Read dhopadhola Ezekiel 35 Bible Online

Ezekiel 35 - dhopadhola bible

Ezekiel 35

¹Rwoth oluwo kodan.

²Go owaco ama: Wod dhano com waŋin kwoŋ piny ma Edom aka ituci wac Were paran kwoŋe.

³Waci ri ji ni, Rwoth Were waco ama: Amoni gi win, gote ma Edom! Ayaro cingan kwoŋ win ma loko win gim'ojwangi kodi gima bukony.

⁴Alaloko tindin mewin madongo gundin wilalokere gim'ojwangi, aka wilaŋeyo ni An Abedo Rwoth.

⁵Rupiri wibedo mere pa jakwor macene, to wimiyo ineko ji ma Isiraili i hongo ma teko, i hongo ma thumo banja pajo macowe.

⁶Riameno, kafodi akwo, Rwoth Were waco, alayiko win ri neki, remo bino luwo win; paka wikikwero oyo remo, oyo remo bino luwo win.

⁷Alaloko piny matendere ma Edom gima bukony kodi gim'ojwangi; aka ongoye ŋat'odonji kosa owok'iye.

⁸Alapoŋo gote mere gi delkwoŋ jom'onek; i wi tendere mewin kodi i milelo mewin kodi kama pi mewin mol'iye, am'ila bolo iye jom'onek.

⁹Alaloko win gim'ojwangi ma cil gi cil, aka ji k'obedi i tindin mewin madongo. Nyaka to wiŋeyo ni An Abedo Rwoth.

¹⁰Rupiri wiwaco ni, “Nonin ario me kodi piny ario me jobino bedo aparan, aka wilaloko jo mewin.” Makada oyido Rwoth nitie kenyo.

¹¹Riameno, paka akwo, Rwoth Were waco, alatic gi win cungo kwoŋ nge kodi nyeko ma winyutho kwoŋbedo dakirok mewin rijo; aka alaŋeyere i dier win, k'athumo riwin banja.

¹²Wilaŋeyo ni An Rwoth, atieko winjo luwo mewin ma yet ma witieko tuco kwoŋ gote ma Isiraili, ka wiwaco ni, “Ojwangi jo, omiy wan jo ni wacam.”

¹³Widele ran gi dhok win, to winyayo wac mewin kwoŋan; atieko winjo.

¹⁴Rwoth Were waco ama: Paka piny gipi fore, alajwango win.

¹⁵Paka wifore kwoŋ gir'alunja ma ot pa Isiraili, rupiri oyido ojwangere, ameno apaka alatic gi win; wilajwangere, Gote ma Edom, kodi lowo je ma Edom, joje. Nyaka jolaŋeyo ni An Abedo Rwoth.