Read dhopadhola Ezekiel 45 Bible Online

Ezekiel 45 - dhopadhola bible

Ezekiel 45

¹Ka wipoko lowo paka alunja, wilaketho gicen ri Rwoth adec ma lowo paka adec maleŋ, kilomita apar g'ario g'adec i boro kodi kilomita apar i laco. Adec no gibe labedo maleŋ.

²Iy'adec me labedo adec ma ja thenge aŋwen marom ri Ot pa Were. Kisi thenge ripo bedo mita 250 aka ripo bedo diedipo thoko ma mita piero ario g'abic i laco.

³Kwoŋ adec maleŋ me, iripo kipima adec ma romo kilomita gana apar g'ario g'adec i boro kodi kilomita gana abic i laco, kama ripo bedo Kabedo Maleŋ.

⁴Meno labedo adec maleŋ ma lowo, ma ripo bedo apa jocway ri Were i wi migam, ma jotiyo i Kabedo Maleŋ aka jotiyo ri Rwoth i Ot pa Were, aka labedo kabedo ri udi pajo kodi Kabedo Maleŋ ri Ot pa Were.

⁵Adec man, kilomita gana apar g'ario g'adec i boro kodi gana apar i laco, labedo apa Jolevi ma jotiyo i Ot pa Were, paka kabedo ma geto tindi pajo ma bed'iye.

⁶Kam'oluwere gi adec maleŋ wilaketho gicen paka adec maleŋ ma geto tindi madwoŋ, mita gana ario g'adec i laco, kodi mita gana apar g'ario g'adec i boro, ri ot pa Isiraili gibe.

⁷Ilamiyo wod kere lowo i thenge ario je, ma adec maleŋ kodi adec ma geto tindi madwoŋ. Latundo wok yupodho ceŋ tundo yuwok ceŋ, boro mere lawok yupodho ceŋ tundo yuwok ceŋ, tirtir gi adec pa nonin.

⁸Me labedo adec ma wod kere ma dhumo labedo gine i lowo ma Isiraili, ŋey kendo wokiri wodiy ji, to go laweyo adec ma lowo m'odoŋ bedo apa nonin ma Isiraili.

⁹Rwoth Were waco ama. Oromo, awi jodhum ma Isiraili! Weyi win akaka kodi diyo ji. Tim win tiro kodi gim'otire. Weyi win riemo ji paran.

¹⁰Kisi dhano woor rapim kodi latir m'otire.

¹¹Efa kodi bathi joripo bedo marom, aka bathi ripo rom g'acel ma wi apar ma homa, aka efa acel wiy apar ma homa. Homa[3] ama ripo bedo rapim m'ioro.

¹²Sekel ripo rom gi gera piero ario. Sekel piero ario kodi sekel piero ario g'abic kodi sekel apar g'abic ripo rom gi mina riwin.

¹³Me mic ma wiripo miyo. Acel wiy aucel ma efa wok i kisi homa ma ŋano, acel wiy aucel ma efa wok i kisi homa ma bale.

¹⁴Mo ripo bedo acel wiy apar ma bathi wok i kisi homa, paka homa rom gi bathi apar.

¹⁵Rombo acel wok i mwendi 200 wok i lowo ma kwath ma Isiraili. Me mic ma cemo, mic awaŋa, kodi mic ma siem, ma cwako reco pajo. Rwoth Were waco.

¹⁶Ji ma lowo je joripo joriwere gi wod kere i miyo mic.

¹⁷To me labedo tic pa wod kere kwoŋ mic awaŋa, mic ma cemo, mic ma math, kodi kalimin ma Dwe manyen, Sabato, kodi kalimin man. Go ripo miyo mic ma cwako reco, mic ma cemo, kodi mic awaŋa kodi mic ma siem, ma cwako reco pa ji ma Isiraili.

¹⁸Rwoth Were waco ama. K'acel ma dwe marapena, ilakwanyo rwath m'ongoye gi ŋolo, t'ilonyo Ot pa Were.

¹⁹Jacway ri Were i wi migam lakwanyo remo mogo ma mic ma cwako reco, to ketho i nyim dhiot ma Ot pa Were, i sondin aŋwen ma migam, kodi i nyim waŋkace ma diedipo ma iye.

²⁰Ilatimo gimoro acel k'ario ma dwe ri kisi dhano m'otimo reco ma k'oŋeyo; ŋey iloki Ot pa Were maleŋ.

²¹K'apar g'aŋwen ma dwe marapena, wilatimo Kalima ma Kadho, aka wilacamo mugat ma buthow ma ndelo abirio.

²²I ndelo no wod kere lamiyo rwath paka mic ma cwako reco pere kodi ri ji ma lowo je.

²³I ndelo abirio ma kalima go lamiyo mic awaŋa ri Rwoth. Rwath abirio, wot rombo abirio ma jongoye gi ŋolo kisi ndelo kodi wod diel kisi ndelo ri mic ma cwako reco.

²⁴Ri kisi rwath acel kodi wod rombo acel m'icowere gine, ripo wobedi mic ma lita apar g'ario g'adec ma duma kodi lita adek ma mo oliv.

²⁵K'apar g'abic ma dwe mar'abirio kodi ri ndelo abirio ma kalima, go lamiyo mic acel no ri mic ma cwako reco kodi mic awaŋa kodi mic ma cemo kodi ri mo.