Read dhopadhola Ezekiel 46 Bible Online

Ezekiel 46 - dhopadhola bible

Ezekiel 46

¹Rwoth Were waco ama. Waŋkac ma diedipo ma iye ma ŋiyo yuwok ceŋ ripo doŋ m'ocegere i ndelo aucel ma tic, to i ndelo ma Sabato iripo yawo kodi i ndelo ma Dwe Manyen.

²Wod kere ladonjo gi kalikondi ma waŋkac gi woko, aka go latero kabedo pere gi nyim waŋkac. Jocway ri Were i wi migam jolamiyo mic awaŋa pere kodi mic ma siem pere, aka go lakule piny to lamo yuwaŋ waŋkac. Go lawok, to waŋkac ripo doŋ m'oyawere tundo othieno.

³Ji ma piny joripo kulok piny to jolamo ruwaŋ Rwoth i dhiot ma waŋkac i ndelo ma Sabato je kodi i ndelo ma Dwe Manyen.

⁴Wod kere lamiyo Rwoth mic awaŋa i ndelo ma Sabato ma nyithindhi rombo aucel ma jongoye gi ŋolo kodi wod rombo m'ongoye gi ŋolo.

⁵Mic ma cemo kodi wod rombo ripo bedo lita apar g'adec ma duma, aka mic ma cemo kodi nyithindhi rombo ripo bedo marom paka go won mito miyo, kanyacel gi lita adek ma mo oliv.

⁶I ndelo ma Dwe Manyen go lamiyo rwath m'ongoye gi ŋolo, nyithindhi rombo aucel kodi wod rombo m'ongoye gi ŋolo.

⁷Paka mic ma cemo go lamiyo efa[4] acel gi thwon kodi efa acel gi wod rombo, aka gi nyithindhi rombo marom paka go won mito miyo, kanyacel gi lita adek ma mo ri kisi mic no.

⁸Ka wod kere donjo go ripo donjo gi kalikondi ma waŋkac, aka go lawok gi kenyo won.

⁹Ka ji ma piny jobino ruwaŋ Rwoth i kalimin, ŋata donjo gi waŋkac ma yumalo ripo wok gi waŋkac ma yupiny, aka ŋata donjo gi waŋkac ma yupiny ripo wok gi waŋkac ma yumalo. Jokiripi wok gi kama jodonj'iye gine, to joripo woth tirtir.

¹⁰Ka jodonjo, wod kere ladonjo gi jo, aka ka jowok, go lawok gi jo.

¹¹I kalimin kodi hongo m'oyik, mic ma cemo kodi rwath labedo efa acel, aka gi wod rombo efa acel, aka gi nyithindhi rombo marom paka dhano mito miyo, kanyacel gi lita adek ma mo ri kisi mic no.

¹²Ka wod kere miyo mic ma go won mito, obedi mic awaŋa kosa mic ma siem ri Rwoth, iripo yawo waŋkac ma yuwok ceŋ rigo, aka go lamiyo mic pere awaŋa kodi mic ma siem paka go timo i ndelo ma sabato. Go bende lawok gi kenyo t'icego waŋkac.

¹³Wod kere lamiyo nyathi rombo ma jaoro acel, m'ongoye gi ŋolo ri mic awaŋa ri Rwoth kisi ndelo, kisi odikin.

¹⁴Go bende lamiyo mic ma cemo gine kisi odikin ma kikeŋ. Ripo bedo kilo acel ma moko kodi lita acel ma mo ma nywowo moko, paka mic ma cemo ri Rwoth. Me obedo or ma cil gi cil.

¹⁵Iripo miyo Rwoth nyathi rombo kodi moko kodi mo kisi odikin cil gi cil.

¹⁶Rwoth Were waco ama: Ka wod kere omiy acel kwoŋ wote mic wok kwoŋ lim pere, labedo apa wode, kwoŋbedo obedo lim pajo ma peco.

¹⁷To ka go omiy acel kwoŋ ŋecin pere, labedo apa ŋeca no tundo i oro ma gonyirok, to go dwoko ri wod kere. Nyaka wot wod kere kende ama joripo doŋ gi mic wok iy'alunja pere.

¹⁸Wod kere kiripi mayo ji lim pajo, riemo jo woko kama jobed'iye. Go ripo miyo wote mic wok i lim pere, ŋey wongoye kwoŋ ji paran ma woriem i lim pajo.

¹⁹Kenyo jacwo no okelan i kadonjo, m'oyido nitie i thengi waŋkac, i bol ma yumalo ma kisikin maleŋ pa jocway ri Were i wi migam. Kenyo aneno kabedo i cowe pajo yupodho ceŋ.

²⁰Jacwo no owaco ran ni, “Me obedo kabedo ma jocway ri Were i wi migam jolated'iye mic ma cul kodi mic ma cwako reco kodi kama jolated'iye mugat ŋey jokiri jowowodhi woko i diedipo ma woko, ŋey leŋo mere wokiri womiy ji litho.”

²¹Kenyo jacwo no owodhan i diedipo ma woko, to telan kalo sondin aŋwen ma diedipo.

²²I kisi sonda ma diedipo oyido nitie diedipo mathin, ma mita piero ario i boro kodi mita apar g'abic i laco.

²³Thoko i diedipo mathindho oyido nitie kor ot macek ma telin, aka kwoŋ kor ot thoko oyido nitie kendin.

²⁴Jacwo no owaco ran ni, “Me fumbirin kama jotic ma Ot pa Were jolated'iye riŋo ma ji jokelo ma cowirok.”