Read dhopadhola Ezekiel 33 Bible Online

Ezekiel 33 - dhopadhola bible

Ezekiel 33

¹Rwoth owaco ran ni:

²Wod dhano, luw gi ji perin, iwaci rijo ni, k'anokel abor kwoŋ piny no, to jopiny jodimo ŋati mogo kwoŋ jo paka jakur,

³to ka ŋato oneno ka abor bino kwoŋ ji to kudho gwara ka gwoko ji;

⁴kenyo ka ŋati mogo m'owinji dwondi gwara okwer gwokirok, t'abor bino to kwanyo ŋato woko, remo pere labedo i wiy go won.

⁵Go owinjo dwondi gwara, to k'onyalo gwokirok, d'obotho kwo pere.

⁶To ka jakur oneno abor bino, aka k'onyalo kudho gwara, to ji jobedo ma jok'ogwokere, t'abor tundo, to kwanyo mogo kwoŋ jo; ŋato kadho ro reco pere, to remo pere alakibanja kwoŋ jakur no.

⁷Riameno, wod dhano, atieko lokin paka jakur ma ot pa Isiraili; kisi k'iwinjo wac ma wok i dhokan, iripo gwoko jo ma wok bongan.

⁸K'iwaco ri jakidakana, a jakidakana me, adieri ilatho, t'ibedo ma ikigwoko jakidakana no wok i yo pere no, jakidakana no latho i reco pere to remo pere abino kibanja i cingin.

⁹To k'igwoko jakidakana ni wowire wok i yo pere, to kwero wire i yo no, to tho i reco pere, to kareno itieko botho kwo perin.

¹⁰Rwoth owaco ran ama: To in wod dhano wac ri ot pa Isiraili, witieko waco ama: “Kibenga mawan kodi reco joturo wan woko, aka onyo wanyekere kwoŋbedo jo. Onyo wanokwo nedi?”

¹¹Waci rijo ni, Paka akwo, Rwoth Were waco, angoye gi siem i tho pa jakidakana, to ni jakidakana wowire i yo pere marac to kwo. Wire wok i yo perin marac; raŋo iripo tho, awi ot pa Isiraili?

¹²To in wod dhano, wac ri ji perin, ŋati ma jatiro kwoŋ jom'otire kilabotho jo ka jobenga; aka ri jakidakana maloyo jokidakana, k'omiy jo cer ka jowire wok i kidakana pajo, aka ŋat'otire k'onyal kwo gi tiro pajo ka jotimo reco.

¹³Kad'awaco ri jom'otire ni adieri jolakwo, kucel ka go ogen'agena tiro pere to timo reco, ongoye tim ma tiro pajo m'ilapoyo; to i reco pajo ma jotieko timo, jolatho.

¹⁴Odoko, kad'awaco ri jakidakana ni, “Adieri ilatho.” Kucel ka go owire wok i reco pere to timo gima cik waco aka otire,

¹⁵ka jakidakana odwoko gim'ociko, ka jodwoko gima jokwalo, to joluwo i cik ma kwo, ka kitim reco mogo je, go lakwo adieri, go k'otho.

¹⁶Kilapoyo reco mogo je ma go otieko timo; rupiri go otieko timo gima cik mito, gim'otire, go lakwo adieri.

¹⁷Kucel ji perin jowaco ama: Royo pa Rwoth k'otire, ma to kere royo pajo ama k'otire.

¹⁸Ka ŋat'otire oweyo royo pere ma tiro, to timo reco, go latho ro reco no.

¹⁹Aka ka jakidakana owire wok i kidakana pere, to timo gima cik waco, m'otire, go lakwo ro gino.

²⁰Kucel wiwaco ni, “Royo pa Were k'otire.” Awi ot pa Isiraili, alathumo banja ri kisi ŋat'acel acele cungo kwoŋ tim pere.

²¹I oro mar'apar g'ario ma twec mawan, i dwe mar'apar g'abic, nyatoro mogo m'oyido okwale wok Yerusalem obino bongan to waco ran ni, “Tindi madwoŋ me otieko podho.”

²²Onyo pama cingi Rwoth otieko bedo kwoŋan othieno mafodi jokwalok me jok'obino; aka oyido atieko yawo dhokan i hongo ma jalo obin'iye bongan odikin; kole dhokan oyido oyawere, aka akibedo obadha kendo.

²³To Rwoth doko waco ran ama:

²⁴Wod dhano, ji ma jobedo i kabedo m'onyekere i piny ma Isiraili jomena waco ni, Abraham am'obedo ŋat'acel kende, kucel onwaŋo lowo; to pama onyo wathothi; adieri lowo omiy wan ni wabed'iye.

²⁵Riameno wac rijo, Rwoth Were waco ama: Wicamo riŋo gi remo, to witiŋo waŋ win malo ri cal mewin, aka wineko ji; winoloki lowo mewin?

²⁶Wigeno abor, witimo gir'amien aka kisi ŋat'acel acele kwoŋ win koco cipa nyawote; onyo ameno, winoloki lowo mewin?

²⁷Onyo ilawaco rijo ama: Rwoth Were waco ama: Paka fodi akwo, jono ma jobedo i kabedo m'onyekere no, jolapodho g'abor; aka ŋata nitie iy'abar alamiyo ogwaŋe mager jowocuti; aka jono ma jonitie i kapondo matek kodi i ŋungu, jolatho two nundu.

²⁸Alaloko lowo marac m'ongoye kony; aka kwoto pere ma meni bino tundo i gike; gote ma Isiraili jolalokere m'osika ma nyatoro k'onyal luw'iye.

²⁹Nyaka jobino ŋeyo ni An Rwoth, k'atieko loko lowo m'osika m'ongoye kony ro amien pajo je ma jotieko timo.

³⁰To ri in, wod dhano, ji perin ma joluwo kwoŋin kanyacel i kor udi gi dhiot udi pajo, ka joluwo kisi ŋat'acel gi nyawote, omin g'omin ni, “Biye winji nger wac ma wok bongi Rwoth.”

³¹Jobino bongin paka ji jobino, jobedo ro nyim win paka ji paran, aka jowinjo wac mewin, to jok'owor jo. Kole jonyutho mar mathoth gi dhok jo, to cuny gin nitie i magowa pajo.

³²Ri jo icale kodi ŋati ma wero wer ma mitirok gi dwondi mamit, aka gido thum maber, rupiri jowinjo gim'iwaco, to jokitim.

³³Ka gime obino aka latimere, nyaka jolaŋeyo ni jatuci wac Were owok bedo i dier jo.