Read dhopadhola Ezekiel 31 Bible Online

Ezekiel 31 - dhopadhola bible

Ezekiel 31

¹K'acel ma dwe mar'adek i oro mar'apar g'acel ma twec mawan, wac pa Rwoth obino ka waco ama:

²Wod dhano, wac ri Farawo kere ma Misir kodi ji pere je ama: Ŋa m'ical gine i dwoŋ!

³Par kwoŋ Asiria, m'oyido cal yath sida i Lebanon, gi jange maŋon, kodi lul ma timo tipo, mabor swa tundo i polo.

⁴Pi omiyo yath no dongo, aka pi ma malawa omiyo go cemo.

⁵Riameno odongo mabor, loyo yen je madudi. Jange mere odongo m'oyare mabor.

⁶Winyin ma pendi polo je, jogeto od gin i jange. Ogwaŋe madudi je jonywol i tiende, aka nonin madongo je jobedo i tipo mere.

⁷Yath oyido ŋon i dwoŋo mere, i boro ma jange mere. Fuc mere oroc piny, i pi mathoth.

⁸Yen sida ma ndelo pa Were oyido kipimere gine, kosa kada yath m'odongo mabor kirom gine. Yen maboyo ma boke mere pando oyido josisiri kwoŋ jange. Ongoye yath i ndelo pa Were, m'oyido cal gi ŋono mere.

⁹Atimo maŋon gi jange kweth. Yen je ma ndelo Eden, ndelo pa Were jomako gine nyeko.

¹⁰Riameno Rwoth Were waco ama: Kwoŋbedo odongo to jange cwayo maboyo, oketho noro i boro pere.

¹¹Alamiyo jo i cingi jadhum pa nonin, aka adieri go latimo rigo gima ripo gi kidakana pere. Atieko bolo woko.

¹²Jopath ma jowok i nonin ma joger swa jolatoŋo woko to joweyo. Jange lapodho wi gote gi milelin je, aka kasike mere lariere i kisi pi ma piny. Nonin je ma piny joeye woko i tipo mere aka jojwango.

¹³Winyin jogeto i kore m'otur, aka ogwaŋe madudi jonindo i jange mere.

¹⁴Gime je obedo ŋey wongoye yen ma jodongo i thengi pi ma wodoŋ mabor swa kosa withe wotundi i pondeponde. Kole joje joripo tho, kadho piny i lowo, kanyacel gi ji, gi jono ma jokadho piny i Bur.

¹⁵Rwoth Were waco ama: I ndelo ma yath no okadho i piny pa jom'otho, aumo piny i lutho. Acego malawin mere, aka pi mere ocule. Akelo mudho i Lebanon, aka yen je ma lul jothwo kwoŋbedo yath no.

¹⁶Amiyo nonin kirin ro derino ma podho pere munyo akelo i piny pa jom'otho kanyacel gi joma kadho piny i Bur. Yen je ma ndelo Eden, maber loyo i Lebanon, ma jolimo pi maber, joyomo cuny gin i piny.

¹⁷Jo bende jokadho i piny pa jom'otho kanyacel gine, bongi jono m'oneki jo g'abor, kanyacel gi jokony pere, jono ma jobedo i tipo mere i dier nonin.

¹⁸Yath mene kwoŋ yen ma ndelo Eden m'oyido cal kodin i dwoŋ kodi meni? Onyo pama ilapodho kanyacel gi yen ma ndelo Eden i lowo piny. Ilariere piny kanyacel gi ji ma jok'othumere, ji m'oneki g'abor. Meno Farawo kodi ji pere je, Rwoth Were waco.