Read dhopadhola Ezekiel 29 Bible Online

Ezekiel 29 - dhopadhola bible

Ezekiel 29

¹Wac pa Were obino ran k'apar g'ario ma dwe mar'apar i oro mar'apar ka waco ama:

²Wod dhano, com waŋin kwoŋ Farawo, kere ma Misir, aka ituci wac Were kwoŋ go kodi Misir gibe.

³Luw, aka iwaci ni, Rwoth Were waco ama: Acomere kodin, awi Farawo kere ma Misir, bulir madwoŋ ma nam, ma bedo i dier jangi Nayil, ka waco ni, “Nayil obedo aparan won, an aŋat'atimo.”

⁴Alaketho i dingin siraget, aka alamiyo rec ma jangin moko kwoŋ magambala perin. Alawodhin malo wok i jangin, gi rec je ma jangin, ka jomoko kwoŋ magambala perin.

⁵Alajwangin i thim, in kodi rec je ma jangin, wilapodho kam'othangere, aka kilaomo win kosa coko win. Atieko miyin paka cemo, ri ogwaŋe ma piny kodi winyin ma koyo.

⁶Kenyo ji ma jobedo i Misir je, jolaŋeyo ni An Abedo Rwoth, kwoŋbedo oyido ibedo luth midole, ri ot pa Isiraili.

⁷Munyo jomako win gi cingi jo, wituro woko, aka wijako badi jo. Munyo jogoŋere kwoŋ win, wituro woko, to wilwogo bam jo.

⁸Riameno, Rwoth Were waco ama: Alakelo abor kwoŋ win, aka alaneko woko ji kodi ogwaŋe.

⁹Lowo ma Misir lalokere kam'ojwangere. Kenyo jolaŋeyo ni An Abedo Rwoth. Kwoŋbedo iwaco ni, “Nayil obedo aparan, aka an aŋat'atimo.”

¹⁰Riameno acomere kodin, kodi jangin, aka alaloko lowo ma Misir gunda, wok i Migdol tundo kiri i Siyene bor kiri i kew gi Ethopiya.

¹¹Ongoye dhano kosa ogwaŋ ma laluw'iye, labedo m'ojwangere ma oro piero aŋwen.

¹²Alamiyo lowo ma Misir bedo m'othangere kwoŋ lowo je kodi tindin madongo pere doŋ gundin loyo tindin madongo je ma oro piero aŋwen.

¹³Rwoth Were waco ama: I cowe ma oro piero aŋwen, alacoko Jomisir kama jokedher'iye i dier nonin koro.

¹⁴Aladwoko lim pa Misir, t'adwoko jo i lowo ma Pathiros, kama jowok'iye, aka jolabedo ker mamwol.

¹⁵Misir labedo ker mamwol loyo kerin je, ma jokilatiŋere malo kendo kwoŋ nonin man. Alamiyo jo bedo masisiri ma jokiladhumo i dier nonin.

¹⁶Isiraili kilagoŋere kwoŋ Misir kendo ri kony. Adieri ka Joisiraili jopoy gim'otimere ri Jomisir, jolaŋeyo komo pajo i rango kony wok bongi win, aka ni An Abedo Rwoth.

¹⁷Wac pa Rwoth obino k'acel ma dwe marapena i oro ma piero ario g'ario ka waco ama:

¹⁸Wod dhano, kere ma Babilon omonjo Tire. Go miyo jolweny pere kinyaga i thotho ma wic jo olokere pata to badi jo lwogere, kucel kere kosa jolweny pere jok'olimo magowa ma olo pajo.

¹⁹Riameno, Rwoth Were waco ama: Neni ee, acegin miyo Nebukadineza kere ma Babilon lowo ma Misir. Go lamonjo to nyaga woko lim ma Misir paka cul pa jolweny pere.

²⁰Amiyo go cul pere m'otiyo rigo. Atieko miyo go lowo ma Misir kwoŋbedo jotiyo ran, Rwoth Were waco.

²¹I ndelo no, alamiyo Joisiraili bedo matek, aka alalokin jaluwo pajo. Kenyo Joisiraili jolaŋeyo ni An Abedo Rwoth.