Read dhopadhola Ezekiel 41 Bible Online

Ezekiel 41 - dhopadhola bible

Ezekiel 41

¹Ma luwo jacwo no oteran i kisika ma diere, Kabedo Maleŋ. Go opima kalikondi i thenge je, mita adek i laco, m'obedo laco ma wema.

²Laco ma kadonjo oyido obedo mita abic, gi kor ot ma nywol mere mita ario g'adec i kisi thenge. Go opima boro ma kalikondi mita piero ario, aka laco mere mita apar.

³Go okidho i kisika ma iye loyo, to pima kalikondi ma donjo iye, mita acel, kodi mita adek i laco gi kor ot i kisi thenge ma nywol mita adek g'adec.

⁴Go opima boro ma kisika, mita apar kodi laco mere bende mita apar, kalo kalikondi. Kenyo go owaco ran ni, Me Kabedo Maleŋ Loyo.

⁵Jacwo no opima nywol ma kor ot ma Ot pa Were, mita adek, aka kwoŋ kor ot me oyido nitie kisikin thoko Ot pa Were ma mita ario i laco.

⁶Kisikin me oyido jonitie i gorofa adek gi kisikin piero adek i kisi gorofa. Kor ot ma woko oyido thin loyo kisi dier ot ma piny, ŋey kisikin jowothenere kwoŋ kor ot, ma kor ot k'othielo jo.

⁷Kaluwo ma kisikin ma thenge obedo ka yare wok gorofa kidho i gorofa, kwoŋbedo geto oyido okethi madala thoko Ot pa Were. R'atoŋa me gorofa omedere yarok wok i gorofa kidho i gorofa. Dhano oyido nyalo kadho malo wok i pende kidho i gorofa ma malo luwo gi ma diere.

⁸Aneno kendo nike Ot pa Were nitie gi kituti m'oŋawere malo thoko iye je. Rapim ma misingi ma kisikin ma thenge oyido rom gi kedi gikululu ma mita adek.

⁹Nywol ma kor ot ma woko ma kisikin ma thenge oyido obedo mita ario g'adec. Hongo m'owey i dier kisikin ma thenge i Ot pa Were,

¹⁰kodi kisikin ma diedipo oyido obedo mita thoko i kisi thenge.

¹¹Thigin ma kisikin oyido ŋiyo diedipo, dhiot acel yumalo, kodi dhiot man yupiny, aka laco ma hongo m'oyido owey obedo mita ario g'adec thoko iye je.

¹²Geto m'oyido oŋiyere gi diedipo ma Ot pa Were yupodho ceŋ oyido obedo mita piero aŋwen g'abic i boro kodi mita piero adek g'abic i laco. Nywol ma kor ot mere thoko oyido obedo mita ario g'adec.

¹³Jacwo no opima woko ma Ot pa Were, mita piero abic i boro, aka diedipo kodi geto gi kor ot mere, mita piero abic i lutho.

¹⁴Boro ma yuwaŋ Ot pa Were, diedipo i kisi thenge oyido obedo mita piero abic.

¹⁵Go opima boro ma geto yupodho ceŋ, kiri gi kalikondi mere i thenge je, mita piero abic. Kisika ma dhiot ma Ot pa Were, Kabedo Maleŋ, kodi Kabedo Maleŋ Loyo,

¹⁶oyido oyiki maŋon gi mbawo wok i dier ot kiri i dirisa. Dirisin me oyido cegere.

¹⁷Hongo ma wi dhiot, kiri i kisika ma iye, kodi woko mere i kor ot oyido ogor'iye calin.

¹⁸Calin me oyido obedo ma kerubim kodi yen thith, yath thith i dier kerubim ario. Kisi kerubim oyido nitie gi waŋe ario.

¹⁹Waŋ dhano oŋiyo yath thith i thenge acel, aka waŋ simbwor mathin oŋiyo yath thith i thenge man. Oyido ogor kwoŋ Ot pa Were thoko iye je,

²⁰wok i dier ot tundo kiri malo ma dhiot kerubim kodi yen thith kwoŋ kor ot.

²¹Miangin ma Kabedo Maleŋ oyido jobedo marom thenge je. Yuwaŋ Kabedo Maleŋ oyido nitie gima cale,

²²migam ma mbawo ma mita acel g'adec i ŋawirok kodi mita acel i laco. Sonda mere, pende kodi kore mere oyido obedo ma mbawo. Go owaco ran ni, “Me meza ma cungo ruwaŋ Rwoth.”

²³Kabedo Maleŋ, kodi Kabedo Maleŋ Loyo oyido jonitie gi thigin ario.

²⁴Thigin me oyido jomakere ario ario.

²⁵Oyido ogor calin ma kerubim kodi yen thith kwoŋ thigo ma Kabedo Maleŋ paka oyido ogor kwoŋ kor ot. Oyido nitie giumo ma mbawo yuwaŋ kisika ma dhiot woko.

²⁶I thenge kisika me oyido nitie dirisin, aka kor ot oyido otim makicin gi yen thith.