Read dhopadhola Ezekiel 16 Bible Online

Ezekiel 16 - dhopadhola bible

Ezekiel 16

²Wod dhano, miy Yerusalem woŋey amien pere.

³Wac ni, Rwoth Were waco ama ri Yerusalem. Cakirok perin kodi nywolirok perin owok i lowo pa Jokanan. Benin obedo Jamoor, aka min in obedo Jahiti.

⁴I ndelo m'inywol'iye, k'oŋadi koko perin, k'olwoki koco perin gi pi, k'orey rin cumbi, aka k'oumin gi nanga.

⁵Ongoye ŋat'omako wor kodin timo rin gigipiny me ma nyuthin wor aka obolin woko kam'othangere.

⁶Aluwo, t'anenin igweco i remo perin. Oyido iduwere gi remo perin, aka awaco rin ni, ikilatho.

⁷Amiyin idongo paka cemo i ndelo. Idongo t'ilokere mabor aka ilokere nyako m'othik, thundho perin othik aka ye wiyin odongo; kucel oyido initie kinyoro aka nono.

⁸Aluwo kendo t'aneno nike oyido itieko thiko. Ayaro tiendi kanzu paran kwoŋin, t'aumo kinyoro perin. Atimo kodin cikirok ma nywomirok, Rwoth Were waco, aka ilokere aparan.

⁹Kenyo akwanyo pi t'alwoko woko remo perin, aka awiro delkwoŋin gi mo.

¹⁰Aruko rin nanga makicin kodi war ma pien dhiaŋ. Aumo wiyin gi nanga mafoth, t'aumin gi suka mafoth.

¹¹Aruko rin thiwino i ŋutin, kodi pogo i cingin.

¹²Aruko rin peta i umin kodi milom i ithin, kodi sangaria maŋon i wiyin.

¹³Oyido initie gi thiwino ma zahabu gi feza, aka cemo perin oyido obedo moko m'onuŋere kodi mo kic kodi mo oliv. Idongo maŋon swa, t'ibedo nyamicala.

¹⁴Nyingin oŋeyere i piny kweth ro ŋono perin, kole oyido iŋon swa kwoŋbedo aŋat'amiyin ibedo maŋon, Rwoth Were waco.

¹⁵To iasa ketho cunyin kwoŋ ŋono perin, aka itimo malaya kwoŋbedo ioro ŋeyirok perin ma timo malaya gi ŋata luwo je.

¹⁶Ikwanyo nangin perin man t'ioro makicin kalamo perin, aka kenyo itimo malaya. Nger gime fodi oyido k'otimere aka k'otimere kendo.

¹⁷Ikwanyo thiwino perin maŋon ma zahabu gi feza paran m'amiyin aka itimo gine calin ma cwo t'itimo gine malaya.

¹⁸Ikwanyo nangin perin makicin m'amiyin t'iumo gine calin, aka imiyo jo mo kodi buban paran.

¹⁹Cemo paran m'amiyin kodi moko m'onuŋere kodi mo kic m'oyido amiyin icami, imiyo paka cowirok maŋwe kur ri calin. Rwoth Were waco.

²⁰Ikwanyo nyithindho m'oyido inywolo ran aka imiyo jo paka cowirok ri calin paŋini malaya perin oyido kirom.

²¹Ithumo nyithindho paran t'imiyo jo paka cowirok ri calin.

²²Gi amien perin kodi malaya perin, ikinyalo poyo kwo ma thino perin, munyo oyido initie kinyoro aka nono, munyo igweco i remo perin.

²³Rumacen ma kidakana perin je, kidamba, kidamba rin, Awi Yerusalem, Rwoth Were waco.

²⁴Igeto kituti perin, kodi kalamo kisi kam'othangere je.

²⁵Igeto kalamo i cakirok ma royo je aka itimo malaya gi ŋono perin, t'ithango kinyoro perin ri kisi ŋata luwo, aka malaya perin omedere.

²⁶Itimo malaya gi Jomisir, joger perin ma jokidakana, medo malaya perin, ma kwinyo nge paran.

²⁷Riameno arieyo cingan kwoŋin, amoja woko lim perin t'amiyin i mito pa Jofilistia, ma jodakin, ma jool gi tim perin ma kidakana.

²⁸Itimo malaya gi Joasiria, kwoŋbedo iyin lac, itimo malaya gi jo, to ikiyeŋ.

²⁹Imedere timo malaya kiri i Kaldeya, lowo pa jomitan, to kiri gi gime ikiyeŋ.

³⁰Cunyin col nedi, Rwoth Were penjo, m'itimo gime je, tim pa dhako malaya m'ongoye giwickwot.

³¹Igeto kituti perin i cakirok ma kisi royo, kodi kalamo kam'othangere je. Kucel oyido ikitim malaya ma pesa paka malayin ma kisi ndelo.

³²Awi dhako ma jakidakana, ma weyo cwore to timo cot gi jokicar.

³³Cwo jomiyo malayin mic, to in, itieko miyo jomitirok perin je mic aka inyewo jo bino wok kisi kamoro nindo kodin.

³⁴Oyido ipokere kwoŋ mon man i timo malaya perin. Ongoye ŋat'oromin bedo malaya, aka imiyo cul kucel in k'oculin, oyido ipokere.

³⁵Riameno, winji gima Rwoth waco, awi Yerusalem, malaya.

³⁶Rwoth Were waco ama, kwoŋbedo inyutho kidakana perin aka ithango kinyoro perin gi jomitirok perin, aka kwoŋbedo cal perin je mar'amien, aka kwoŋbedo remo pa nyithindho perin m'imiyo rijo.

³⁷Riameno acegin coko jomitirok perin je, m'isiemere gi jo, jono je m'oyido jomitin kodi ma jodakin. Alacoko jo kwoŋin thoko iye je, aka alathango kinyoro perin rijo, ŋey jowoneni kinyoro perin je.

³⁸Alathumo rin banja paka ri mon ma jotimo cot aka jonek, aka alamiyin gir'acula ma tho i nge kodi nyeko.

³⁹Alajwangin i cingi jo, aka jolaturo woko kituti perin kodi kalamo perin. Jolalunyo woko nangin perin to jokwanyo gigipiny perin ma ŋono aka jolaweyin kinyoro aka nono.

⁴⁰Jolaico ji kwoŋin, aka joladwirin gi telin, to jothumin mathindho thindho g'abore pajo.

⁴¹Jolawaŋo udi perin gi mac to jomiyin gir'acula ka mon kweth joneno gi waŋ jo. Alamiyin weyo timo malaya kodi weyo miyo jomitirok perin mic.

⁴²Kenyo nyaka keme paran kwoŋin larumo, aka alabedo gi siem. Akilamako nyeko kosa mako nge kendo.

⁴³Kwoŋbedo wiyin owil gi hongo perin ma soye, aka itieko miyan nge gi gime je, riameno, atieko miyin gir'acula Rwoth Were waco. Imedo timo cot loyo amien perin je.

⁴⁴Neni, Yerusalem, kisi ŋata oro ageca, laoro ageca me kwoŋin. Paka yokimere apaka nyare.

⁴⁵Ibedo nyar yokin adieri, m'ojwango cwore kodi nyithindho pere; aka ibedo nyamin nyimin in, ma jojwango cwogi jo kodi nyithindho pajo. Yokin oyido obedo Jahiti aka benin oyido obedo Jaamor.

⁴⁶Nyamin in madwoŋ obedo Samaria, m'obedo gi nyiki go yumalo perin, aka nyamin in mathin obedo Sodom, m'obedo gi nyiki go yupiny perin.

⁴⁷Ikiluwo nyaka yo pajo kodi timo tim mar'amien pajo, to i hongo macek oyido i jakidakana loyo jo i yo perin je.

⁴⁸Adieri paka akwo, Rwoth Were waco, nyamin in Sodom kodi nyir pere jok'otimo gima in kodi nyikin witieko timo.

⁴⁹Me obedo banja pa nyamin in Sodom. Go kodi nyir pere oyido jopoŋ gi noro, cemo i thotho, kodi kwo mayom, to k'okonyo jocandi kodi ji ma bu gimoro.

⁵⁰Jo oyido jonoro, aka jotimo amien ruwaŋan, riameno areyo woko jo munyo aneno.

⁵¹Samaria k'otimo adec mareco perin, itieko timo amien maloyo ma jotimo, aka imiyo banja pa nyimin in neno mathin loyo amien m'itieko timo je.

⁵²Onyo ciri wickwot perin, kwoŋbedo itieko miyo banja pa nyimin in neno mathin, ro reco perin m'itimo mar'amien loyo jo. Onyo omiyo jo bedo ma bubanja kabutin. Ameno tiŋi wickwot kwoŋbedo imiyo nyimin in neno pa jober.

⁵³Aladwoko ri Sodom kodi Samaria kodi nyir pajo lim pajo, aka aladwoko lim perin bende, Yerusalem.

⁵⁴Gime lamiyin wickwot ro gim'itieko timo je, aka meno layomo cuny nyimin in.

⁵⁵Nyimin in, Sodom kodi nyir pere jolagik i cal pajo macon, Samaria kodi nyir pere bende, aka in kodi nyikin bende wilagik i cal macon.

⁵⁶Sodom oyido k'obedo gir'awaca i dhokin i hongo ma noro perin,

⁵⁷mafodi kidakana perin k'onyuthere kamaler? Onyo pama ibedo aŋala ri Joedom kodi joger pere je, kodi ri Jofilistia, jono je thoko ma jocayin.

⁵⁸Iripo candere ri timo cot perin kodi amien perin, Rwoth waco.

⁵⁹Rwoth Were waco ama: Alaterin paka ripo, kwoŋbedo icayo kwoŋirok perin t'ituro cikirok perin.

⁶⁰Kucel alapoyo cikirok paran kodin i hongo ma soye perin, aka alaketho cikirok kodin ma cil gi cil.

⁶¹Kenyo ilapoyo tim perin, aka wiyin lakwot, k'akwanyo nyimin in, madwoŋ kodi mathin, t'amiyin jo paka nyithindho, to k'obedo ro cikirok paran kodin.

⁶²Alaketho cikirok paran kodin, aka ilaŋeyo nike An abedo Rwoth.

⁶³Kenyo nyaka ilapoyo to wiyin kwot, aka ikilayawo dhokin kendo, ro wickwot, k'atieko cwako rin tim perin marac je, Rwoth Were waco.