Read dhopadhola Ezekiel 38 Bible Online

Ezekiel 38 - dhopadhola bible

Ezekiel 38

¹Rwoth oluwo kodan.

²Owaco ni wod dhano, com waŋin kwoŋ Gog, ma piny ma Magog, wod kere madwoŋ pa Mesek kodi Tubal. Tuci kwoŋe wac paran

³aka iwaci ni: Rwoth Were waco ama: Amon kodin, awi Gog, wod kere madwoŋ pa Mesek kodi Tubal.

⁴Alatimin awira awira t'aketho siragetere i pom lakin, t'afudhin woko gi jolweny perin je, kayinin kodi joma gweyo, kareno joje joruko ruk ma lweny, kitipa madwoŋ, joje gi kwot aka jotiŋo abor.

⁵Pasia, Ethopiya, kodi Libia jonitie gi jo, joje gi kwot kodi abor.

⁶Goma gi jolweny mere je; Bethtogarma wok iy'adec mabor ma yumalo gi jolweny mere je, ji kweth jonitie gi win.

⁷Yikere win, bedi win ma wiyikere, win kodi kitipin je ma jowura jothoko win, aka wicungi matek rijo.

⁸Ka hongo okadho m'oromo ilalwoŋo win; i oro ma rumacen, wilakidho monjo piny kama ji oyido jodwok'iye wok i nonin kweth aka jotieko bedo ma jokilwor lweny wi gote ma Isiraili, m'oyido otiek jwango oro kweth; to pama onyo ji jobed'iye m'ongoye teko.

⁹Wilamedere woth, wilabino pa koyo madwoŋ; wilabedo pa pondeponde ma umo piny, win kodi jolweny mewin je, kodi ji kweth ma jonitie gi win.

¹⁰Rwoth Were waco ama: I ndelo no paro labino i cunyin, aka ilatimo can marac.

¹¹Ilawaco ni, “Alakidho lweny gi calin ma k'ogoy'iye cel; alapodho kwoŋ ji ma joliŋ ma jobedo kam'ongoye teko, joje ma jobedo kama k'ogoy'iye cel, aka jongoye gi nyweny kosa waŋkace.”

¹²Wilamako to winyaga ji ma jobedo kam'oyido cango obedo gundin. Ji m'ocok jo wok i nonin, ma onyo jocako limo dhok gi lim, ma jobedo i dier piny.

¹³Seba kodi Dedan kodi jomitan ma Tarsis kodi simbwore mere ma nyaka joay jolapenjo win ni, “Wibino kinyaga? Witieko coko kitipa mewin ma tiŋo gim'onyaga, ma tiŋo feza kodi buban, ma kwanyo woko dhok kodi lim, ma kinyaga lim kweth?”

¹⁴Riameno, wod dhano, tuci wac paran, aka iwaci ri Gog ni: Rwoth Were waco ama: I ndelo no ka ji paran Isiraili jobedo kam'okwe, ilaay

¹⁵t'ibino wok i kabedo perin iy'adec mabor ma yumalo, in kodi ji kweth ma jonitie kodin, joje kareno jogweyo kayinin kweth ma kiwacere, jolweny ma jomeni.

¹⁶Ilabino lweny gi ji paran Isiraili, paka pondeponde ma umo piny. I hongo ma yuwaŋe, alakelin i cingan ŋey nonin jonyal ŋeyan, kareno joluwo kwoŋin, awi Gog, alanyutho leŋo ruwaŋ jo.

¹⁷Rwoth Were waco ama: In a ŋat'atieko luwo kwoŋe i hongo m'okadho gi ŋecin paran jotuci wac Were ma Isiraili, ma i hongo no jotuco wac paran ma oro kweth ni oyido alakelin lweny gi jo?

¹⁸I ndelo no, ka Gog ocako lweny gi piny ma Isiraili, Rwoth Were waco, keme paran lakigaga.

¹⁹Rupiri i nyeko paran kodi i keme paran maliel atieko luwo: I ndelo no yengirok pa piny madwoŋ labedo i piny ma Isiraili.

²⁰Rec ma nam, kodi winyin ma koyo, kodi ogwaŋe madudi, kodi gigipiny ma mol gi kor jo i lowo, kodi ji je ma jonitie i piny, jobino kirin i nyiman, aka ilawito gote piny, aka acurcur jolapodho piny, aka kisi kor ot lapodho piny.

²¹Alalwoŋo abor kwoŋ Gog i gote paran je, Rwoth Were waco. Abor labedo kwoŋ omin.

²²Alathumo rigo banja gi two nundu kodi nek; alamiyo koth wocwe gi pe, mac kodi tele laoy kwoŋe, jolweny pere kodi ji kweth ma jonitie gi go.

²³Ameno alanyutho dwoŋ paran gi leŋo paran, t'anyuthere i waŋ nonin kweth. Nyaka to joŋeyo ni An Abedo Rwoth.