Read dhopadhola Ezekiel 36 Bible Online

Ezekiel 36 - dhopadhola bible

Ezekiel 36

¹Rwoth owaco ama: Wod dhano, luw kodi gote ma Isiraili aka waco rijo jowowinji wac pa Rwoth.

²Rwoth Were waco ama: Kwoŋbedo jakwor onyerin to waco ni, “Onyo tindin madongo macon no jolokere mawan!”

³Riameno luw aka iwaci ama: Rwoth Were waco ama: Kwoŋbedo jolokin gunda adieri, to joŋidhin wok i thenge je, ŋey ameno ilokere gipa nonin je m'odoŋ, t'ilokere ginyero kodi gir'awaca i dier ji.

⁴Riameno, awi gote ma Isiraili, winji win wac pa Rwoth Were. Rwoth Were waco ama ri gote kodi tenderin, jwombe kodi milelin, gundin kodi tindin m'ojwangi, ma jolokere kama kinyaga caker'iye kodi ginyero ri nonin m'odoŋ je thoko.

⁵Riameno Rwoth Were waco ama: Aluwo i nyeko paran malieth swa kwoŋ nonin man je m'odoŋ, kodi kwoŋ Edom, ma gi kisangala madwoŋ swa kodi mbusa, jokwanyo lowo paran paka gipajo, kwoŋbedo lum mere to jonyaga.

⁶Riameno luw mako kwoŋ lowo ma Isiraili, aka iwaci ri gote kodi tenderin, ri jwombe kodi milelo ni: Rwoth Were waco, aluwo i keme ma nge paran, kwoŋbedo witieko candere yet pa nonin.

⁷Riameno Rwoth Were waco, akwoŋere ni nonin je ma jothoko win bende jolalokere gi yet.

⁸To win, awi gote ma Isiraili, wilaloth jangi win, to winyak olemo ri ji paran Isiraili; rupiri jocegin dwoko peco.

⁹Neni win pama, anitie riwin; alawire riwin. Alaneno ni lowo mewin ofur kendo kodi ni ocwoy kodhi kenyo.

¹⁰Alamedo welo mewin, ot je ma Isiraili, joje; ji jolabedo i tindin, t'igeto gundin.

¹¹Alamiyo ji kodi ogwaŋe jowonyay. Jolanyay to jonywol. Alamiyo wobedi i in paka i hongo perin macon, aka alatimo rin bero nger ma fodi akitimo. Kenyo nyaka wilaŋeyo ni Abedo Rwoth.

¹²Alakelo win, ji paran Isiraili, wilabedo kendo i lowo. Bino bedo lowo mewin won, aka k'oyey nyithindho mewin kec woneki jo kendo.

¹³Rwoth Were waco ama: Kwoŋbedo jowaco riwin nike wicamo ji, aka wineko nyithindho ma piny mewin.

¹⁴Riameno wok pama kadho yuwaŋe wik'ocam ji kendo aka wik'onek nyithindho ma piny mewin, Rwoth Were waco.

¹⁵Wik'owinji kendo yet pa nonin, wik'obiel kendo wickwot pa ji. Wik'omiy piny mewin kitangatanga kendo, Rwoth Were waco.

¹⁶Wac pa Rwoth obino ran:

¹⁷Wod dhano, munyo Joisiraili oyido jobedo i lowo pajo won, jokoco gi nger ma jobed'iye kodi tim pajo. Kula pajo ruwaŋan ocale koco pa dhako ma ruko dwe.

¹⁸Ameno akonjo woko keme paran kwoŋ jo ro remo m'oyido jotieko oyo i lowo, kodi cal m'oyido jokoco gine.

¹⁹Akedho jo i dier nonin, aka okedhi jo gi i piny; cungo kwoŋ kula gi tim pajo athumo rijo banja.

²⁰To munyo jotundo i dier i nonin, kisi kama jotund'iye, jokoco nyingan maleŋ, rupiri ji oyido jowaco ni, “Me ji pa Rwoth, aka kucel oyido joeye woko i lowo pere.”

²¹To oyido alith gi nyingan maleŋ, ma Joisiraili oyido jokoco i dier nonin ma jokadh'iye.

²²Riameno wac ri Joisiraili ni Rwoth Were waco ama: K'obedo ro win, awi Joisiraili, m'omiyo acegin timo gimoro, to kwoŋbedo nyingan maleŋ, ma witieko koco i dier nonin ma wikadh'iye.

²³Alaloko nyingan madwoŋ maleŋ, m'otieko koco i dier nonin, ma bende witieko koco i dier jo; aka nonin jolaŋeyo nike Abedo Rwoth, Rwoth Were waco. Alaoro win ma nyutho nonin ni abedo ŋataleŋ.

²⁴Alakwanyo win wok i nonin, t'acoko win wok i piny je, t'adwoko win i piny mewin won.

²⁵Alakiro kwoŋ win pi m'olony, aka wilalony kwoŋ koco mewin je, kodi kwoŋ cal mewin je alalonyo win.

²⁶Alamiyo win adundo manyen, t'aketho cuny manyen i win. Alakwanyo woko wok i delkwoŋ win adundo ma tele t'amiyo win adundo ma riŋo.

²⁷Alaketho cuny paran i win, t'amiyo win luwo cik to wigwokere ma kuro or paran.

²⁸Kenyo wilabedo i piny m'amiyo kwarere mewin; aka wibino bedo ji paran, t'abedo Were mewin.

²⁹Alabotho wok kwoŋ koco mewin je, aka alamiyo cemo wonyak to bedo kweth; aka ak'okethi kec kwoŋ win.

³⁰Alamiyo olemo ma yath kodi ranyak ma ndelo wobedi kweth, ŋey wikiri wicandere kendo lifol ma kec i dier nonin.

³¹Kenyo wibino poyo tim mewin marac, gi gigipiny ma witimo ma k'ober; to wijok wiwegi ro reco mewin kodi tim mewin mar'amien.

³²Ak'otim gime kwoŋbedo win, Rwoth Were waco; ŋey win gino. Wickwot womaki win gi lifol ro tim mewin, awi Joisiraili.

³³Rwoth Were waco ama: I ndelo m'abino loko win m'olony i reco mewin je, alamiyo wobedi i tindin madongo, t'igeto gundin kendo.

³⁴Lowo m'oyido ojwangi ilafuro, makiweno bedo ajwanga m'oyido ji je ma jokadho joneno.

³⁵Ji jolawaco ni, “Lowo me m'oyido ojwangi onyo olokere paka ndelo Eden; aka opalipat, kam'ojwangi kodi tindin madongo m'oyido gunda onyo pama ibed'iye aka ogoy'iye cel.”

³⁶Kenyo nonin ma jodoŋ je ma jothoko win jolaŋeyo nike an Rwoth, atieko geto kendo kam'oyido gundin, aka apidho kendo meno m'oyido ojwangi; an Rwoth atieko luwo aka alatimo gino.

³⁷Rwoth Were waco ama: Alayeyo bende Joisiraili jowokwayan ni atim rijo gime: Ni amedi welo pajo paka mwendi.

³⁸Paka rombo ma cowirok[2], paka rombo ma Yerusalem i hongo pere m'oyik, ameno apaka tindin madongo ma gundin lapoŋ gi ji paka Yerusalem cango oyido opoŋ gi rombo. Jolaŋeyo nike Abedo Rwoth.