Read dhopadhola Ezekiel 25 Bible Online

Ezekiel 25 - dhopadhola bible

Ezekiel 25

¹Wac pa Rwoth obino ran ka waco ama:

²Wod dhano, com waŋin kwoŋ Joamon aka ituci wac Were kwoŋ jo.

³Waci rijo ama: Winji win wac pa Rwoth. Rwoth Were waco ama: Kwoŋbedo winyero ot paran munyo okoc, kodi kwoŋ piny Isiraili munyo ojwangi, kodi kwoŋ Joyuda munyo jokidho i piny man.

⁴Kwoŋbedo wisangala, onyo aketho win i cingi nonin ma yuwok ceŋ wibedi apajo. Jolaketho kambin pajo i dier win to jobedo kenyo. Jolacamo olemo mewin to jomadho cak mewin.

⁵Alaloko Raba kakwath ri ŋamin kodi Amon wobedi kaywomirok pa mwendi. Nyaka to wiŋeyo ni An Abedo Rwoth.

⁶Kole Rwoth Were waco ama: Rupiri wigoyo adhoŋ aka wigoyo mayindo to wifore gi ŋol pier je manitie i win kwoŋ piny ma Isiraili,

⁷riameno atieko yaro cingan kwoŋ win, aka alakijala win paka gim'onyaga ri nonin. Alapoko win kwoŋ ji aka alamiyo wisika wok i piny; alareyo win woko. Nyaka to wiŋeyo ni An Abedo Rwoth.

⁸Rwoth Were waco ama: Rupiri Mowab otieko waco ni Yuda cale nonin man je,

⁹riameno acegin yawo badi Mowab kwoŋ tindin madongo wok i kew mere, ŋono ma piny ma Bethyesimoth, Bal Meyon, kodi Kiriathayim.

¹⁰Alamiyo joje kanyacel gi Amon ri ji ma yuwok ceŋ paka gipajo. Ameno Amon kendo k'oŋeyere i dier nonin.

¹¹Alathumo banja kwoŋ Mowab, aka jolaŋeyo nike An Abedo Rwoth.

¹²Rwoth Were waco ama: Rupiri Edom otimo tim ma culo kwor kwoŋ Joyuda aka jotieko lokirok jobanja ma kiwacere ro culo kwor,

¹³riameno Rwoth Were waco ama: Alarieyo cingan kwoŋ Edom, t'apoko go gi ji kodi ogwaŋe, t'ajwango go, wok i tindin madongo Teman tundo kiri Dedan ilaneko woko ji mere.

¹⁴Alaketho culo kwor paran kwoŋ Edom gi cingi ji paran Isiraili; aka jolatic kwoŋ Edom cungo kwoŋ keme paran. Jolaŋeyo culo kwor paran, apaka Rwoth Were waco.

¹⁵Rwoth Were waco ama: Kwoŋbedo Jofilistia jotieko timo tim ma culo kwor, aka gi ŋol pier joreyo woko jokwor pajo;

¹⁶riameno Rwoth Were waco ama: Alarieyo cingan kwoŋ Jofilistia, alaneko woko Jokereth, t'areyo woko jom'odoŋ ma thengi nam.

¹⁷Alaculo kwor madwoŋ kwoŋ jo. Nyaka to joŋeyo ni An Abedo Rwoth, t'ayimo kwor paran kwoŋ jo.