Read dhopadhola Ezekiel 28 Bible Online

Ezekiel 28 - dhopadhola bible

Ezekiel 28

¹Wac pa Rwoth obino ran ka waco ama:

²Wod dhano, wac ri jadhum ma Tire ni, Rwoth Were waco ama: Kwoŋbedo cunyin opoŋ noro, aka iwaco ni, “Abedo were, abedo i kabedo pa werin, i cuny name.” Kucel ibedo nyaka dhano, makiweno were, makada nende ipima paro perin, gi paro pa were.

³Adieri, iriek loyo Daniel, ongoye nyaliŋliŋ m'opanere kwoŋin.

⁴Gi rieko perin kodi niaŋ perin, iwada lim ri in won, aka icoko zahabu gi feza, i kakan perin.

⁵Gi rieko perin madwoŋ i mitan, itieko medo lim perin, aka cunyin opoŋ gi noro i lim perin.

⁶Riameno, Rwoth Were waco ama: Kwoŋbedo ipima rieko perin, gi rieko pa were,

⁷alakelo jopath kwoŋin, nonin ma jomaker. Jolacelo abor pajo kwoŋ rieko perin maŋon, aka jolakoco ŋono perin.

⁸Jolarwakin piny i bur, aka ilatho, tho malith swa, i cuny nam.

⁹Adieri inowaci kendo ni, “Abedo were.” Ruwaŋ jonek perin, makada nende ibedo nyaka dhano, makiweno were, i cingi jono ma jocwowin?

¹⁰Ilatho paka joma bu Were, gi cingi jopath, kole atieko luwo, Rwoth Were waco.

¹¹Wac pa Rwoth obino ran ka waco ama:

¹²Wod dhano, tiŋi ywak malo kwoŋ kere ma Tire, aka iwaci rigo ni, Rwoth Were waco ama: In iŋat'oyido ibedo gir'anena, m'ipoŋ gi rieko kodi ŋono ma kakare.

¹³Oyido initie i Eden, ndelo pa Were, kisi tele ma welo oyido obedo gium perin. Tele m'obokere obokere, tele manyatongweno, tele manyaboke pendi, tele manyarangi zahabu, tele manyarangi nam, kodi tele m'obokere. Tele matek swa manyabululu, tele manyabululu, kodi tele manyarangi ariŋo. Okedi jo m'ocanere gi zahabu, i ndelo m'ocweyin'iye.

¹⁴Gi kerub m'owir gi mo paka jakur perin, akethin wi got maleŋ pa Were, aka iwotho i dier telin ma mac.

¹⁵Oyido ingoye g'apuse i yo perin, wok i ndelo m'ocweyin'iye, cuka reco onwaŋere i in.

¹⁶I thotho ma mitan perin, ipoŋ g'akaka, aka itimo reco. Riameno ariemin woko paka gimakoc wok i got pa Were, aka kerubim m'oyido kurin oriemin woko, wok i dier telin ma mac.

¹⁷Cunyin opoŋ gi noro kwoŋbedo ŋono perin, iduwo rieko perin ro ŋono perin. Abolin piny, athangin ruwaŋ kerin, jowonenin.

¹⁸Gi reco perin mathoth, i mitan perin ma k'otire, ikoco woko kalamo perin. Ameno acwinyo mac i in won, oreyin woko, aka alokin buru i lowo, ruwaŋ jono je ma jonenin.

¹⁹Jono je m'oyido joŋeyin i dier nonin, jouro kwoŋin, itieko lokere gidhier, aka ikilaneno kendo kicutho.

²⁰Wac pa Rwoth obino ran ka waco ama:

²¹Wod dhano, com waŋin yu Sidon, aka ituci wac Were kwoŋe.

²²Waci ni, Rwoth Were waco ama: Acomere kodin, awi Sidon, aka alalimo dwoŋ i dier in, ji jolaŋeyo ni An abedo Rwoth, k'athumo banja i iye, t'anyutho leŋo paran.

²³Aladhiro i iye two nundu, kodi neki i royin mere, jom'otho jolapodho i diere, g'abor m'ilalweny gine i kisi thenge, aka ji jolaŋeyo ni An abedo Rwoth.

²⁴Ot pa Isiraili kilanwaŋo kendo kudho ma cwowo jo malith i dier jono m'oyido jocayo jo, aka jolaŋeyo ni An abedo Rwoth Were.

²⁵Rwoth Were waco ama: K'atieko coko ot pa Isiraili wok i dier nonin kama jokedher'iye, t'anyutho leŋo paran i jo ruwaŋ nonin, kenyo jolabedo i lowo pajo wegi m'amiyo ŋeca paran Yakobo.

²⁶Jolabed'iye i siem, jolageto udi to jopidho ndelin vini. Jolabedo i siem i iye, k'athumo banja kwoŋ jono ma jocayo jo thoko jo. Kenyo jolaŋeyo ni An abedo Rwoth, Were pajo.