Read dhopadhola Ezekiel 37 Bible Online

Ezekiel 37 - dhopadhola bible

Ezekiel 37

¹Cingi Rwoth obino kwoŋan, to wodhan woko gi cuny pa Rwoth to jengan piny i dier milelo; kanyago oyido opoŋ gi cokin.

²Omiyan woth thoko jo; oyido nitie cokin kweth ma joŋare i milelo, aka oyido jothwo swa.

³Go openjan ni, “Wod dhano, cokin me jonyalo kwo?” Adwoko ni, “Awi Rwoth Were, iŋat'iŋeyo.”

⁴Kenyo to go waco ran ni, “Tuci wac paran ri cokin me, aka iwaci rijo ni: Awi cokin m'othwo, winji win wac pa Rwoth.

⁵Rwoth Were waco ama ri cokin me: Alakudho luya i win, aka wilakwo.

⁶Alaketho fuc kwoŋ win, t'amiyo riŋo bino kwoŋ win, t'aumo win gi pien, t'aketho luya i win, aka wibino kwo; aka wilaŋeyo ni An Abedo Rwoth.”

⁷Ameno atuco wac pa Were paka oyido otieko oran; aka paka atuco, to woy bino abwap, jotimo woy madwoŋ, to cokin riwere, coko i coko mere.

⁸Aneno, aka fuc oyido nitie kwoŋ jo, aka riŋo oyido otieko bino kwoŋ jo, aka pien oyido otieko umo jo; to luya oyido ongoye i jo.

⁹Kenyo to go waco ran ni, “Wod dhano tuci wac paran ri luya, aka iwaci rigo ni: Rwoth Were waco ama: Biye wok kwoŋ koyin aŋwen, awi luya, aka iywe kwoŋ jom'otho me, jowonyal kwo.”

¹⁰Atuco wac pa Were paka oyido otieko oran, to luya bino kwoŋ jo, to jokwo, to jowotho gi tiendi gin, lwak ji.

¹¹Kenyo to Were waco ran ni, “Wod dhano, cokin me obedo Joisiraili gibe. Jowaco ni, ‘Cokin mawan jothwo woko, aka wangoye gi geno; warwenyo kicutho.’

¹²Riameno tuci wac paran, aka wac rijo ni, Rwoth Were waco ama: Akidho yawo kaliele mewin, t'awodho win woko wok i kaliele mewin, awi ji paran; aka aladwoko win i piny ma Isiraili.

¹³Aka wilaŋeyo ni An Abedo Rwoth, k'ayawo kaliele mewin, t'awodho win woko wok i kaliele mewin, awi ji paran.

¹⁴Alaketho cuny paran i win, aka wilakwo. Alaketho win i lowo mewin won; nyaka to wiŋeyo ni An Abedo Rwoth, atieko luwo aka alatimo,” Rwoth waco.

¹⁵Rwoth odoko oluwo kodan.

¹⁶Owaco ni wod dhano, kwany luth indiki i wiye ni, “Ri Yuda, kodi Joisiraili ma jomakere gine.”

¹⁷Aka iriw jo kanyacel i luth acel, ŋey jowonyal bedo acel i cingin.

¹⁸Aka ka ji perin jopenjin ni, “Ik'onyuthi wan dwoŋ ma gime?”

¹⁹Idwoki jo ni Rwoth Were waco ama: Acegin kwanyo luth pa Yozefu (manitie i cingi Efrayim) kodi jonono ma Isiraili ma jomakere gine; aka alaketho luth pa Yuda i wiye, t'aloko jo luth acel, ŋey jowonyal bedo acel i cingan.

²⁰Ka ludhe m'indik'iye jonitie i cingin ruwaŋ jo,

²¹nyaka iwaci rijo ni Rwoth Were waco ama: Alakwanyo Joisiraili i dier nonin ma jokadh'iye, aka alacoko jo wok i kisi thenge, t'akelo jo i piny pajo won.

²²Alaloko jo nono acel i piny, wi gote ma Isiraili; aka kere acel ama ladhumo jo je. Odoko jok'obedi nonin ario kendo, aka doko jok'opokere kendo i kerin ario.

²³Jok'okocere kendo gi cal pajo gi gigipiny pajo ma mijokere, kosa gikibenga pajo mogo je. Alabotho jo kwoŋ royin je ma jotimo gine reco to josegeya an. Alalonyo jo. Jolabedo ji paran, aka alabedo Were pajo.

²⁴Ŋeca paran Daudi bino bedo kere pajo je; aka jolabedo kodi jakwath acel. Jolaluwo cik paran to jomako or paran.

²⁵Jolabedo i piny m'amiyo ŋeca paran Yakobo, ma kwarere pajo bed'iye; jo gi nyithindho pajo gi nyikway jo jobino bedo kenyo cil gi cil aka ŋeca paran Daudi labedo wod kere pajo cil gi cil.

²⁶Alatimo cikirok ma siem gi jo; labedo cikirok ma cil gi cil gi jo; aka alamiyo jo silwany to jonyay, aka alaketho kamaleŋ paran i dier jo cil gi cil.

²⁷Kabedo paran labedo gi jo; aka alabedo Were pajo, aka jolabedo ji paran.

²⁸Nyaka nonin jobino ŋeyo ni An Rwoth aloko Isiraili maleŋ, ka kamaleŋ paran obedi i dier jo cil gi cil.