Read dhopadhola Ezekiel 3 Bible Online

Ezekiel 3 - dhopadhola bible

Ezekiel 3

¹Were owaco ran ni, “Wod dhano, gima omiyin, cami, cami papila m'omin, aka kadhi iluwi gi ot pa Isiraili.”

²Ameno ayawo dhokan, to go miyan acamo papila m'omin no.

³Go owaco ran ni, “Wod dhano, cami papila m'omin m'amiyin, aka poŋ koko i iyin gine.” Kenyo acamo; aka obedo mamit i dhokan paka mo kic.

⁴Go owaco ran ni, “Wod dhano, kadhi i ot pa Isiraili, aka iluwi wac paran rijo.

⁵Kole akiorin bongi ji ma joluwo dhodhok ma kiniaŋere kosa ma ikiniaŋ wac pajo, to bongi ot pa Isiraili.

⁶Akiorin bongi nonin kweth, ma joluwo dhodhok ma kiniaŋere kodi ma lew jo pek ma ikinyal niaŋ wac pajo. Adieri, ka bedi oyido aorin bongi jo, dinyo jowinjin.

⁷To ot pa Isiraili jokilawinjin, kole jokwero winjan; kwoŋbedo jobedo jowictek aka jonitie gi cuny matek.

⁸Neni, ee amiyo waŋin bedo matek paka waŋ jo, kodi bedo gi wictek paka jo.

⁹Paka tele matek loyo, tele mabith, atieko timo nyimin, aka Ikir'ilwor jo kosa idhier ro neno pajo; kole jobedo ot ma jogwenyirok.”

¹⁰Go owaco ran ni, “Wod dhano, Wac paran je m'aluwo rin jol i cunyin aka winji gi ithin.

¹¹Kadhi bongi jotwec, bongi ji perin iluwi gi jo. Waci rijo ni, ‘Rwoth Were waco ama.’ Makada nende jowinji kosa jokwer.”

¹²Kenyo cuny otiŋan malo, aka awinjo derino ma mor yuŋeyan ka waco ama: Dwoŋ pa Rwoth wopak i kabedo me.

¹³Awinjo derino ma bwombi cwec makwo ka jogeyere bwombi gin kwoŋ bwombi man, kodi derino ma lipangala i thengi jo, derino ma mor madwoŋ.

¹⁴Cuny otiŋan malo, to kwanyan woko. Awinjo keco i cunyan, aka cingi Rwoth obedo matek kwoŋan.

¹⁵Abino bongi jotwec i Telabib, m'oyido jobedo i thengi malawa Kebar, aka adoŋ kenyo i dhier i dier jo ma ndelo abirio.

¹⁶I cowe ma ndelo abirio, wac pa Rwoth obino ran, ka waco ama:

¹⁷Wod dhano, akethin bedo jakur i ot pa Isiraili, ilawinjo wac ma wok i dhokan, aka ilagwoko jo kwoŋan.

¹⁸K'awaco ri jokidakana ni, “Ilatho adieri.” T'iweyo m'ikigwoko jo, kosa iluwo gi jo weyo tim ma kidakana pajo, jokidakana no jolatho ro reco pajo, to remo pajo ladoŋ i cingin.

¹⁹To k'igwoko jokidakana, to jokwero wire kwoŋ kidakana pajo, kosa tim ma kidakana, jolatho, to ri in, labedo nike ibotho kwo perin.

²⁰Ka ŋata timo gim'otire owire to timo gima k'otire, aka anoriwere ruwaŋe, jolatho, kwoŋbedo ikigwoko jo, jolatho ro reco pajo, kilapoyo tim pajo m'otire je; to remo pajo ladoŋ i cingin.

²¹To k'igwoko ŋata timo gim'otire weyo ma k'otimo reco, aka jowey ma jok'otimo reco, jolakwo adieri, aka ri in, labedo nike ibotho kwo perin.

²²Cingi Rwoth oyido nitie kwoŋan kenyo, aka go owaco ran ni, “Ay malo, ikadhi i milelo, aka alaluwo kodin kenyo.”

²³Ameno aay malo, aka akidho i milelo. Dwoŋ pa Rwoth ocungo kenyo, paka dwoŋ m'oyido atieko neno i thengi malawa Kebar; aka agore piny gi nyiman.

²⁴Cuny odonjo i an, omiyan cungo gi tiendan; aka go oluwo kodan to waco ran ni, “Kadhi icegere i ot perin.

²⁵Paka ri in, wod dhano, ilaketho kwoŋin adasin, t'itweyin gine, ŋey ikir'iwok woko i dier jo.

²⁶Alamiyo lewin womok i dandin, ŋey luwo wodhierin, aka ikir'ibwoki jo, kole jobedo ot ma gwenyirok.

²⁷To ka aluwo kodin, alayawo dhokin, aka ilawaco rijo ni, ‘Rwoth Were waco ama.’ Ŋata lawinjo, owinji, to ŋat'okwer winjo, wokwer; kole jobedo ot ma gwenyirok.”