Read dhopadhola Ezekiel 40 Bible Online

Ezekiel 40 - dhopadhola bible

Ezekiel 40

¹I oro ma piero ario g'abic ma twec mawan, i cakirok ma oro, i ndelo mar'apar ma dwe, i oro mar'apar g'aŋwen cuka maki tindi madwoŋ, i ndelo no won, cingi Rwoth oyido nitie kwoŋan, aka okelan kenyo.

²Go okelan i menyirok pa Were, i piny ma Isiraili, to jengan piny wi got mabor swa, m'oyido nitie iye gim'otim ma cal tindi madwoŋ yuthenge ma yupiny.

³Munyo okelan kenyo, jal mogo oyido nitie kenyo, ma cal pere oliel pa ywel. Onwaŋo otiŋo thol ma rapim kodi luth ma rapim i cinge. Aka onwaŋo ocungo yu waŋkac.

⁴Jalo owaco ran ni wod dhano, winji maber aka kaŋasa odoco kisi gimoro je m'akidho nyuthin, rupiri me am'omiyo okelin ka. Waci ri Joisiraili gimoro je m'ineno.

⁵Onyo oyido nitie kor ot m'othoko woko mar'adec ma Ot pa Were gi paka rom. Boro ma rapim ma kedi m'onwaŋo nitie i cingi jadwoŋ no oyido obedo mita adek, kisi acel adec mita, aka adec acel ma cingi jo; to go pima nywol ma kor ot, kedi acel, ŋawirok mere, gi kedi acel.

⁶To kidho yu waŋkac ma ŋiyo yuwok ceŋ, oidho madala mere to pima kadonjo ma waŋkac, kedi acel, lutho mere.

⁷Kisika ma thenge, kedi acel mabor kodi kedi acel i laco; gi thwolo ma dier kisikin ma thenge, mita ario g'adec; aka yo nyim waŋkac yu diŋ ma waŋkac macowe iye kodi cel.

⁸To pima diŋ ma waŋkac wok i ot, mita aŋwen.

⁹To go pima waŋkac mere m'oumere, fut apar g'aŋwen kodi sirin mere fut aŋwen kodi waŋkac m'oumere wok yu ot.

¹⁰Aka onwaŋo nitie kisikin adek i kisi thenge ma waŋkac ma yuwok ceŋ; adek me onwaŋo jorom aroma; aka maraba ma kisi thenge onwaŋo romaroma.

¹¹To go pima kendo laco ma yawirok ma waŋkac, mita abic; aka laco ma yu waŋkac, mita aucel g'adec.

¹²Onwaŋo nitie rageŋ ma fodi ikitundo i kisikin ma yuthenge, adec mita kisi thenge; aka kisikin ma thenge me onwaŋ obedo mita ario i kisi thenge.

¹³To doko pima waŋkac gi yucen ma kisikin ma thenge tundo i yucen ma man, i laco ma mita ario g'adec kodi mita apar; wok i kor ot kiri i kor ot.

¹⁴Opima bende diŋ mere, mita apar; aka thoko diŋ ma yu waŋkac onwaŋo nitie kapido.

¹⁵Yunyim waŋkac i kadonjo mere tundo i gike i diŋ ma iye ma waŋkac onwaŋo romo mita piero ario g'abic.

¹⁶Kisikin kodi sirin oyido jonitie gi dirisin gi thigin yuthenge ma yu iye ma waŋkac je thoko, aka diŋ oyido nitie gi dirisin yu iye thoko; aka i wi sirin oyido nitie yen thith.

¹⁷To go kelan yuwoko ma kapido; aka neni, oyido nitie kisikin kodi ŋetagola, thoko kapido iye je; kisikin piero adek yunyim ŋetagola.

¹⁸Ŋetagola opimere gi waŋkac, boro mere orom aroma gi waŋkac; me oyido ŋetagola macowe.

¹⁹To doko pima boro ma wok i nyim waŋkac macowe tundo woko ma nyim kapido ma iye, mita piero abic.

²⁰Kenyo to go pima waŋkac ma kapido ma yuwoko m'oŋiyo yumalo, boro mere gi laco mere.

²¹Kisikin adek ma kisi thenge, adek kisi thenge, maraba kodi diŋ mere calacala kodi waŋkac marapena; boro mere mita piero abic, aka laco mere mita apar g'ario g'adec.

²²Dirisin, diŋ kodi yen ma thith mere oyido romaroma paka ma waŋkac ma ŋiyere gi ma yuwok ceŋ; tiendi jo abirio tund'iye; aka diŋ mere nitie i iye.

²³Yunyim waŋkac ma yumalo, paka ma yuwok ceŋ, oyido nitie waŋkac ma kapido ma iye, to pima wok waŋkac kiri i waŋkac, mita piero abic.

²⁴Kenyo go okelan yupiny, aka neni, waŋkac yupiny; to pima maraba kodi diŋ mere; je jo rom paka wadi. Aka onwaŋo nitie dirisin, aka i diŋ mere, paka dirisin ma man; boro mere mita piero ario g'abic, to laco mere mita apar g'ario g'adec.

²⁵Oyido nitie dirisin thoko i iye je aka i diŋ mere, paka dirisin ma man mere. Boro paka rom ma dhiot ma waŋkac oyido obedo fut piero aboro g'aŋwen aka laco fut piero aŋwen g'ario.

²⁶Oyido nitie madala ma tiendi jo abirio tundo i iye; aka diŋ mere oyido nitie i iye, aka nitie yen ma thith yunyime, acel kisi thenge.

²⁷Oyido nitie waŋkac yupiny ma kapido ma iye; to go pima wok i waŋkac tundo i waŋkac yuthenge ma yupiny, fut miya acel gi piero aucel g'aboro.

²⁸To go kelan i kapido ma iye gi waŋkac ma yupiny to pima waŋkac ma yupiny; je oyido romaroma paka wadi.

²⁹Kisikin mere, sirin mere kodi diŋ mere je oyido romaroma paka wadi, dirisin oyido nitie kiri i diŋ; boro mere mita piero ario g'abic, aka laco mere mita apar g'ario g'adec.

³⁰Diŋ bende oyido nitie iye thoko paka rom, boro ma fut piero aboro g'aŋwen kodi laco ma fut piero aŋwen g'ario.

³¹Diŋ mere oŋiyere gi kapido ma woko, aka yen thith oyido nitie i sirin mere aka madala mere onwaŋo romo tiendi jo aboro i boro.

³²To doko go kelan i iy kapido ma yuthenge ma yuwok ceŋ, to pima waŋkac; je oyido romaroma paka wadi.

³³Kisikin ma thenge, sirin mere, kodi diŋ mere oyido jorom aroma paka wadi, kisi yu diŋ je oyido dirisin; boro mere fut piero aboro g'aŋwen aka laco mere fut piero aŋwen g'ario.

³⁴Diŋ mere oyido ŋiyo kapido ma yuwoko, aka onwaŋo nitie yen thith i sirin mere, i kisi thenge; aka madala mere oyido tiendi jo aboro.

³⁵To go doko kelan i waŋkac ma yumalo to pima, oyido romaroma paka wadi.

³⁶Kisikin mere, sirin mere, kodi diŋ mere oyido jocalacala paka wadi; aka oyido jonitie gi dirisin thoko iye je paka rom. Boro mere je oyido obedo fut piero aboro g'aŋwen aka laco mere fut piero aŋwen g'ario.

³⁷Diŋ mere oŋiyere gi kapido ma woko, aka yen ma thith i wi sirin mere, i kisi thenge; aka madala mere oyido nitie kalo tiendi jo aboro.

³⁸Oyido nitie kisika gi thigo mere yu diŋ ma waŋkac, kama cowirok awaŋa oyido ripo wolwoki iye.

³⁹Aka i diŋ ma waŋkac oyido nitie mezin ario, i kisi thenge, kama mic awaŋa kodi mic mareco gi mic ma banja oyido ripo wothum'iye.

⁴⁰Yuwoko ma diŋ no, i kadonjo ma waŋkac ma yumalo oyido nitie mezin ario; aka yuthenge man ma diŋ ma waŋkac, mezin ario.

⁴¹Mezin aŋwen oyido nitie yu iye, gi mezin aŋwen yuwoko ma yuthengi waŋkac, mezin aboro, ma yaŋ'iye cowirok.

⁴²Oyido bende nitie mezin aŋwen ma tele m'ogor ri mic awaŋa. Oyido jobedo inci piero ario i ŋawirok, aka giumo jo inci piero adek ma thenge je romaroma. Gigipiny je m'oor ma neko ogwaŋe ma cowirok okan i wi mezin me.

⁴³Oyido nitie siragetere, boro i laco inci adek thoko gike ma mezin. I wi mezin, riŋo je mar'amiya i cowirok oyido ripo wojengi iye.

⁴⁴Yuthenge ma woko ma waŋkac ma iye oyido nitie kisikin ri jower i kapido ma iye, acel yuthenge ma yumalo ma ŋiyo yupiny, man yuthenge ma waŋkac ma yuwok ceŋ ma ŋiyo yumalo.

⁴⁵Go owaco ran ni, “Kisika me ma ŋiyo yupiny obedo apa jocway ri Were i wi migam ma jotiyo i Ot pa Were,

⁴⁶aka kisika ma ŋiyo yumalo obedo apa jocway ri Were i wi migam ma jotiyo i wi migam; me jobedo nyikway Zadok, jo kende i dier nyikway Levi ma jonyalo bino cegin gi Rwoth tiyo rigo.”

⁴⁷Go opima kapido, oyido obedo fut miya acel gi piero aucel g'aboro thenge aŋwen je marom aroma. Aka migam oyido nitie yuwaŋ Ot pa Were.

⁴⁸To kelan i diŋ ma Ot pa Were to pima siro ma diŋ, obedo fut abuŋwen i lutho kodi fut piero ario g'aŋwen i laco, i kisi thenge; aka kor thengi waŋkac oyido obedo fut abic ma nywol i kisi thenge.

⁴⁹Boro ma diŋ oyido obedo fut piero adek g'aŋwen i laco kodi fut piero ario i lutho; tiendi jo apar tund'iye; sirin oyido nitie iye, i kisi thengi sirin yu kisi thenge acel.