Read dhopadhola Ezekiel 4 Bible Online

Ezekiel 4 - dhopadhola bible

Ezekiel 4

¹Rwoth owaco ni, “Onyo in, wod dhano kwany matafal indik'iye ni tindi madwoŋ Yerusalem.

²Ithoki ma mako, geti kor ot kwoŋe, ikuny bur maluth i thenge, ikethi jolweny thoko, t'iketho wot rombo ma thumo thoko.

³Kenyo kwany wer ma nyweny t'iketho paka kor ot ma nyweny i dier in gi tindi madwoŋ, icomi waŋin kwoŋ tindi madwoŋ aka labedo ni in ithoko mako. Me labedo ranyuth ri ot pa Isiraili.”

⁴“Kenyo riere piny yuracam perin, aka ikethi reco ma ot pa Isiraili kwoŋe. Ndelo je m'ilariere piny kenyo, ilatiŋo reco pajo.

⁵Atieko ketho kwoŋin oro mareco pajo, luwo kwoŋ kwan ma ndelo, ndelo 390; aka ilatiŋo reco ma ot pa Isiraili.

⁶K'itieko me, riere kendo yuracuc perin, aka ilatiŋo reco ma ot pa Yuda ma ndelo piero aŋwen. Aketho kisi ndelo acel, ri oro acel.”

⁷“Ilacomo waŋin kwoŋ ranyuth ma thoko Yerusalem ma mako, kareno imino adol cingin t'ituco wac kwoŋe.

⁸Neni, alatweyin g'adasa ŋey ikir'iwire i thenge man cuka itieko rierok ma ndelo perin je ma thoko mako.”

⁹“Kwany ŋano, bale, bijanjalo, ŋor, kal, kodi cemo man, ikethi iy'atawo acel t'itimo cemo perin. I ndelo m'ilariere piny gi butin, ndelo 390 ilacamo.

¹⁰Ilacamo kilo 0.2 ma cemo kisi ndelo i sawa m'oketh.

¹¹Ilamadho lita 0.6 ma pi kisi ndelo i sawa m'oketh.

¹²Ilacamo mugat paka mugat ma bale, aka ilatedo i mac m'omok gi ceth dhano ka joje joneno ama.”

¹³Rwoth owaco ni, “Ameno apaka Joisiraili jolacamo mugat pajo, makoc i dier nonin m'abino ter'iye jo.”

¹⁴Kenyo awaco ni, “A Rwoth Were! Neni, wok i thino paran, an won fodi akikocere gi camo gim'otho kosa gima ogwaŋ madudi oneko, kosa cemo makoc tundo gunyo ni.”

¹⁵Kenyo Rwoth owaco ran ni, “Neni, alamiyin woyo dhiaŋ kapa ceth dhano, aka ilatedo mugat perin gi mac mere.”

¹⁶Rwoth owaco ran kendo ama: Wod dhano, neni, alamiyo mugat womojere i Yerusalem; ŋey jowocami mugat apima gi lworo, aka jolamadho pi apima i dhier.

¹⁷Jolangoye gi mugat gi pi, aka kisi dhano laŋiyo nyawote i dhier, to jorere i reco pajo.