Read dhopadhola Ezekiel 22 Bible Online

Ezekiel 22 - dhopadhola bible

Ezekiel 22

¹Wac pa Rwoth obino ran ka waco ama:

²In wod dhano, Inothum banja ri tindi madwoŋ m'opoŋ neki no? Miy amien pere je woŋeyere.

³Waci ni, Rwoth Were waco ama: Awi tindi madwoŋ, ma neko ji pere won, hongo pere otieko tundo, timo calin pere, aka kocere gine.

⁴Witieko bedo jobanja ro remo ma witieko oyo, aka wikocere gi calin ma witieko timo. Riameno ndelo mewin otieko tundo, hongo mewin orumo! Meno am'omiyo atieko miyo win bedo giwickwot ruwaŋ nonin, kodi aŋala ri piny je.

⁵Nonin macegin kodi mabor joŋalo win kwoŋbedo wiŋeyere ri gwenyirok.

⁶Jodhum ma Isiraili je jogeno meni pajo wegi aka joneko.

⁷Win ji ma tindi madwoŋ wikiwor jonywol mewin. Widiyo jopath aka witero nyathi kic kodi citho marac i dier win.

⁸Wikiwor Kabedo Maleŋ, aka wikikur sabato.

⁹Nitie ji i dier win ma jowaco twodo kwoŋ joman ŋey woneki jo. Jomegi i dier win jocamo cemo m'ocowere gine ri calin, aka megi joyeŋo awanya pajo.

¹⁰Jomegi kwoŋ win winindo gi ciba win, aka megi jonindo gi mon ma joruko dwe.

¹¹Jomegi jotimo cot gi cipa jager, man joweco gi ciwod jo, aka man jonindo gi nyar bajo.

¹²Megi kwoŋ ji mewin inyewo jo neki. Megi joketho magowa kwoŋ pesa ma jokopa Joisiraili wadi jo aka joŋaŋ gi diyo jo. Wiwin owil kodan, Rwoth Were waco.

¹³Neni ee, alamino adol kwoŋ kwo mewin kodi neki manitie i dier win.

¹⁴Cuny win onyali ciro, aka cingi win odoŋ matek i ndelo m'alatiy'iye gi win? An Rwoth, atieko luwo, aka alatimo.

¹⁵Alakedho win i dier nonin, t'abolo win i dier piny, aka alakwanyo woko kicutho koco mewin i dier win.

¹⁶Ilacayo win ka nonin man joneno, kenyo nyaka wilaŋeyo ni An Abedo Rwoth.

¹⁷Wac pa Rwoth obino ran ka waco ama:

¹⁸Awi wod dhano, ot pa Isiraili olokere ran nyal. Jocale nyweny, waya, cuma, kikebe kodi nyal m'oyuy kwoŋ feza.

¹⁹Riameno, Rwoth Were waco ama: Kwoŋbedo wijoje witieko lokere nyal, alacoko wijoje kanyacel i Yerusalem.

²⁰I nger acel m'icok'iye waya, cuma, nyweny kodi kikebe i dier mac m'ocwiny, ŋey jowonyele, ameno apaka alacoko win i nge paran, i keme paran, aka alaketho win piny t'anyelo win.

²¹Alacoko win, aka alakudho kwoŋ win mac gi keme paran, aka wilanyele i iye.

²²Paka feza nyele i dier mac, apaka wilanyele bende, aka kenyo nyaka wilaŋeyo nike An Rwoth, atieko konjo keme paran kwoŋ win.

²³Wac pa Rwoth obino ran ka waco ama:

²⁴Awi wod dhano, wac ri Joisiraili ni lowo pajo koc, aka koth k'ocwe i iye i ndelo ma nge.

²⁵Riwirok pa jotuci wac Were mere cal simbwore ma johola kwoŋ ogwaŋ ma joneko. Joneko ji aka jonyaga pesa kodi lim ma jonyalo nwaŋo, aka gi neki pajo joweyo mon kweth ma bu cwo.

²⁶Jocway ri Were i wi migam mere joturo cik paran aka jokiwor gimaleŋ. Jokikethi pokirok i dier leŋo kodi gima kileŋ. Jokifonji pokirok i dier gim'olony kodi gimakoc, aka jokoco sabato paran, ŋey kiworan i dier jo.

²⁷Jodhum mere jocale paka arare ma joyeco ogwaŋ ma joneko. Joneko ŋey jowoŋaŋ.

²⁸Jotuci wac Were mere jofuyo gimatar rijo, aka joneno twodo, jothiedho rijo gima k'obedo adieri, aka jowaco ni, Rwoth waco ama; ma Rwoth fodi k'oluwo.

²⁹Ji ma lowo jotimo akor aka jokwalo, jotieko diyo jocandi kodi ji ma bu gimoro, aka jotieko tero jopath marac.

³⁰Arango i dier jo dhano manyalo geto kendo kor ot, ŋata nyalo cungo kama kor ot obar'iye to kwonga lowo ka nge paran cegin reyo woko, to akinyalo nwaŋo dhano.

³¹Riameno atieko konjo nge paran kwoŋ jo, gi mac ma keme. Atieko reyo woko jo, ro tim pajo, atieko miyo jo gir'acula, Rwoth Were waco.