Read dhopadhola Ezekiel 14 Bible Online

Ezekiel 14 - dhopadhola bible

Ezekiel 14

¹Jodongo mogo ma Isiraili jobino bongan aka jobedo ruwaŋan.

²Wac pa Rwoth obino ran ka waco ni,

³“Wod dhano, cwo me jotieko ketho cuny jo i cal pajo to jocomo waŋ gin kwoŋ gigipiny mareco ma miyo jo podho. Nger cwo no bende ber ni jowopenjan kwoŋ gimoro?”

⁴“Riameno luw gi jo aka iwaci rijo ni Rwoth Were waco ama: Dhano je ma wok i Isiraili m'oketho cunye kwoŋ cal pere aka ocomo waŋe kwoŋ gigipiny mareco ma miyo go podho, wobin bongi jatuci wac Were, An Rwoth, alamiyo go radwok ma ripo gi lamo cal pere;

⁵ŋey anyal mako t'awiro cuny Joisiraili je, ma jowire woko kwoŋan gi lamo cal pajo.”

⁶“Riameno wac ri Joisiraili ni, Rwoth Were waco ama: Ŋuti win aka wire win woko kwoŋ lamo cal mewin, wire win wiwey como waŋ win kwoŋ amien mewin je.”

⁷“Ka dhano moro je wok i Isiraili, kosa japath ma bedo i Isiraili, m'okwedan, to ketho cunye kwoŋ cal to como waŋe kwoŋ gigipiny mareco ma miyo go podho, obin bongi jatuci wac Were, an Rwoth, an won alamiyo go radwok tirtir.

⁸Alacomo waŋan kwoŋ ŋato, alaloko go ranyuth kodi gir'awaca aka alakwanyo woko go i dier ji paran. Kenyo wilaŋeyo ni An Abedo Rwoth.”

⁹“K'owondi jatuci wac Were to luwo wac, an Rwoth aŋat'awondo go. Alarieyo cingan kwoŋe, t'areyo woko go i dier ji paran Isiraili.

¹⁰Jolatiŋo reco pajo, jatuci wac Were, kodi ŋat'okidho bonge penjo jo, lalimo gir'acula acel;

¹¹ŋey Joisiraili jokiri jowokwedan, kosa jowokocere gi reco pajo. Jolabedo ji paran, aka alabedo Were pajo; Rwoth Were waco.”

¹²Wac pa Rwoth obino ran ka waco ni,

¹³“Wod dhano, ka piny otimo reco gi ngoye g'adieri adieri, alarieyo cingan kwoŋe, aka alareyo woko cemo ma kisi ndelo t'adhiro kec, alareyo woko ji kodi ogwaŋe.

¹⁴Makada nende oyido Nowa kodi Daniel kodi Yobu, cwo adek me oyido jonitie i iye, dinyo jonyalo botho kwo pajo gi timo gim'otire, Rwoth Were waco.”

¹⁵“Kabedi adhiri ogwaŋe madudi luwo i piny to joreyo woko ji, cuka piny doŋ nono, m'ongoye ŋata woth'iye;

¹⁶makada nende cwo adek me oyido jonitie i piny, paka akwo Rwoth Were waco, dinyo jok'onyalo botho nyithindho pajo. Dinyo jo kende ama joboth to piny doŋ nono.”

¹⁷“Kosa kabedi adhiri toŋ i piny t'awaco ni, weyi toŋ woluwi i piny aka worey woko ji kodi ogwaŋe.

¹⁸Makada nende cwo adek me oyido jonitie i piny, paka akwo Rwoth Were waco, dinyo jok'onyalo botho nyithindho pajo, to jo kende ama joboth.”

¹⁹“Kosa kabedi adhiri two nundu i piny, t'akonjo keme paran i iye gi oyo remo, ma reyo woko ji kodi ogwaŋe i piny,

²⁰makada nende Nowa kodi Daniel kodi Yobu oyido jonitie i iye, paka akwo Rwoth Were waco, dinyo jok'onyalo botho nyithindho pajo. Dinyo jonyalo botho kwo pajo wegi gi timo gim'otire.”

²¹“Kole Rwoth Were waco ama. Aladhiro gir'acula paran aŋwen mareco i Yerusalem, Toŋ kodi kec kodi ogwaŋe madudi kodi two nundu, reyo woko ji kodi ogwaŋe.

²²Kucel nitie ji ma jolaboth, nyithindho mayac kodi manyir, m'ilakelo jo bongin. K'ineno yo pajo kodi tim pajo, ilayomo cunyin kwoŋ teko m'atieko kelo kwoŋ Yerusalem, ri gim'atieko kelo kwoŋe je.

²³Ilayomo cunyin k'ineno yo pajo kodi tim pajo, aka ilaŋeyo nike nitie atoŋa m'omiyo atimo gim'atieko timo je, Rwoth Were waco.”