Awi Rwoth Were, inomiy Joisiraili ma jodoŋ jorere kicutho?”

¹⁴Wac pa Rwoth obino ran ka waco ni,

¹⁵“Wod dhano, wutmin in, wutmin in won, ot pa Isiraili gibe, joje, jobedo jono ma ji ma jobedo i Yerusalem jowaco ni, jokoc swa bor gi Rwoth, riwan omiy wan lowo me walunji.

¹⁶Riameno, Rwoth Were waco ama: Makada nende atero jo bor swa i dier nonin, makada nende akedho jo i dier piny kweth, kucel abedo rijo Kabedo Maleŋ i piny ma jokadh'iye.”

¹⁷“Riameno wac ni, Rwoth Were waco ama: Alakiwada win wok i nonin, t'acoko win wok i piny kweth kama wikedher'iye, aka alamiyo win lowo pa Isiraili.

¹⁸Jolabino kenyo, aka jolakwanyo woko gigipiny m'adak je kodi amien je.

¹⁹Alamiyo jo cuny acel, t'aketho adundo manyen i jo, alakwanyo woko cuny matek pa tele wok i delkwoŋ jo, t'amiyo jo cuny mayom;

²⁰ŋey jowowothi i cik paran, to jokuro or paran, kodi timo. Jolabedo ji paran, aka alabedo Were pajo.

²¹To ri jono ma cuny jo luwo gigipiny m'adak kodi amien pajo, alaculo kwor kwoŋ jo, Rwoth Were waco.”

²²Kenyo kerubim joyaro bwombi jo, gi lipangala i thengi jo, aka dwoŋ pa Rwoth oyido nitie malo i wi jo.

²³Dwoŋ pa Rwoth oay malo wok i dier tindi madwoŋ, aka ocungo wi got yuwok ceŋ ma tindi madwoŋ.

²⁴Cuny otiŋan to kelan i menyirok gi cuny pa Were bongi jotwec i Kaldeya meno i Babilon, aka rumacen menyirok no oweyan.

²⁵Awaco ri jotwec gigipiny je ma Rwoth onyuthan.