Read dhopadhola Ezekiel 24 Bible Online

Ezekiel 24 - dhopadhola bible

Ezekiel 24

¹Wac pa Rwoth obino ran k'apar ma dwe mar'apar i oro mar'abuŋwen:

² Wod dhano, ndiki piny nyingi ndelo me, rupiri me a ndelo ma kere ma Babilon cak'iye thoko ma mako Yerusalem.

³Waci ageca me ri ji paran ma jogwenyirok aka iwaci rijo ni, Rwoth Were waco ama: Jengi dak i mac, aka ikonji pi i iye bende.

⁴Coki muma riŋo, kisi mabeyo je, ma eme kodi mar'aŋakin; ipoŋ gi cokin mabeyo swa.

⁵Or riŋo ma rombo mayom; idhuri kasike i pende. Weyi pi wowal; itedi cokin gi riŋo i iye.

⁶Riameno Rwoth Were waco ama: Kidamba ri tindi madwoŋ pa jonek! Dak manitie gi nyal i iye, aka nyal mere kirum. Muma muma ma ringo i fudh'iye, m'ongoye ma weyi.

⁷Kole remo ma tindi madwoŋ me ooyo nitie i iye; go oketho go i tele m'othangere; go k'okonjo piny ma umo gi lowo.

⁸Ma guro keme paran, ma culo kwor, atieko ketho remo ma go ooyo i wi tele m'othangere ŋey okir wonyali umirok.

⁹Riameno Rwoth Were waco ama: Kidamba ri tindi madwoŋ pa jonek! Alaloko bende kidhur mere madwoŋ.

¹⁰Amedi yen, amoki mac; atedi riŋo maber, aruwi mbinzar i iye, t'aweyo cokin waŋ.

¹¹Jengi go nono i wi cuk mac ŋey wonyali lokirok malieth, nyweny mere woleny i iye to nyal mere ngoye.

¹²Atieko pilok manono; nyal mere m'opoto kilony, doŋ i mac kiri gi nyal mere.

¹³Kucel munyo alonyin i koco perin ma kidakana, ikilokere m'olony i kidakana perin; aka ik'olony kendo cuka anoculi kwoŋin nge paran je.

¹⁴An Rwoth atieko luwo; hongo bino, alatimo gimoro. Ak'owey, akilabedo gi wor aka ak'obedi gi kisa. Cungo kwoŋ yo mewin gi tim mewin alathumo riwin banja, Rwoth Were ama luwo.

¹⁵Rwoth oluwo kodan ka waco ama:

¹⁶Wod dhano, g'adol acel acegin mayin ŋat'imaro tektek. Kucel ikiripi ywak kosa biyo pigi waŋin.

¹⁷Uja nyaliŋliŋ; Ikir'iywak jom'otho. Boy wiyin, aka iruki war perin i tiendin; ikiripi umo yer dhokin ma malo kosa icami cemo ma joywak jocamo.

¹⁸Aluwo gi ji odikin to dhako paran tho othieno. Odikin m'oluwo atimo paka ooran.

¹⁹Kenyo ji jopenjan ni, “Inyalo waco riwan dwoŋ gigipiny me m'itimo riwan?”

²⁰T'adwoko jo ni, “Rwoth oluwo kodan to waco ran

²¹waco ri Joisiraili ni Rwoth Were waco ama: Acegin koco kamaleŋ paran, kwoto ma meni mewin, yodirok ma waŋ win, kodi awanya ma cuny win; aka nyithindho mewin ma wiweyo i Yerusalem ilaneko jo.

²²Onyo wilatimo paka atieko timo. Wikiri wium yer tik win ma malo kosa wicam cemo ma joywak jocamo.

²³Wiripo boyo wiy win to wiruko war mewin; wikiripi ywak kosa biyo pigi waŋ win, to wiripo bolo gicen reco mewin, to widwanyere gi litho ri wadi win.”

²⁴Ameno Ezekiel labedo ranyuth riwin; wilatimo kisi gimoro je paka atieko timo. Ka gime otimere, nyaka to wiŋeyo ni Abedo Rwoth Were.

²⁵Aka in, wod dhano, i ndelo m'anokwany kwoŋ jo cel pajo m'otinda, yom cuny gi dwoŋ pajo, yodirok ma waŋ jo kodi kwoto pajo, kodi nyithindho pajo,

²⁶i ndelo no ŋat'okwale bino dwoko bongi win to waco riwin kwoŋe.

²⁷I ndelo no dhok win bino ŋamere ri ŋat'okwale, wilaluwo m'ongoye ŋat'oliŋ. Wilabedo rijo ranyuth; aka jolaŋeyo ni An Abedo Rwoth.