Read dhopadhola Ezekiel 42 Bible Online

Ezekiel 42 - dhopadhola bible

Ezekiel 42

¹Kenyo jacwo no oteran i diedipo ma woko, aka otelan i geto ma yumalo ma Ot pa Were, ma kibor gi geto ma yuwok ceŋ i gike ma Ot pa Were.

²Geto me oyido obedo mita piero abic i boro kodi mita piero ario g'abic i laco.

³I thenge acel oŋiyo hongo ma mita apar i laco m'oyido nitie i bol acel gi Ot pa Were. I thenge man oŋiyo daraja ma diedipo ma woko. Oyido ogeti i gorofa adek, aka kisi acel oyido bor loyo ma pende.

⁴I thenge ma yumalo ma geto nitie kalikondi ma mita abic i laco kodi mita piero abic i boro.

⁵Kisikin ma malo ma geto oyido diny loyo ma diere kodi ma pende kwoŋbedo gorofa jotero kwoŋ jo hongo madwoŋ.

⁶Kisikin oyido nitie i gorofa adek je, aka oyido jongoye gi sirin paka geto man i diedipo.

⁷Oyido nitie kor ot m'otire gi kisikin, yu diedipo ma woko, m'oŋiyere gi kisikin, mita piero ario g'abic i boro.

⁸Kisikin ma diedipo ma woko oyido obedo mita piero ario g'abic i boro, aka m'oŋiyere gi Ot pa Were oyido obedo mita piero abic i boro.

⁹I tiendi kisikin me oyido nitie kalikondi m'idonjo gine wok yuwok ceŋ t'iwok i diedipo ma woko.

¹⁰Oyido nitie kisikin i thenge ma yupiny, ma boro mere obedo boro ma kor ot ma woko, ma riwere gi diedipo aka oŋiyere gi kor ot ma woko.

¹¹Yuwaŋ kisikin oyido nitie kalikondi ma cale gi manitie i thenge ma yumalo. Boro kodi laco mere oyido jorom gi dhiote can kodi thigin ma cale.

¹²Thigin ma kisikin yupiny oyido donjere gi dhiot ma yuwaŋ kalikondi m'oŋiyere gine, wok yuwok ceŋ, kama kor ot caker'iye gine.

¹³Jacwo no owaco ran ni, kisikin ma yumalo kodi kisikin ma yupiny m'oŋiyere gi diedipo jobedo maleŋ. Kenyo ama jocway ri Were i wi migam ma jobino ruwaŋ Rwoth jolacamo mic maleŋ loyo. Kenyo jolaketho iye mic maleŋ loyo, mic ma cemo, mic ma cwako reco, kodi mic ma cul kwoŋbedo kabedo no leŋ.

¹⁴Ka jocway ri Were i wi migam jodonjo i Kabedo Maleŋ, jokiripi wok i diedipo ma woko ma jok'olunyo woko law ma joruko kwoŋbedo jobedo maleŋ. Joripo ruko nangin man mafodi jok'ocore cegin gi kama ji jocokere iye.

¹⁵Munyo jacwo no otieko kipima iy Ot pa Were, go otelan woko gi waŋkac ma ŋiyo yuwok ceŋ, aka opima woko ma Ot pa Were thoko.

¹⁶Go opima yuwok ceŋ gi kedi, mita 250.

¹⁷Go owire to pima thenge ma yumalo gi kedi, mita 250.

¹⁸Go owire i thenge ma yupiny gi kedi, to pima mita 250.

¹⁹Go owire i thenge ma yupodho ceŋ gi kedi, to pima mita 250 i thenge aŋwen je.

²⁰Kor ot oyido nitie thoko mita 250 i boro kodi mita 250 i laco, ma ketho pokirok i dier gimaleŋ kodi gima kileŋ.