Read dhopadhola Ezekiel 21 Bible Online

Ezekiel 21 - dhopadhola bible

Ezekiel 21

¹Wac pa Rwoth obino ran ka waco ama:

²Awi wod dhano, com waŋin yu Yerusalem aka ititi wac kwoŋ Kabedo Maleŋ; tuci wac Were kwoŋ lowo ma Isiraili.

³Ilawaco ri lowo ma Isiraili ni me a gima Rwoth waco. Abino kwoŋ win, aka alafudho abor paran wok iy'atum mere. Alareyo woko joma timo gim'otire kanyacel gi jokidakana.

⁴Kwoŋbedo alareyo woko joma timo gim'otire kanyacel gi jokidakana, riameno alafudho abor paran wok iy'atum kwoŋ ji je wok yupiny tundo yumalo.

⁵Ji je jolaŋeyo nike an Rwoth, atieko fudho abor paran wok iy'atum aka akiladwoko i iye kendo.

⁶Aka in wod dhano, uja, uja gi cunyin m'otur kodi rem mathoth swa ruwaŋ jo.

⁷Aka ka jopenjin ni, “Raŋo iuja?” Dwoki jo ni, “Kwoŋbedo mikwenda ma bino. K'obin, cuny jo lapodho aka cingi jo lanyapere, kisi adundo lagore piny, aka congi jo laukere paka pi. Neni ee, bino aka latundo i kare. Rwoth Were waco.”

⁸Wac pa Rwoth obino ran ka waco ama:

⁹Wod dhano, tuci wac Were aka wac ni me a gima Rwoth waco. Abor otiek pako aka pilin.

¹⁰Opak ma neki, aka pilin paka lithkoth. Ongoye siemirok, wikwero pir je kodi gir'acula.

¹¹Omiy dhano wiro abor woleny, woyik ma oro. Opak abor, otieko pilin, ma ketho i cingi janek.

¹²Ywak, aka uja, wod dhano, abor me oyiki ri ji paran, kodi jodhum ma Isiraili je. Abor kidho neko jo, kanyacel gi ji paran. Awi, pay emin.

¹³Kole atemo, ka jokwer winjo pir, k'otimere? Rwoth Were waco.

¹⁴Onyo, wod dhano, tuci wac Were, goy adhoŋ, weyi abor wopodhi dirio, didek, obedo abor ma neki. Abor ma neki madwoŋ, othoko jo.

¹⁵Cuny jo podho, aka kweth jocer. I waŋkac pajo je, atieko ketho abor. Awi, otim ma pilin paka lithkoth, omin ma neki.

¹⁶Bedi mabith, monji yuracuc, ici yuracam, kama waŋin ocom'iye.

¹⁷An bende alagoyo adhoŋ, aka alacowo keme paran. An Rwoth, atieko luwo.

¹⁸Wac pa Rwoth obino ran ka waco ama:

¹⁹In wod dhano, ceri royo ario ri abor pa kere ma Babilon ma labino. Je jowocaki i piny acel. Kethi kipande ri jangi royo ma kidho i tindi madwoŋ.

²⁰Ceri royo ri abor ma bino i Raba pa Joamon kosa i Yuda kosa i Yerusalem m'otinda.

²¹Kere ma Babilon ocungo i jangi royin ario, oro thieth, yengo aserin, penjo terafim, go kaŋasa cuny ogwaŋ.

²²I cinge maracuc, nitie abor pa Yerusalem, ketho wot rombo athuma, lwoŋo ma neki, koko dwondi ma ywak ma lweny, ketho wot rombo athuma kwoŋ waŋkace, ma geto cel kodi kunyo buce ma cego.

²³To rijo, lacale paka wac twodo, jotieko kwoŋirok, to miyo jo poyo banja pajo, ma kelo mako jo.

²⁴Riameno, Rwoth Were waco ama: Kwoŋbedo witieko poyo banja mewin, aka i nger no reco mewin othangere, ŋey i tim mewin je reco mewin nenere, kwoŋbedo witieko poyo, ilamako win acingi.

²⁵Aka in, m'idakana, jadhum makoc ma Isiraili, ndelo perin otieko tundo, ndelo perin ma gir'acula macowe bino.

²⁶Rwoth Were waco ama: Luny woko junga perin, luny woko sangaria perin, gime je langoye, tiŋi malo gima nitie piny, aka dwoki piny gima nitie malo.

²⁷Kisika, kisika adieri, alaloko tindi madwoŋ gunda, to k'otimere cuka ŋat'atieko yero miyo tindi madwoŋ gir'acula obin, kenyo alamiyo go.

²⁸In wod dhano, tuci wac Were, aka waci ni, Rwoth Were waco ama ri Joamon, aka kwoŋ yet pajo waci ni, Abor, abor ocel ma nek. Otiek, aka pilin paka lithkoth.

²⁹Ineno rin menyirok ma twodo, ithiedho rin gima k'adieri, itweyin i ŋut, joreco ma jodakana swa, jono ma ndelo pajo otieko tundo, hongo ma gir'acula macowe.

³⁰Dwoki abor i mugowa mere! Alathumo rin banja, i kabedo m'ocweyin'iye, i lowo ma cakirok perin.

³¹Alakonjo kwoŋin nge paran, gi mac ma keme paran, alakudho kwoŋin. Alajwangin i cingi jomaker, ji ma jonek swa.

³²Ilabedo mo ma cwinyo mac, remo perin laoy i lowo, kilapoyin kendo, An Rwoth, atieko luwo.