Read dhopadhola Ezekiel 30 Bible Online

Ezekiel 30 - dhopadhola bible

Ezekiel 30

¹Wac pa Rwoth obino ran ka waco ama:

²Wod dhano, tuci wac Were aka iwaci ni Rwoth Were waco ama. Koki ni kidamba, kole ndelo otundo!

³Kole ndelo orikere, ndelo pa Rwoth cegin, labedo ndelo ma pondeponde, hongo ma kisika ri nonin.

⁴Lweny labedo i Misir, aka litho madwoŋ labedo i Ethopiya. K'ineko ji i Misir, t'itiŋo woko lim pere, t'ituro woko misingi mere.

⁵Ji ma Ethopiya kodi Put, Ji ma Lud kodi jopath je ma Libia, kodi ji ma piny ma jotimo cikirok, jolatho g'abor.

⁶Rwoth Were waco ama: Jono ma jothielo Misir jolatho, kodi noro ma meni pere; wok i Migdol tundo i Siyene, ji jolatho i iye g'abor, Rwoth Were waco.

⁷Jolajwangere i dier piny ma jothangere, tindin madongo pajo ladoŋ gundin, i dier tindin madongo man ma jodoŋ gundin.

⁸Kenyo jolaŋeyo ni An Abedo Rwoth, k'anocwiny mac i Misir, to jokony pere je jotho.

⁹I ndelo no, aladhiro jomikwenda i mele bwoko Joethopiya ma jokuya, aka litho lapodho kwoŋ jo i ndelo ma kisika pa Misir. Kole eno bino.

¹⁰Rwoth Were waco ama: Alareyo woko woy pa ji ma Misir, gi cingi Kere Nebukadineza ma Babilon.

¹¹Go kodi ji pere, nono ma jogway loyo, ilakelo jo reyo woko lowo, aka jolacelo abor pajo kwoŋ Misir, to jopoŋo piny gi jom'otho.

¹²Alathwo woko Nayil, t'atana lowo i cingi jokidakana. Alareyo woko lowo kodi gima nitie i iye je, gi cingi jopath, An Rwoth atieko luwo.

¹³Rwoth Were waco ama: Alareyo woko calin, t'acowo woko calin ma bukony i Memfis. Kendo kilabedo jadhum i lowo ma Misir, i nger no alaketho lworo i lowo ma Misir.

¹⁴Alareyo woko Pathiros, aka alacwinyo mac i Zowan, t'athumo banja ri tindi madwoŋ Thebes.

¹⁵Alakonjo keme paran kwoŋ tindi madwoŋ Sin, kapondo pa Misir, aka alareyo woko woy pa ji ma Thebes.

¹⁶Alacwinyo mac i Misir, aka Sin labedo i kumo madwoŋ adieri. Thebes latur woko, aka jolaromo gi jokwor ma Memfis odieceŋ.

¹⁷Yac ma Pibeseth jolatho g'abor, aka tindin madongo jolakadho i twec.

¹⁸Mudho labedo odieceŋ i Tehafinehes, k'anotur kenyo dhum pa Misir, aka meni ma noro pere larumo. Pondeponde laumo tindi madwoŋ, aka ilatero ji mere i twec.

¹⁹Alathumo banja i Misir, aka jolaŋeyo ni An Abedo Rwoth.

²⁰K'ario ma dwe marapena, i oro mar'apar g'acel, wac pa Rwoth obino ran ka waco ama:

²¹Wod dhano, atieko turo woko badi kere ma Misir. Neni k'otwey ni wocangi kosa ni wolokere matek ma mako abor.

²²Riameno, Rwoth Were waco ama: Neni ee, amon gi kere ma Misir, aka alaturo woko bade je, bade matek kodi m'aturo, aka alamiyo abor wopodhi wok i cinge.

²³Alakedho woko Jomisir i dier nonin, aka alaywoyo jo i dier piny.

²⁴Alaloko matek badi kere ma Babilon, aka alaketho abor paran i cinge. To alaturo woko badi kere ma Misir aka go lakiuja ruwaŋ kere ma Babilon paka ŋat'omiy litho swa.

²⁵Alaloko badi kere ma Babilon matek, to alaturo woko badi kere ma Misir. Kenyo jolaŋeyo ni An Abedo Rwoth. Alaketho abor paran i cingi kere ma Babilon, aka go lacelo kwoŋ lowo ma Misir.

²⁶Alakedho woko Jomisir i dier nonin, t'aywoyo jo i dier piny. Kenyo jolaŋeyo ni An Abedo Rwoth.