Read dhopadhola Ezekiel 18 Bible Online

Ezekiel 18 - dhopadhola bible

Ezekiel 18

¹Wac pa Rwoth obino ran ka waco ama:

²Ageca aŋo me ma wiluda i lowo ma Isiraili. Jonywol jocamo nyingi vini mawac aka lak nyithindho ofole.

³Paka abedo Were makwo, Rwoth Were waco, kendo wik'oluda ageca me i lowo ma Isiraili.

⁴Kwo pa kisi dhano je obedo aparan, kwo pa janywol kiri gi kwo pa nyathi. Ŋata timo reco ama latho.

⁵Ka dhano bedo i kwo m'otire, timo tiro kodi gim'otire,

⁶kicam cemo m'ocowere gine wi gote, aka kitiŋi waŋe malo lamo cal ma ot pa Isiraili. Go kiweci gi cipa jacwo man kosa kinindi gi dhako ka ruko dwe.

⁷Ka go kidiy kosa kikwal dhano, go dwoko gima jabanja pere singa rigo, go pidho joma kec neko jo aka ruko ji ma jongoye gi nanga.

⁸Ka go kikopa pesa ri magowa, aka kwero timo raco to miyo rieko m'otire i dhaw mogo je.

⁹Meno go winjo or paran aka kuro cik paran noknok. Go timo gim'otire, aka go lakwo; Rwoth Were waco.

¹⁰To ka go nitie gi wode ma jamaker ma janek, ma timo nger gigipiny me,

¹¹ma bamere oyido kitim. Go camo cemo m'ocowere gine wi gote, weco gi mon pa ji.

¹²Ka go diyo jocandi aka kwalo, aka kano gima jabanja pere osinga rigo. Go tiŋo waŋe malo lamo cal, go timo amien.

¹³Go kopa pesa gi magowa, go okwo? Be go kilakwo kwoŋbedo go otieko timo amien me je. Go latho adieri, aka remo pere ladoŋ i wiye.

¹⁴To ka jacwo me nitie gi wode ma neno reco je ma bamere otieko timo, to kiluw tim pere.

¹⁵Go kicam cemo m'ocowere gine wi gote, kosa kitiŋi waŋe malo lamo cal. Go kiweci gi mon pa ji,

¹⁶kosa kidiy dhano mogo je kosa kwal. Go dwoko gima jabanja pere osinga rigo aka pidho joma kec neko jo kodi ruko joma jongoye gi nanga.

¹⁷Go kwero timo raco aka kikopa pesa gi magowa. Go kuro cik paran aka winjo or paran. Go kilatho kwoŋbedo reco pa bamere, to go lakwo adieri.

¹⁸Bamere odiyo ji to kwalo, aka otimo gimarac ri kisi dhano, riameno go tho ro reco pere.

¹⁹Aka wipenjo ni, “Raŋo nyathi kicandere ro reco pa bamere?” Obedo kwoŋbedo nyathi otimo tiro kodi gim'otire. Go okuro cik paran aka oluwo jo gi kinen, riameno go lakwo adieri.

²⁰Adundo ma timo reco ama latho. Nyathi kilatiŋo reco pa janywol, aka janywol kilatiŋo reco pa nyathi. Ŋata timo gim'otire labedo rigo won, aka ŋata timo kidakana labedo rigo won.

²¹Ka jakidakana owire woko kwoŋ reco pere m'otieko timo, aka go okur cik paran je, aka otim tiro kodi gim'otire, go kilatho, go lakwo adieri.

²²Ongoye reco pere je m'otieko timo m'ilapoyo, aka go lakwo ro gim'otire ma go otimo.

²³Rwoth Were penjo ni, “Anitie gi kisangala moro je i tho pa jakidakana? Be Them anen go pusere to kwo.”

²⁴“To ka ŋata timo gim'otire oweyo timo gim'otire to timo reco kodi timo amien je ma jakidakana timo, go okwo? Ongoye tim pere m'otire ma go otieko timo je m'ilapoyo. I ngoye g'adieri pere ma go timo kodi reco pere ma go otimo, go latho.”

²⁵Kucel wiwaco ni, “Yo pa Rwoth k'otire. Onyo winji win, Awi ot pa Isiraili, yo paran k'otire? K'obedo ni yo mewin ama k'otire?

²⁶Ka ŋata timo gim'otire oweyo timo gim'otire to timo reco, go latho ri reco ma go otimo.

²⁷To ka jakidakana owire woko kwoŋ kidakana ma go otieko timo to timo tiro kodi gim'otire, go labotho kwo pere.

²⁸Go oneno to wire woko kwoŋ reco pere ma go oyido timo, go lakwo adieri aka kilatho.

²⁹Kucel ot pa Isiraili waco ni, ‘Yo pa Rwoth k'otire.’ Awi ot pa Isiraili, yo paran k'otire? K'obedo ni yo mewin ama k'otire?”

³⁰“Riameno Rwoth Were waco ama: Awi ot pa Isiraili alathumo riwin banja luwo kwoŋ yo pa kisi dhano. Pusere win aka wiwire woko kwoŋ reco mewin, ka k'obedo ameno lalokere riwin rerok.

³¹Weyi win reco je ma witieko timo kwoŋan, aka wilimi cuny manyen kodi adundo manyen! Raŋo witho, awi ot pa Isiraili?

³²Kole angoye gi kisangala i tho pa dhano moro je, Rwoth Were waco. Wire win, aka ŋey wikwo.”