Read dhopadhola Ezekiel 43 Bible Online

Ezekiel 43 - dhopadhola bible

Ezekiel 43

¹Kenyo jacwo no okelan i waŋkac ma ŋiyo yuwok ceŋ.

²Gikenyo dwoŋ pa Rwoth Were pa Isiraili oyido bino wok yuwok ceŋ, derino pere owinjere paka derino pi mathoth, aka piny olokere maler gi dwoŋ pere.

³Menyirok m'aneno ocale gi menyirok m'oyido atieko neno munyo go obino reyo woko tindi madwoŋ, kodi menyirok man m'oyido atieko neno i thengi malawa Kebar, aka apodho piny gi nyiman.

⁴Paka dwoŋ pa Rwoth odonjo i Ot pa Were gi waŋkac ma yuwok ceŋ,

⁵cuny otiŋan malo to kelan i diedipo ma iye, aka neni, dwoŋ pa Rwoth opoŋo iy Ot pa Were.

⁶Munyo jacwo no ocungo kabutan, awinjo dhano luwo kodan woko ma Ot pa Were.

⁷Go owaco ran ni, wod dhano, me kabedo ma kom ma dhum paran kodi kabedo ma par tiendan nyono, kam'alabed'iye i dier Joisiraili cil gi cil. Ot pa Isiraili kendo kilakoco nyingan maleŋ, jo kosa kerin pajo, lamo werin man kosa gi yiko kerin pajo ka.

⁸Kerin jogeto miangin ma thigo pajo kodi kalwok pajo to thenere gi ma ot paran, ma nyaka kor ot kende ama nitie i dier an gi jo, oyido jokoco nyingan maleŋ gi amien pajo ma jotimo, riameno areyo woko jo i nge paran.

⁹Onyo weyi jowowey tim pajo ma lamo calin kodi kelo delkwoŋ kerin pajo cegin kodan; aka nyaka alabedo i dier jo cil gi cil.

¹⁰Paka ri in, wod dhano, titi ri ot pa Isiraili Ot pa Were, aka weyi jowopima can mere to wiy jo kwot gi reco pajo.

¹¹Ka wiy jo okwot gi gima jotieko timo je, miy jo ŋeyo can ma Ot pa Were, kadonjo mere kodi ka wok, kodi cal mere je, or mere kodi cik mere je, aka ndiki piny ruwaŋ jo, ŋey jowokuri to joluwo can je kodi cik je.

¹²Me cik ma Ot pa Were, adec je ma thoko, wi got obedo maleŋ loyo. Me cik ma Ot pa Were.

¹³Me rapim ma migam paka rapim ma Ot pa Were. Pende mere thoko labedo adec mita i ŋawirok, adec mita i laco, kodi thenge mere woko adec mar'adec mita i ŋawirok.

¹⁴Wok i pende piny tundo i thenge piny obedo mita acel, gi laco ma adec mita, wok i thenge mathin tundo i madwoŋ obedo mita ario gi laco ma adec mita.

¹⁵Malo ma migam obedo mita ario, aka wok malo kidho i tunge oyido nitie tunge aŋwen.

¹⁶Malo ma migam labedo marom i kisi thenge, mita aucel i boro kodi mita aucel i laco.

¹⁷Diere mere bende labedo marom i thenge je, mita ario i boro kodi mita ario i laco, gi thenge mere adec ma adec mita i laco, pende thoko adec mita. Madalin mere laŋiyo yuwok ceŋ.

¹⁸Go owaco ran ni, wod dhano, Rwoth Were waco ama. Me kwer ma migam, i ndelo m'ilaget'iye ri mic awaŋa i iye kodi ri kiro remo i iye.

¹⁹Rwoth waco ni, ilamiyo jocway ri Were i wi migam, Jolevi, ma jobedo nyikway Zadok, ma jocore cegin kodan tiyo ran, thwon ri mic ma cwako reco.

²⁰Ilakwanyo remo mere mogo, t'iketho i tunge aŋwen je ma migam, kodi i diere aŋwen, kodi i thenge thoko. Ameno apaka ilalonyo t'iloko maleŋ.

²¹Ilakwanyo thwon ma mic ma cwako reco, aka ilawaŋo i kabedo m'oyer ma Ot pa Were, woko ma Kabedo Maleŋ.

²²I ndelo mar'ario ilamiyo mic ma wod diel m'ongoye gi ŋolo ri mic ma cwako reco, aka ilalonyo migam gi remo mere paka olony gi remo ma thwon.

²³K'itieko lonyo migam, ilamiyo mic ma thwon m'ongoye gi ŋolo kodi wod rombo wok i mwendi.

²⁴Ilaketho ruwaŋ Rwoth, aka jocway ri Were i wi migam jolaywoyo kwoŋ jo cumbi to jomiyo paka mic awaŋa ri Rwoth.

²⁵Ma ndelo abirio, kisi ndelo, ilamiyo diel ri mic ma cwako reco, thwon kodi wod rombo bende ma jongoye gi ŋolo.

²⁶Ma ndelo abirio jocway ri Were i wi migam jolamiyo cowirok ma cwako reco ri migam aka jolalonyo to joloko maleŋ.

²⁷Rumacen ma ndelo ario no, wok i ndelo mar'aboro medirok, jocway ri Were i wi migam jolamiyo i wi migam mic awaŋa mewin kodi mic mewin ma siem, aka alajolo, Rwoth Were waco.