Read dhopadhola Ezekiel 47 Bible Online

Ezekiel 47 - dhopadhola bible

Ezekiel 47

¹Jacwo no odwokan i dhiot ma Ot pa Were, aka kenyo pi oyido mol wok piny ma dhiot ma Ot pa Were aka mol yuwok ceŋ, kama Ot pa Were oŋiyo. Pi oyido mol wok piny ma gike ma yupiny ma dhiot ma Ot pa Were, yupiny ma migam.

²Kenyo go owodhan gi waŋkac ma yumalo to telan thoko woko kiri i waŋkac ma woko ma ŋiyo yuwok ceŋ. Pi oyido wok i thenge ma yupiny mere.

³Munyo jacwo no okadho yuwok ceŋ gi thol ma kipima i cinge, go opima mita 500 aka otelan luwo i pi, aka oyido luth ma tundo iy'odondo tiendan.

⁴Go opima kendo mita 500 aka otelan i pi, aka oyido luth m'otundo kiri i congan. Go opima kendo mita 500 aka otelan i pi, aka thutho mere oyido tundo i pieran.

⁵Go opima kendo mita 500 aka manago obedo malawa m'oyido akinyali ŋado, kole pi oyido osira malo, oyido luth ma dhano nyalo buko, malawa m'oyido kiŋadere.

⁶Jacwo no owaco ran ni, “Wod dhano, itieko neno gime?” Kenyo go otelan gik gi thengi malawa.

⁷Munyo adwoko, aneno yen madongo kweth i thengi malawa acel kodi man.

⁸Jacwo no owaco ran ama: Pi me mol kadho yuwok ceŋ aka kadho piny kiri i Araba. Aka ka odonjo i nam ma pi mere kimol, pi mere lokere maber.

⁹Kisi kama pi mol'iye, kisi cwec makwo ma buko labed'iye, aka labedo rec kweth, tekin pi me tundo koro. Pi lalokere maber, aka kisi kama pi me lamol'iye lamiyo kwo.

¹⁰Ji jolacungo i thengi nam kitoga, ji ma jowok i Engedi tundo kiri i Eneglayim. Labedo kabedo ma yaro bwo, aka mere rec mere labedo kweth paka rec ma nam madwoŋ.

¹¹To sa mere kodi kidiwin mere jokilabedo maber, iripo weyo jo paka ka golo cumbi.

¹²I kisi thenge ma malawa, ladongo kisi nger yath kodi cemo. Boke pajo kilathwo kosa olemo pajo kilarumo, to jolabedo kisi dwe kwoŋbedo pi mol rijo wok i Ot pa Were. Olemo pajo labedo cemo, aka boke pajo ma cango two.

¹³Rwoth Were waco ama: Nitie kew m'iripo oro ma poko lowo ri lim alunja i dier nonin apar g'ario ma Isiraili. Yozefu latero adec ario.

¹⁴Iripo poko marom. Akwoŋere miyo kwarere mewin lowo me, aka labedo lim mewin alunja.

¹⁵Me labedo kew ma lowo. Yumalo, wok i Nam Madwoŋ gi royo ma Hethlon tundo kiri i Lebohamath medirok kiri i Zedad,

¹⁶Berotha, Sirayim manitie i kew gi Damasiko kodi kew ma Hamath, tundo kiri i Hazerhatikon, manitie i kew ma Haura.

¹⁷Ameno kew lawok i nam tundo kiri i Hazarenon, manitie yumalo ma kew ma Damasiko kodi kew ma Hamath yumalo. Me labedo thenge ma yumalo.

¹⁸Kew ma yuwok ceŋ labedo wok i dier Haura kodi Damasiko, i thengi Yordan i dier Giliad kodi lowo ma Isiraili kadho i nam ma yuwok ceŋ kodi tundo kiri Tamar. Me labedo thenge ma yuwok ceŋ.

¹⁹Kew ma yupiny lawok i Tamar tundo kiri i pi ma Meriba Kades, aka wok kenyo i thengi kew ma Misir tundo kiri i Nam Madwoŋ. Me labedo thenge ma yupiny.

²⁰Kew ma yupodho ceŋ pokere gi Nam Madwoŋ tundo kiri tirtir gi Lebohamath. Me labedo thenge ma yupodho ceŋ.

²¹Ameno apaka ilapoko lowo me i dier win cungo kwoŋ nonin ma Isiraili.

²²Wilapoko paka lim mewin kodi ri jopath ma jobedo i dier win aka jotieko jonywolo nyithindho i dier win. Jolabedo riwin paka Joisiraili, aka wilapoko jo lim i dier nonin ma Isiraili.

²³I kisi nono ma jopath jonitie iye, wiripo poko jo lim, Rwoth Were waco.