Read dhopadhola Ezekiel 27 Bible Online

Ezekiel 27 - dhopadhola bible

Ezekiel 27

¹Wac pa Rwoth obino ran ka waco ama:

²Wod dhano, goy ndur kwoŋ Tire,

³aka iwaci rigo, go ma bedo i waŋkac ma nam, jamitan pa ji i kigodin kweth, Rwoth Were waco ama: Awi Tire, itieko waco ni, “Aŋon ma kiwacere.”

⁴Kewin perin jonitie i cuny name, joma jogeto in joyikin maŋon.

⁵Jooro mbawin yen mafoth wok i got Hamon; to jokwanyo mbawin ma yath sida wok Lebanon ma timo rin acurcur m'ilang'iye gigipiny.

⁶Wok kwoŋ olwace ma Basan jotimo alith kwon ma cewo ye perin; jotimo pendi ye perin, gi mbawo ma yath payin m'owok i kigodin ma pi ma Sipro, t'iloko maŋon gi lak liec.

⁷Nanga ma mako koyo i ye perin, okwoy gi law mafoth maŋon m'owok Misir. Oyido nenere gi bor, manyabululu g'ariŋo wok i kigodin ma Elisa, oyido obedo gima umin.

⁸Jopiny ma Sidon kodi Arivad, am'oyido jogweyin; cwo perin ma jondijo ma jowok Tire m'oyido jonitie kodin, am'oyido jogweyin.

⁹Jodongo ma Gebal kodi jorieko mere oyido jonitie kodin, am'oyido joyiko mele perin m'onyekere je. Jogwey mele je m'oyido jonitie kodin, oyido jonyewere, bongi jomitan perin.

¹⁰Jolweny ma jowok Pasia, Lud kodi Libia, jotiyo i lweny perin. Joliero kwot pajo gi jungin pajo to jomiyin dwoŋ.

¹¹Jokur perin jowok, Arivad kodi Silisia, aka jolweny ma jowok Gamad, jokuro acurcur perin. Gi kwote pajo, m'olier i kor udi perin thoko, ŋono mewin otundo i kare.

¹²Tarsis otimo kodin mitan wok kwoŋ ŋaŋo perin ma kiwacere; feza, nyweny, nyweny mayom, kodi nyweny ma timo waya ma mac ma jowilo gine lim mewin.

¹³Yavan, Tubal kodi Mesek jotimo kodin mitan; jomiyo win ji pajo g'atewe ma nywenye pajo t'imiyo jo gigipiny perin ma mitan.

¹⁴Itana lim perin ri kayinin ma tic, kayinin ma lweny kodi punde wok Bethtogarma.

¹⁵Nyikway Dedan jotimo kodin mitan. Ji ma kigodin kweth jomiyin lak liec kodi mbawin ma welo t'imiyo jo gigipiny mewin.

¹⁶Ji ma Edom jotimo kodin mitan kwoŋbedo wiŋaŋ, jokelo rin tele ma welo m'oruwo rangi, nanga ariŋo, nanga makicin, law mafoth, nyamicungwa kodi tele ma welo.

¹⁷Yuda kodi piny Isiraili jotimo mitan kodin; jowilo lim mewin gi ŋano m'owok Minith, kal, mo kic, mo oliv kodi binzar.

¹⁸Damasiko otimo mitan kodin ri lim perin kweth kwoŋbedo ŋaŋo perin ma kiwacere ma nger gi nger, vini ma Helbon, kodi yer rombo matar.

¹⁹Vedan kodi Yavan wok Uzal jodonjo i mitan ri nywenye perin; jokelo nyweny, binzar, kodi niaŋ mamit owil gi lim perin.

²⁰Dedan otimo kodin mitan ma nangin ma kwot m'otimi ma gweco.

²¹Piny pa Jowarabu kodi wot kerin ma Keba a jom'oyido imaro loyo i timo mitan i rombo gi diegi; jome je jotimo mitan kodin.

²²Jomitan ma Seba kodi Rama jotimo mitan kodin; jowilo nywenye perin mabeyo kodi binzar perin maber loyo ma nger je, kodi telin ma welo, kodi zahabu.

²³Haran, Kane, Eden, jomitan ma Seba, Asur, kodi Kilimad je jotimo kodin mitan.

²⁴Jome jotimo kodin mitan i nangin m'oyer ayera, i nangin manyabululu gi m'otimi makicin, kodi i kapet ma rangi m'oruwere, m'otwey gi dende t'iyiko maber; i gime jotimo kodin mitan.

²⁵Mele ma Tarsis jowotho riwin i mitan mewin. Ameno apaka opoŋin t'ilokere mapek, i pal cuny name.

²⁶Jocewin, jotieko kelin i pi madongo. Koyo ma yuwok ceŋ otieko turin i cuny name.

²⁷Ŋaŋo perin, nywenye perin, lim perin, jobuk pi perin kodi jogeto perin, jomwon kama modho, joma tiyo rin lim, kodi jolweny perin je ma jonitie kodin, kodi jono je ma jonitie kodin, munyere win i cuny name, i ndelo mewin ma rerok.

²⁸Derino pa jogwey ye ma jomunyere, winjere gi coŋino.

²⁹Kisi ye mogo je onyo ojwangi, aka kisi jagwey mogo je otieko kadho i coŋino.

³⁰Joywak gi geregere swa rin, joywoyo buru i wi jo to joŋindere i buru.

³¹Jocido woko wi jo rin, to joruko kutiya. Cuny jo ŋedhere ka jobiyo pigi waŋ jo.

³²I litho pajo, jowero wer ajore rin ama: Tire, oyido iŋat'idwoŋ loyo, tindin madongo man je. To pama onyo iŋare m'iliŋ nisi i pendi nam.

³³Munyo lim perin obino wok i name, i yeŋo ji kweth; gi ŋaŋo perin ma kiwacere kodi lim perin iŋaŋo kerin ma piny.

³⁴Onyo pama nam joturin, i pendi pi; lim perin kodi ji perin je jotieko munyere i pi kodin.

³⁵Joma jobedo i kigodin je jodhier kwoŋin; aka kerin pajo lworo omako jo swa, nyim jo ojony.

³⁶Jomitan i dier ji jocayin; itieko tundo i gike marac ma kiwacere, aka doko ik'onen cil gi cil.