Read dhopadhola Ezekiel 12 Bible Online

Ezekiel 12 - dhopadhola bible

Ezekiel 12

¹Wac pa Rwoth obino ka waco ni,

² “Wod dhano, ibedo i dier ot ma jogwenyirok, ma jonitie gi waŋ jo to jokinen, jonitie gi ithi jo to jokiwinji; kwoŋbedo jobedo ot ma jogwenyirok.”

³“Onyo wod dhano, tweyi migugu ikadhi i wiloka. Ilakadho i twec odieceŋ ka joneno gi waŋ jo, ilakadho paka jatwec wok i kabedo perin i kabedo man ka joneno. Poyi jolaniaŋ, makada nende jobedo ot ma jogwenyirok.

⁴Ilawodho woko migugu perin odieceŋ ka joneno gi waŋ jo, paka jatwec, aka ilakadho othieno paka jatwec timo, ka joneno gi waŋ jo.

⁵Kuny hoŋ i kor ot ka joneno, aka iwodhi migugu perin gi kenyo.

⁶Lier migugu i gokin i mudho ka joneno gi waŋ jo, aka ium waŋin, ŋey ikir'inen piny. Kole atieko kethin ranyuth ri ot pa Isiraili.”

⁷Atimo paka Rwoth omiyan or. Awodho migugu paran odieceŋ paka migugu pa jatwec, aka othieno akunyo hoŋ i kor ot gi cingan, awodho i mudho, t'atiŋo i gokan ka joneno gi waŋ jo.

⁸Wac pa Rwoth obino ran odikin ka waco ni,

⁹“Wod dhano fodi ot pa Isiraili, ot ma jogwenyirok no, jok'openjin nike itimo aŋo?

¹⁰Waci rijo ni, Rwoth Were waco ama: Me bieto ma mako kwoŋ jadhum ma Yerusalem kodi ji ma jobed'iye je.

¹¹Waci rijo ni, ibedo ranyuth rijo. Paka itimo, ameno apaka ilatimo rijo. Jolakadho bedo jopath i twec.

¹²Jadhum manitie i dier jo latiŋo migugu pere i goke i mudho, to wok. Go lakunyo hoŋ i kor ot to wodho gi kenyo, aka laumo waŋe ŋey wokiri wonen piny gi waŋe.

¹³Alayaro bwo paran kwoŋe, aka go lamoko i iye. Alakelo go i Babilon, i lowo pa Jokaldin, kucel go kilaneno; go latho kenyo.

¹⁴Jono je ma jothoko go ma jokonyo go kodi jolweny pere, alakedho woko jo i thenge aŋwen, t'acelo abor paran yuŋey jo.”

¹⁵“Kenyo jolaŋeyo ni An Abedo Rwoth, ka akedho jo i dier nonin, t'akelo jo i dier piny.

¹⁶To alaweyo manok kwoŋ jo both abor, kec kodi two nundu, ŋey jowotuci amien pajo i dier nonin ma jolakidh'iye; kenyo jolaŋeyo ni An Abedo Rwoth.”

¹⁷Wac pa Rwoth obino ran ka waco ni,

¹⁸“Wod dhano, cami cemo perin gi papin, aka imadhi pi perin gi kirin m'ipoŋ gi lworo.

¹⁹Waci ri ji ma lowo me ni, Rwoth Were waco ama ri ji ma jobedo i Yerusalem i lowo ma Isiraili. Jolacamo cemo pajo gi lworo, to jomadho pi pajo gi kirin, kwoŋbedo lowo pajo ladoŋ nono, ro maker pa ji ma jobed'iye je.

²⁰Tindin madongo ladoŋ gundin, aka lowo ladoŋ nono, kenyo wilaŋeyo ni An Abedo Rwoth.”

²¹Wac pa Rwoth obino ran ka waco ni,

²²“Wod dhano, meno ageca aŋo manitie i lowo ma Isiraili ma waco ni, ‘Hongo oyware, aka kisi menyirok kitundi i kare?’

²³Riameno wac rijo ni, Rwoth Were waco ama: Alamiyo ageca me worweny, aka kilaoro kendo i Isiraili. To wac rijo ni, ndelo ocore cegin, aka kisi menyirok latundo i kare.”

²⁴“Kendo kilabedo menyirok ma bukony, kosa tuco wac twodo i ot pa Isiraili.

²⁵To an Rwoth alaluwo, aka wac m'abino luwo je latimere, kilagalo kendo. Kole i hongo mewin, awi ot ma jogwenyirok, alaluwo wac, aka alatimo, Rwoth Were waco.”

²⁶Wac pa Rwoth obino ran ka waco ni,

²⁷“Wod dhano, neni, ot pa Isiraili jowaco ni, menyirok m'ineno latero ndelo kweth, aka wac m'ituco hongo mere fodi bor.

²⁸Riameno wac rijo ni Rwoth Were waco ama: Wac paran je kilagalo kendo, wac je m'aluwo latundo i kare, Rwoth Were waco.”