Read dhopadhola Ezekiel 32 Bible Online

Ezekiel 32 - dhopadhola bible

Ezekiel 32

¹K'acel ma dwe mar'apar g'ario i oro mar'apar g'ario, wac pa Rwoth obino ran ka waco ama:

²Wod dhano, maki kumo kwoŋ Farawo kere ma Misir, aka iwaci rigo ama: Iparo ni ibedo simbwor i dier nonin, t'icalo kodi bulir i name; iyare i pi perin ma mol, icando pi gi tiendin, t'iduwo pi perin ma mol.

³Rwoth Were waco ama: I kacokirok pa ji kweth, alabolo katimba paran kwoŋin; aka ilaywayin i katimba paran.

⁴Alafodin piny, alabolin i kisawe m'oŋamere, Alamiyo winyin je ma koyo jowopie kwoŋin, aka alaweyo ogwaŋe mager ma piny gipi jowopidhere kodin.

⁵Alaketho del perin wi gote, t'apoŋo milelo gi mulambo perin.

⁶Alapoŋo piny gi remo perin ma mol tundo wi gote, aka jwombe jolapoŋ kodin.

⁷K'atieko reyi woko, alaumo polo, t'aloko micalin pajo m'ocido; alaumo waŋceŋ gi pondeponde, aka dwe k'oliel.

⁸Lero je ma polo, alaloko mudho i wiyin, t'aketho mudho i piny perin.

⁹Alaŋedho cuny ji mathoth, k'akelo win paka jotwec i dier nonin, i piny ma fodi wikuya.

¹⁰Alamiyo ji mathoth jowodhier kwoŋ win; kerin pajo jolakirin kwoŋbedo win. K'anowiti abor paran ruwaŋ jo, jobino kirin kisi hongo ro kwo pajo, kisi acel acele, i ndelo m'ilapodh'iye piny.

¹¹Kole Rwoth Were waco ama: Abor pa kere ma Babilon bino kwoŋin.

¹²Alamiyo lwak perin wopodhi, g'abor pa jolweny apondi, joje ma jobedo joma kiwacere i dier nonin. Jolaloko gundin delok pa Misir, aka Lwak pere je bino rere woko.

¹³Alareyo woko mwendi pajo wok i thengi pi kweth; aka ongoye par tiendi dhano ma doko bino cando jo, ongoye par tiendi dhok m'ocandi jo.

¹⁴Kenyo nyaka alaloko pi pajo m'olony, t'amiyo jwombe pajo ma mol womol paka mo, Rwoth Were waco.

¹⁵K'anojwangi piny ma Misir t'iwaro woko kisi gimoro je ma umo piny, k'anorwadhi piny jono je ma jobed'iye, nyaka jolaŋeyo ni An Abedo Rwoth.

¹⁶Me kumo; ibino wero. Mon pa nonin jolawero. Jolawero kwoŋ Misir kodi lwak mere, Rwoth Were waco.

¹⁷I oro mar'apar g'ario, i dwe mar'acel k'apar g'abic, wac pa Rwoth obino ran:

¹⁸Wod dhano, goy ndur kwoŋ Lwak ma Misir, aka idhiri jo piny, Misir kodi nyithindho manyir pa nonin ma jomeni, i pendi piny gi jono ma jokidho piny i bur.

¹⁹Ipenji jo ni “Iloyo ŋa i ŋono? Kadhi piny! Woyikin gi joma bu Were!”

²⁰Jobino podho i dier jono m'ineko jo g'abor. Otiek miyo Misir ri abor; tiŋi woko go kodi lwak mere.

²¹Jotel ma jomeni jolaluwo kwoŋ jo, gi jokony pajo, wok i dier piny pa jom'otho. Jotieko bino piny, joŋare matek, joma bu Were m'oneki jo g'abor.

²²Asiria nitie kenyo, lwak pere je, kaliele pere je jothoko go, oneki joje, jopodho g'abor.

²³Ojengi kaliele pajo iy'adec mabor swa ma bur. Kitipa pere othoko kaliele mere, oneki joje, jopodho g'abor, jo ma jokelo lworo i piny pa jom'otho.

²⁴Elam nitie kenyo, kodi Lwak pere je thoko kaliele mere; oneki joje, jopodho g'abor, jo ma jokidho piny ma jok'othumere i pendi piny, jo ma jokelo lworo i piny pa jomakwo. Jobielo wickwot pajo gi jono ma jokidho piny i bur.

²⁵Jotieko loko Elam kitanda i dier jom'onek gi kweth mere je, kaliele pajo thoko, joje joma bu Were, m'oneki jo g'abor; rupiri lworo ma jokelo oyido olak i piny pa jomakwo, aka jobielo wickwot pajo gi jono ma jokidho piny i bur; iketho jo i dier jom'onek.

²⁶Mesek kodi Tubal jonitie kenyo, gi kweth pajo je, gi kaliele pajo thoko jo, joje joma bu Were m'oneki jo g'abor; rupiri jokelo lworo i piny pa jomakwo.

²⁷Jokiŋare gi jolweny apondi ma joma bu Were ma jokidho i piny pa jom'otho gi gilweny pajo, abore pajo m'oyido okethi i ŋut jo, jo ma reco pajo nitie i cokin pajo; rupiri lworo ma jolweny apondi jokelo oyido nitie i piny pa jomakwo.

²⁸Ilaturin t'iŋare i dier joma bu Were, gi jono m'ineko jo g'abor.

²⁹Edom nitie kenyo, kerin mere kodi wot kerin mere je, joma ro meni pajo je iyiko jo gi jono m'oneki jo g'abor; joŋare kodi joma bu Were, gi jono ma jokidho piny i bur.

³⁰Jodhum je ma yumalo jonitie kenyo, kodi Josidon je, ma jotieko kadho piny i wickwot gi jom'onek, ro lworo je ma jokelo gi meni pajo. Joŋare gi kafiri pajo gi jono m'ineko jo g'abor, to jobielo wickwot pajo gi jono ma jokidho piny i bur.

³¹Ka Farawo onen jo, cunye bino kwe kwoŋbedo Lwak pere je, Farawo gi jolweny pere je, m'oneki jo g'abor, Rwoth Were waco.

³²Rupiri go onyayo lworo i piny pa jomakwo; riameno ibino yiko go i dier joma bu Were, gi jono m'ineko jo g'abor, Farawo kodi kweth pere je, Rwoth Were waco.