Read dhopadhola Ezekiel 20 Bible Online

Ezekiel 20 - dhopadhola bible

Ezekiel 20

¹Obedo k'apar ma dwe mar'abic i oro mar'abirio, jodongo mogo wok i Isiraili jobino penjo Rwoth, aka jobedo piny ruwaŋan.

²Wac pa Rwoth obino ran ka waco ama:

³Awi wod dhano luw gi jodongo ma Isiraili aka iwaci rijo ni, me a gima Rwoth waco. Wibino penjan? Paka akwo Rwoth Were waco, wikilapenjan.

⁴Ilathumo rijo banja? Wod dhano, ilathumo rijo banja? Miy jo ŋeyo amien pa kwarere pajo.

⁵Iwaci rijo ni, me a gima Rwoth Were waco. I ndelo m'ayer'iye Isiraili, akwoŋere ri nyikway Yakobo aka amiyo jo ŋeyan i lowo ma Misir. Akwoŋere rijo k'awaco ni, “Abedo Rwoth, Were mewin.”

⁶I ndelo no akwoŋere rijo wodho jo wok i lowo ma Misir kadho i lowo m'oyido atieko yero rijo, lowo ma mol gi cak kodi mo kic, maŋon loyo lowo je.

⁷Awaco rijo ni kisi dhano wowey woko tim ma mienirok pere, aka jokiri jowokocere gi cal ma Misir, kwoŋbedo abedo Rwoth Were pajo.

⁸To jogwenyere kwoŋan aka oyido jok'oyikere winjan. Kisi dhano k'oweyo tim ma mienirok pere, aka jok'oweyo cal ma Misir. Kenyo awaco ni, alakonjo keme paran kwoŋ jo t'acowo nge paran kwoŋ jo i lowo ma Misir.

⁹To akitimo ameno ro dwoŋ ma nyingan, m'akimito koco ruwaŋ nonin ma jobedo i dier jo, ma ruwaŋ jo aŋeyere rijo i wodho jo wok i lowo ma Misir.

¹⁰Ameno awodho jo wok i lowo ma Misir t'akelo jo i thim.

¹¹Amiyo jo or paran t'afonjo jo cik paran, ma ŋata luwo kwo.

¹²Amiyo jo bende kuro sabato, paka ranyuth i dier an kodi jo; ŋey jowoŋey nike An Rwoth, aloko jo maleŋ.

¹³To kiri i thim, ot pa Isiraili jogwenyere kwoŋan, jok'owotho i cik paran, aka jokwero or paran ma ŋat'oluwi lakwo. Jokoco sabato paran, kenyo aparo kwoŋ konjo keme paran kwoŋ jo i thim, ma reyo woko jo.

¹⁴To akitimo, kwoŋbedo oyido lakelo wickwot ri nyingan ruwaŋ nonin, ma joneno munyo awodho jo wok i Misir.

¹⁵Ameno akwoŋere rijo i thim nike oyido akilakelo jo i lowo m'oyido atieko miyo jo, lowo ma mol gi cak kodi mo kic, lowo maber loyo lowo je.

¹⁶Atimo ameno kwoŋbedo oyido jokwero or paran, to joturo cik paran, jokoco sabato, aka joyero lamo cal pajo.

¹⁷To aneno jo gi wor, aka akineko jo kosa reyo woko jo i thim.

¹⁸Awaco ri nyithindho pajo i thim ni, wikiri wikuri cik ma jonywol mewin jotimo, kosa wiluw tim pajo, kosa wikocere gi cal pajo.

¹⁹An Rwoth, abedo Were mewin. Luw win cik paran, aka wikuri or paran kodi timo je.

²⁰Kur win sabato paran maleŋ ŋey jowobedi ranyuth i dier an kodi win ŋeyo nike An Rwoth, abedo Were mewin.

²¹To nyithindho pajo jogwenyere kwoŋan, jok'oluwo cik paran kosa kuro or paran, ma ŋata luwo kwo. Jokoco sabato paran. Kenyo aparo konjo keme paran kwoŋ jo kodi cowo nge paran kwoŋ jo i thim.

²²To alwogo cingan, aka akimito kelo wickwot ri nyingan ruwaŋ nonin ma joneno munyo awodho jo wok i Misir.

²³Ameno akwoŋere rijo i thim nike alakedho jo i dier nonin kodi i piny man.

²⁴Atimo ameno kwoŋbedo oyido jok'otimo or paran, to jokwero cik paran aka jokoco sabato paran to jolamo cal ma cango kwarere pajo jolamo.

²⁵Kenyo amiyo jo cik ma kiber kodi or ma kimiy kwo.

²⁶Amiyo jo kocirok gi mic pajo wegi ka jomiyo okayin pajo paka cowirok, ma miyo jo gir'acula ŋey jowoŋey ni An Abedo Rwoth.

²⁷Riameno wod dhano, luw gi ot pa Isiraili aka iwaci rijo ni, Rwoth Were waco ama: Kwarere mewin kendo jocayan gi ngoye g'adieri.

²⁸Akelo jo i lowo m'akwoŋere miyo jo. Munyo joneno kisi tendere mabor kodi yen m'oyukino, jomiyo cowirok i joje. Jomiyan nge gi cowirok pajo ma jowaŋo kama joduny'iye ŋwece kur pajo to jokonjo mic ma vini.

²⁹Apenjo jo ni, Kabedo ma malo mene ma wikadh'iye? Ameno kabedo no ilwoŋo ni Bama kiri konon.[1]

³⁰Riameno wac ri ot pa Isiraili ni Rwoth Were waco ama: Wilakocere gi kula pa kwarere mewin to wiluwo amien pajo?

³¹Ka wimiyo mic mewin gi waŋo nyithindho mewin i mac, wikocere gi cal je kiri konon. Kosa wilabino penjan, Awi ot pa Isiraili? Paka akwo, Rwoth Were waco, wikilapenjan.

³²Paro ma winitie gine ka wiparo nike wilabedo paka nonin man kodi ji man ma jonitie i piny man to wilamo mbawin kodi telin, k'otimere.

³³Paka akwo adieri, Rwoth Were waco, ka k'obedo gi cingan matek kodi meni paran, kodi i keme paran, alabedo kere mewin.

³⁴Alawodho win wok i dier nonin t'acoko win wok i piny kama wikedher'iye, gi cingan matek kodi meni paran, kodi i keme paran.

³⁵Alakelo win i thim pa nonin, aka aladonjo i thumo banja riwin awaŋ g'awaŋ.

³⁶Paka cango adonjo i thumo banja ri kwarere mewin, apaka aladonjo i thumo banja riwin, Rwoth Were waco.

³⁷Alamiyo win luwo i litho cuka amiyo win miyirok kuro cikirok paran.

³⁸Alakwanyo woko jogwenyirok i dier win, kodi jono ma jotimo reco kwoŋan. Alawodho jo woko i lowo ma jobed'iye paka jopath, to jokiladonjo i lowo pa Isiraili. Kenyo wilaŋeyo ni An Abedo Rwoth.

³⁹Paka riwin, awi ot pa Isiraili, Rwoth Were waco. Kadhi witiy ri calin mewin kisi dhano kwoŋ win pama kodi rumacen k'inen wikilawinjan. To wikilakoco nyingan maleŋ kendo gi mic mewin kodi calin mewin.

⁴⁰Kole wi got paran maleŋ, got mabor pa Isiraili, Rwoth Were waco, kenyo ot pa Isiraili gibe, joje, jolatic ran i lowo no. Koro alayeyo jo, aka koro alamito mic mewin kodi mic mewin maber loyo, kodi gigipiny mewin maleŋ je.

⁴¹Alayeyo win paka ŋwece kur ma sangala an, k'anowodhi win wok i dier nonin, aka alacoko win wok i piny kama wikedher'iye. Alanyutho leŋo paran i dier win ruwaŋ nonin.

⁴²Wilaŋeyo ni An Abedo Rwoth, k'akelo win i lowo ma Isiraili, lowo m'akwoŋere miyo kwarere mewin.

⁴³Gi koro wilapoyo yo mewin kodi tim mewin je ma wikocere gine, aka wiladakere kwoŋbedo gimarac ma witieko timo.

⁴⁴Wilaŋeyo ni An Abedo Rwoth, k'atiyo gi win ro nyingan, ki cungo kwoŋ yo mewin marac kosa tim mewin makoc, awi ot pa Isiraili, Rwoth Were waco.

⁴⁵Wac pa Rwoth obino ran ka waco ama:

⁴⁶Wod dhano, com waŋin yuthenge ma yupiny, aka iluwi kwoŋ yupiny t'ituco wac Were kwoŋ lul ma yupiny.

⁴⁷Waci ri lul ma yupiny ni, winji wac pa Rwoth. Rwoth Were waco ama: Acegin cwinyo mac, aka lawaŋo yath manumu kodi m'othwo je manitie i in. Mac m'odheth ma kinyal neko, aka wok yupiny tundo yumalo je lawaŋ gine.

⁴⁸Ji je jolaneno nike An Rwoth aŋat'acwinyo, aka kilaneko woko.

⁴⁹Kenyo awaco ni, “Awi Rwoth Were, kole jowaco kwoŋan ni, abedo jacwogi agecin.”