Read dhopadhola Ezekiel 39 Bible Online

Ezekiel 39 - dhopadhola bible

Ezekiel 39

¹Rwoth owaco ni in wod dhano, tuci wac paran kwoŋ Gog, aka iwaci ama: Rwoth Were waco ama, alwenyo kodin, awi Gog, wod kere pa Mesek kodi Tubal!

²Alawirin awirawira t'adhirin yumalo, t'akelin wok iy'adec mabor ma yumalo t'aterin kwoŋ gote ma Isiraili.

³Alamuko kwot perin wok i cingin maracam, t'amiyo aserin perin oy wok i cingin maracuc.

⁴Ibino podho wi gote ma Isiraili, in kodi jolweny perin kodi ji ma jonitie kodin. Alamiyin ri winyin madudi ma nger gi nger kodi ri ogwaŋe madudi jowocamin.

⁵Ilapodho i kisawe; kole atieko luwo, Rwoth Were waco.

⁶Aladhiro mac kwoŋ Magog kodi kwoŋ jono ma jobedo ma bu teko i thengi nam; aka jobino ŋeyo ni An Abedo Rwoth.

⁷Alamiyo nyingan woŋeyere i dier ji paran Isiraili; aka ak'oyey nyingan wokoc kendo; aka nonin jobino ŋeyo ni An Abedo Rwoth, Ŋataleŋ pa Isiraili.

⁸Otieko bino! Otieko timere, Rwoth Were waco. Me a ndelo m'oyido atieko luwo kwoŋe.

⁹Kenyo jono ma jobedo i tindin madongo ma Isiraili jolawok woko to jotimo mac ma lweny to jowaŋo jo, kwote, mikoro kodi aserin, abiro kodi tonge; aka jolatimo mac wok i jo ma oro abirio.

¹⁰Jok'ocoki yen i ndelin kosa toŋo yen i lule, rupiri jolabedo gi gilweny m'owey awaŋa. Jolajowo to jonyaga gigipiny pa jono ma jonyaga jo, Rwoth Were waco.

¹¹Rwoth owaco ama: I ndelo no alamiyo Gog kayik i Isiraili, i milelo pa Jowoth yuwok ceŋ ma nam; bino geŋo ger pa jowoth, rupiri kenyo Gog kodi kitipa pere je ilayik'iye jo; ibino lwoŋo ni Milelo pa Hamon Gog.

¹²Joisiraili jolacowo dwe abirio ka joyiko jo, ma cwako reco ma piny.

¹³Ji je ma piny jolayiko jo; aka lakelo rijo dwoŋ i ndelo m'abino nyuth'iye dwoŋ paran, apaka Rwoth Were waco.

¹⁴Jolaketho cwo ma jolawoth i piny kisi hongo ma yiko del pa jom'otho ma jodoŋ i piny, ŋey jowocidi woko reco mere. Ma dwe abirio joladwaro jo.

¹⁵Ka joma dwaro jowotho i piny, kisi nyatoro m'onen coko dhano ketho ranyuth cegin gine, cuka joma yiko jotiek yiko i Milelo pa Hamon Gog.

¹⁶(Tindi madwoŋ Hamona bende nitie kenyo.) Ameno jolacido woko reco ma piny.

¹⁷Paka ri in, Wod dhano, Rwoth Were waco ama: Luw gi winyin ma nger gi nger kodi ogwaŋe mager je ni: Cokere win wibin, cokere win wok i thenge je ri kalima ma cowirok m'ayiko riwin, kalima ma cowirok madwoŋ wi gote ma Isiraili, aka wibino camo riŋo to wimadho remo.

¹⁸Wilacamo riŋo pa jomeni to wimadho remo pa wot kerin ma piny, apa rombo ma mon, apa diegi, apa thwondhe, joje ma jocwe ma Basan.

¹⁹Wilacamo bor cuka wiyeŋ, to wimadho remo cuka wimer i kalima ma cowirok m'ayiko riwin.

²⁰Wilayeŋo i dhower paran gi kayinin kodi jogwey, gi jolweny apondi kodi jolweny ma nger gi nger, apaka Rwoth Were waco.

²¹Alanyutho dwoŋ paran i dier nonin; aka nonin je jolaneno thumo banja paran m'atieko thumo, aka cingan m'atieko ketho kwoŋ jo.

²²Joisiraili jolaŋeyo ni An Abedo Rwoth Were pajo, wok i ndelo no kadho yuwaŋe.

²³Nonin jolaŋeyo ni Joisiraili jokidho i katwec ro reco pajo, rupiri oyido jobedo jobanirok kodan.

²⁴Atiyo gi jo paka koco kodi kibenga pajo obedo, t'apano waŋan rijo.

²⁵Riameno Rwoth Were waco ama: Pama onyo aladwoko silwany pa Yakobo, t'atimo ŋono ri Joisiraili gibe; aka alabedo gi nyeko ri nyingan maleŋ.

²⁶Jobino bielo wickwot pajo, kodi banirok pajo je ma jotieko timo kwoŋan, ka onyo jobedo ma bu teko i piny pajo m'ongoye dhano ma bwoko jo;

²⁷k'atieko dwoko jo wok bongi ji kareno atieko coko jo wok i piny pa jokwor pajo, aka luwo i jo, atieko nyutho leŋo paran i waŋ nonin kweth.

²⁸Nyaka jobino ŋeyo ni An Abedo Rwoth Were pajo rupiri adhiro jo i katwec i dier nonin, nyaka t'acoko jo i piny pajo won. Ongoye kwoŋ jo ŋat'alaweyo cen.

²⁹Ak'opan waŋan rijo kendo, k'akonjo woko cuny paran kwoŋ Joisiraili, Rwoth Were waco.