Read dhopadhola Ezekiel 13 Bible Online

Ezekiel 13 - dhopadhola bible

Ezekiel 13

¹Wac pa Rwoth obino ran ka waco ni,

²“Wod dhano, tuci wac kwoŋ jotuci wac Were ma Isiraili ma jotuco wac Were wok i paro pajo ni, Winji win wac pa Rwoth.”

³“Rwoth Were waco ama: Kidamba ri jotuci wac Were ma jomiŋ, ma joluwo paro pajo, aka ongoye gima jotieko neno.

⁴Awi Isiraili, jotuci wac Were mewin jotieko bedo paka ogwaŋe i dier gundin.

⁵Wikikadho malo i hoŋere, kosa yiko kor ot ri ot pa Isiraili, ŋey wonyali cungo i lweny i ndelo pa Rwoth.

⁶Ongoye gima jotieko neno aka jotuco wac twodo, ka jowaco ni me a gima Rwoth waco, to Rwoth ama k'ooro jo. Kucel jokuro ni wac pajo wotundi i kare.

⁷Ongoye gima witieko neno, aka witieko tuco wac twodo ka wiwaco ni me wac pa Rwoth, makada nende an fodi akiluwo.”

⁸“Riameno, Rwoth Were waco ama: Kwoŋbedo witieko tuco wac twodo, m'ongoye gima wineno, akiyere gi win, Rwoth Were waco.

⁹Alatiŋo cingan kwoŋ jotuci wac Were ma jotuco wac twodo m'ongoye gima witieko neno. Jokilabedo i dier ji paran ka joromo; aka kilandiko nyingi jo i Isiraili, kosa jokiladok i lowo ma Isiraili. Kenyo wilaŋeyo ni An Abedo Rwoth.”

¹⁰“Kwoŋbedo adieri, jotieko rwenyo ji paran ka jowaco ni, siem, to siem ongoye; aka ka ji paran jogeto kor ot, jotuci wac Were me jobino to jofuyo matar.

¹¹Waci ri jotuci wac Were no nike kor ot pajo latur woko. Koth lacwe swa gi pe kodi koyo ma laturo woko.

¹²Ka kor ot otiek podho piny, kilapenjo win ni, nikune gimatar ma wifuy'iye?”

¹³“Riameno, Rwoth Were waco ama: I keme paran aladhiro koyo matek, aka i nge paran labedo koth madwoŋ swa, aka i gero paran pe lareyo woko kicutho.

¹⁴Alaŋinyo woko kor ot ma wifuyo matar no, to gore piny i lowo, ŋey misingi mere wothangere. Lapodho aka wilarere i iye; kenyo wilaŋeyo ni An Abedo Rwoth.”

¹⁵“Alacowo nge paran kwoŋ kor ot kodi jono ma jofuyo matar. Alawaco rin ni, kor ot kodi joma jofuyo matar je jongoye;

¹⁶jotuci wac Were no, ma jotuco wac ri Yerusalem nike joneno siem nitie, ma to siem ongoye, Rwoth Were waco.”

¹⁷“Aka in, wod dhano, com waŋin kwoŋ mon pa ji perin, ma jotuco wac wok i paro pajo, aka ituci wac Were kwoŋ jo.

¹⁸Ilawaco ni, Rwoth Were waco ama: Kidamba ri mon ma jotudo yen i cingi ji aka jokwoyo kitambalin nger gi nger maboyo wiy jo ma dwaro kwo pa ji. Widwaro kwo pa ji ma wiwegi wikikur kwo mewin?

¹⁹Witieko nyeko nyingan i dier ji paran ri masi bale kodi muma mugat. Wiwaco ri ji twodo ma jomito winjo to wikelo tho ri ji ma jokiripi tho, aka ji ma joripo tho wiweyo jokwo.”

²⁰“Riameno, Rwoth Were waco ama: Akiyere gi yen mewin ma wioro ma dhumo kwo kodi tho. Alagonyo woko wok i cingi win, t'agonyo ji ma witweyo.

²¹Alayeco woko kitambalin mewin bende, t'abotho ji paran wok i cingi win, aka wikilabedo gi meni ma tweyo jo kendo. Kenyo wilaŋeyo nike An abedo Rwoth.

²²Kwoŋbedo gi twodo mewin wicilo cuny joma timo gim'otire, aka wimiyo jokidakana meni medo timo kidakana aka jobotho kwo pajo.

²³Riameno wikilaneno twodo kendo aka wikilathiedho kendo. Alabotho ji paran wok i cingi win. Kenyo nyaka wilaŋeyo nike An abedo Rwoth.”