Read dhopadhola Ezekiel 26 Bible Online

Ezekiel 26 - dhopadhola bible

Ezekiel 26

¹I oro mar'apar g'acel, ka ndelo acel ma dwe, wac pa Rwoth obino ran ka waco ama:

²Wod dhano, rupiri ji ma Tire joluwo kwoŋ Yerusalem ni, “Aha, waŋkac pa ji otur, oyengere to yawere ran, alalokere mabup, paka onyo otieko nyekere.”

³Riameno Rwoth Were pa lwak jolweny waco ama: Neni, adakin, awi Tire! Alakelo kwoŋin nonin kweth ma monjin, aka jolabino paka asur ma nam.

⁴Jolareyo woko kor udi ma Tire to joturo piny acurcur mere. Alagweno lowo mere wok kwoŋe, t'aloko go tele m'othangere.

⁵Lalokere kayaro bwo ma ciko i dier nam. Atieko luwo, Rwoth Were waco. Lalokere gikinyaga ri nonin.

⁶Nyithindho mere manyir ma jobedo i piny ilaneko jo g'abor. Nyaka to joŋeyo ni An Abedo Rwoth.

⁷Kole Rwoth Were waco ama: Alakelo kwoŋ Tire wok yumalo kere Nebukadineza ma Babilon, kere pa kerin, kanyacel gi kayinin, cawilin, kodi ji kweth ma jokwaŋo go.

⁸Nyir mewin ma piny, go laneko g'abor. Go lathokin ma makin, to geto cel matek kwoŋin.

⁹Jolaoro wot rombo pajo ma jokwinyo guro kor udi mewin, to joturo piny acurcur mewin gi nywenye pajo.

¹⁰Kayin pere jolamore ma fukefuke pajo laumo win. Kor udi mewin won layengere, ro derino pa cwo pajo ma jogweyo lipangalin gi cawilin, ka go odonji i waŋkace mewin, paka jono ma jodonjo i tindi madwoŋ m'otur.

¹¹Gi par tiendi kayinin pere go lanyono royin mewin je. Go laneko ji mewin je g'abor, aka sirin mewin matek lanyoy piny.

¹²Jolakinyaga lim mewin, to jojowo gigipiny mewin kicar. Jolaturo piny kor udi mewin, to joturo piny udi mewin ma kacuny win. Telin mewin gi mbawin kodi fukefuke mewin jolakonjo i pi.

¹³Alaketho i gike woy ma wer mewin, aka dwondi tongolin mewin k'owinjere kendo.

¹⁴Alaloko win tele ma lwanda, wilabedo kam'iyar'iye bwo. K'ogeti win kendo, kole An Rwoth atieko luwo, Rwoth Were waco.

¹⁵Rwoth Were waco ama ri Tire: Thengi nam k'oyengere i derino ma podho perin, ka joma jolimo litho jodwanyere i litho, ka nekirok medere i dier win?

¹⁶Kenyo jodhum je ma nam jolaweyo kombere pajo ma dhum; jolalunyo lwodo pajo gi nangin pajo makicin. Ilaruko jo gi kirin to jobedo i lowo. Jolakirin kisi hongo, to jobwok tektek kwoŋ win.

¹⁷Jolagoyo ndur kwoŋ win, to jowaco riwin ni, “Ileny nedi awi tindi madwoŋ wok i name, awi tindi madwoŋ m'oŋeyere, ma cango oyido nigi meni kwoŋ nam, in kodi joma bedo i in, ma jokelo lworo, kwoŋ jopiny mere je!

¹⁸Onyo kigodin ma pi kirin, i ndelo perin ma podho; kigodin ma jonitie i nam, rupiri wiwok woko.”

¹⁹Kole Rwoth Were waco ama: K'atieko lokin tindi madwoŋ m'othangere, paka tindin madongo ma kibed'iye, k'anokel pi madwoŋ ma lamwonyin,

²⁰aladhiro win yupiny gi jono ma jotieko loro piny i bur, bongi ji macene. Alamiyo wibedi i pendi piny, paka piny m'ojwangi wok cene, kanyacel gi jono ma jokidho i bur, ŋey wokiri wobedi i in, t'atero ŋono perin i piny pa jomakwo.

²¹Alamiyin lworo ma kiwacere, aka doko ik'obedi, kad'orangin, k'onwaŋin kendo. Rwoth Were ama luwo.