Read dhopadhola Ezekiel 23 Bible Online

Ezekiel 23 - dhopadhola bible

Ezekiel 23

²Wod dhano, oyido nitie mon ario ma jobedo nyimere, aka jonywole gi dhako acel.

³Munyo oyido jobedo i Misir, jotimo cot aka jolokere malayin.

⁴Madwoŋ mere oyido ilwoŋo ni Ohola (ma cungo ri Samaria) aka mathin mere oyido ilwoŋo ni Oholiba (ma cungo ri Yerusalem.) Anywomo joje, aka jonywolo ran nyithindho.

⁵Ohola otimo malaya kareno go fodi obedo aparan; aka otimo nyacwo gi jomitirok pere Joasiria, jolweny.

⁶Jobedo jolweny ma joruko nanga manyabululu, jogavana kodi jomituka, joje yac maŋon, ma jogwey kayinin.

⁷Go otimo malaya gi jotel pa jolweny je ma Asiria, aka nyacwo pere omiyo go kocirok gi lamo calin ma Asiria.

⁸Go omedere gi gima go oyido otieko cako paka malaya, kama go otim'iye cot. Wok i nyako pere, cwo jonindo gine aka jotero go paka malaya.

⁹Riameno amiyo go i cingi jomitirok pere, i cingi Joasiria ma go omito swa.

¹⁰Jolunyo go kinyoro, jomako wote kodi nyiki go, to joneko go g'abor. Omiy go gir'acula, aka mon kisi kamoro joluwo nyingi go.

¹¹Nyamin go Oholiba oneno gime, kucel go otimere marac loyo go i timo malaya kodi nyacwo.

¹²Go otimo nyacwo ri jogavana kodi jomituka, jolweny ma joruko nanga ma lweny, jogwey kayina, yac maŋon no je.

¹³Aneno nike go okocere, jario joluwo yo acel.

¹⁴Go omedere gi malaya pere. Oholiba owanya calin pa jotel pa jolweny ma Babilon m'ogor i kor ot m'owir gi rangi m'obokere,

¹⁵gi thondhe i pier jo kodi jungin maŋon i wi jo. Joje jocale jotel pa jolweny, calin pa Jobabilon ma piny pajo obedo Kaldeya.

¹⁶Tekin go neno jo, owanya jo to oro jomikwenda bongi jo i Babilon.

¹⁷Jobabilon jobino to jonindo gi go, aka jokoco go swa gi malaya pajo ma rumacen go ojok gi jo.

¹⁸Go onyuthere kamaler to miyo kisi dhano je ŋeyo nike go obedo malaya. Ajok gi go paka oyido ajok gi nyamin go.

¹⁹Kucel go omedere timo malaya loyo, timirok paka munyo go fodi obedo nyako, munyo go obedo malaya i Misir.

²⁰Go opoŋ g'awanya ri cwo ma jobedo nyamon, m'oyido jojayo paka punde kodi kayinin.

²¹Ameno iwanya medirok gi kidakana perin manyako munyo oyido initie i Misir, kama cwo jotuko gi thundho perin t'itimo cot.

²²Riameno, awi Oholiba, Rwoth Were waco ama: Alamiyo jomitirok perin m'ijok gi jo mako nge kodin aka alakelo jo monjin thoko iye je.

²³Jobabilon, Jokaldin je, Pekod kodi Sowa kodi Kowa kodi ji je ma Asiria kanyacel gi yac maŋon, jogavana kodi jotel pa jolweny, joje jogwey kayinin.

²⁴Jolamonjin wok yumalo, gi jolweny kweth gi cawilin kodi gilweny. Jolaumere gi kwote kodi jungin, jolathokin, aka alamiyin i cingi jo to jothumo rin banja luwo kwoŋ cik pajo.

²⁵Alamako kodin nyeko, aka jolatic kodin i keme. Jolacoto umin kodi ithin, aka ji perin m'odoŋ jolaneko g'abor. Jolakadho gi wotin kodi nyithindho perin manyir, aka jolawaŋo jom'odoŋ gi mac.

²⁶Jolayeco nangin perin to jokwanyo thiwino perin.

²⁷Alacowo nyacwo perin kodi kidakana perin m'itieko timo wok cuka ibedi i Misir. Ikilaneno kendo calin kosa poyo Misir.

²⁸Kole Rwoth Were waco ama: Alamiyin i cingi ji m'idak aka ijok gi jo.

²⁹Jolatic kodin gi dakirok, jolatero lim je m'itieko tiyo rigo to joweyin kinyoro aka nono. Jolathango kinyoro perin kodi malaya perin kodi nyacwo perin.

³⁰Timo malaya gi nonin, kodi kocirok gi calin pajo, am'okelo rin gime.

³¹Itieko luwo yo pa nyamin in, ameno alamiyin madho kikopo ma gir'acula acel.

³²Rwoth Were waco ama: Ibino madho agwata pa nyamin in, luth aka lac; ilanyerin t'icayin, otiŋo mathoth.

³³Ilapoŋin gi mero kodi kumo. Kikopo ma lworo kodi kisika, m'obedo kikopo pa nyamin in Samaria.

³⁴Ilamadho t'itieko gima nitie iye, aka ilabaro thundho perin, gi ŋinjeŋinje mere; kole atieko luwo, Rwoth Were waco.

³⁵Riameno Rwoth Were waco ama: Rupiri wiy win owil kodan aka wiwitan yuŋey win, onyo biel win gim'owok i kinyoro mewin gi malaya mewin.

³⁶Rwoth owaco ran ama: Wod dhano, ilathumo banja ri Ohola kodi Oholiba? Kenyo ituci rijo kamaler tim pajo mar'amien.

³⁷Kole jotieko timo cot, aka remo nitie i cingi jo; jotieko timo cot gi cal pajo; aka jotieko kiri miyo jo nyithindho pajo ma jonywolo ran paka cemo.

³⁸Medo kwoŋ meno jotieko koco kamaleŋ paran i ndelo acel no won to jokoco sabato paran.

³⁹Kole munyo jotieko yaŋo nyithindho pajo ri cal, i ndelo acel no won, jobino i kamaleŋ paran ma koco. Me a gima jotimo i ot paran.

⁴⁰Jolwoŋo kiri cwo jowobin wok bor, m'odhir rijo jamikwenda, to jobino. Ilwokere rijo, igoyo rangi i waŋin, t'iloko kwoŋin maŋon gi thiwino.

⁴¹Ibedo i wi kom ma dwoŋo, gi meza m'oyare ruwaŋe m'iketho i wiye buban paran gi mo paran.

⁴²Dwondi lwak ma kidew oyido jothoko nyano, gi kitipa pa cwo m'okel wok i thim. Joketho amindin i cingi mon kodi Sangarin maŋon i wiy jo.

⁴³Kenyo t'awaco ni, Aha, go olocere gi timo ma cot, to pama go nyalo medirok gi timo malaya pere.

⁴⁴Kucel jotieko donjo kwoŋe, paka cwo jodonjo kwoŋ malaya. Ameno apaka jodonjo i iy Ohola kodi Oholiba, mon ma cot oloyo kor jo.

⁴⁵To jothum banja ma jotiro jolathumo banja loyo jo ro cot kodi oyo remo; rupiri jobedo mon ma jotimi cot aka remo nitie i cingi jo.

⁴⁶Kole Rwoth Were waco ama: “Keli cokirok jowopusa jo, jowoloki jo gi lworo kodi gikinyaga.

⁴⁷Cokirok no lagoyo jo gi telin to joyaŋo jo g'abor pajo; jobino neko nyithindho pajo, to jowaŋo woko udi pajo.

⁴⁸Ameno apaka abino cowo awanya ma timo cot i piny, ŋey mon je jowonyal gwokirok to jobedo ma jok'otimo cot kendo paka witieko timo.

⁴⁹Aka win nyimere ario, ji jolamiyo win gir'acula ro cot mewin, wilabielo gir'acula ro reco mewin ma cot; aka wibino ŋeyo ni An Abedo Rwoth Were.”