Read dhopadhola Ezekiel 34 Bible Online

Ezekiel 34 - dhopadhola bible

Ezekiel 34

¹Rwoth oluwo kodan.

²Go owaco ni, “Wod dhano”, Kwedere kwoŋ jokwath ma Isiraili: Ituci rijo wac Were ni: Rwoth Were waco ama: A, win jokwath ma Isiraili, wiwegi wipidhere! Jokwath jokiripi pidho rombo?

³Wicamo bor, wiruko nangin ma yer rombo, withumo mwendi; to wikipidhi rombo.

⁴Wikimedo meni ri ma meni oloyo jo, wikibotho ma jotwo, wikitweyo wonga ri ma jotur, wikidwoko ma joweyo yo, wikidwaro ma jorwenyo, to gi mbaka kodi gwayo witieko dhumo jo.

⁵Onyo rombo paran jokedhere, rupiri jakwath ongoye; to jokedhere, jolokere cemo ri ogwaŋe mager madudi.

⁶Okedhi rombo paran, joyiya piny wi gote je kodi i wi kisi tendere mabor. Okedhi rombo kisi kamoro je ma piny, m'ongoye ŋat'orangi kosa odwar jo.

⁷Riameno win jokwath, winji win wac pa Rwoth:

⁸Paka akwo, Rwoth Were waco, rupiri rombo paran jolokere gir'acama, aka rombo paran jolokere cemo ri ogwaŋe mager madudi je, paka oyido jakwath ongoye; aka rupiri jokwath paran jodak rango rombo paran, to jopidhere ayino, to jokwero pidho rombo.

⁹Riameno, win jokwath, winji win wac pa Rwoth:

¹⁰Rwoth Were waco ama: Alokere jakwor pa jokwath; aka alakwanyo woko rombo paran i cingi jo, t'acero jo pidho rombo paran; jokwath jok'opidhere kendo. Alabotho rombo paran wok i dhok jo, ŋey jokiri jobedi cemo rijo.

¹¹Kole Rwoth Were waco ama: An won gipi aladwaro mwendi paran.

¹²Paka jakwath dwaro mwendi pere ka jonitie i dier mwendi pajo m'okedhere, ameno apaka aladwaro rombo paran. Alabotho jo i kabedo je m'okedh'iye jo i ndelo ma pondeponde kodi ma mudho m'opoto.

¹³Alafudho jo woko wok bongi ji t'acoko jo wok i piny, t'akelo jo i piny pajo won; aka alakwayo jo wi gote ma Isiraili, cegin gi thengi pi, kodi kama bedere ma piny.

¹⁴Alapidho jo gi lum maber, aka kam'oŋawere ma gote ma Isiraili labedo lum pajo; jolanindo kenyo i lowo ma kakwath maber, aka jolapidhere gi lum m'oloth wi gote ma Isiraili.

¹⁵An won alabedo jakwath pa rombo paran, aka alamiyo jo nindo piny, apaka Rwoth Were waco.

¹⁶Aladwaro ma jorwenyo, t'adwoko ma jolera, aka alatweyo wonga ri ma jotur, t'adwoko meni ri ma meni oloyo jo, to alareyo woko ma jocwe kodi ma jotek. Alakwayo jo gi tiro.

¹⁷Paka riwin awi mwendi paran, Rwoth Were waco ama: Alathumo banja i dier rombo gi rombo, i dier wot rombo kodi diegi.

¹⁸Obedo gimathin riwin ma pidhirok gi lum maber, winyono piny gi tiendi win kiri lum mewin man ma wikicam. Ka wimadho pi m'olony, ripo widuw megi gi tiendi win?

¹⁹Aka onyo mwendi paran joripo camo gima witieko nyono gi tiendi win, gi madho gima witieko duwo gi tiendi win?

²⁰Riameno, Rwoth Were waco ama rijo: An won gipi alathumo banja i dier rombo ma cwe kodi rombo mamok.

²¹Rupiri widhiro githenge kodi badi win, to wiguro ma meni oloyo jo je gi tungi win cuka wikedho jo bor bor.

²²Alabotho mwendi paran, aka ak'oyey wocandi jo kendo; aka alathumo banja i dier rombo gi rombo.

²³Alajengo kwoŋ jo jakwath acel, ŋeca paran Daudi go lakwayo jo, go lakwayo jo to bedo jakwath pajo.

²⁴Aka an, Rwoth, alabedo Were pajo. Ŋeca paran Daudi labedo wod kere i dier jo; An, Rwoth atieko luwo.

²⁵Alatimo gi jo cikirok ma siem t'awaro woko ogwaŋe mager wok i piny, ŋey jowonyal bedo i thim to jonindo i lule m'ongoye teko.

²⁶Alaloko jo kodi adec m'othoko tendere paran silwany; aka aladhiro rijo koth i hongo mere ma ripo; labedo rijo koth ma silwany.

²⁷Yen ma ndelin jolanyak olemo pajo, aka gigipiny labedo i piny. Jolabedo ma bu teko i lowo pajo; aka jolaŋeyo ni An Abedo Rwoth, k'aturo woko nyweny ma bieto pajo, t'abotho jo i cingi jono ma joloko jo ŋecin.

²⁸Jok'olokere gikinyaga ri nonin kendo, kosa ogwaŋe ma piny k'ocami jo; jolabedo ma bu teko, aka ŋati mogo k'oloki jo malwor.

²⁹Alamiyo jo kafur maber ŋey kec wokiri woneki jo i piny, aka jokiri jocandere kendo yet pa nonin.

³⁰Jolaŋeyo ni An, Rwoth Were pajo, anitie gi jo, aka ni jo, ot pa Isiraili, jobedo ji paran, apaka Rwoth Were waco.

³¹Wibedo rombo paran, rombo ma lum paran, aka abedo Were mewin apaka Rwoth Were waco.