Read dhopadhola Ezekiel 48 Bible Online

Ezekiel 48 - dhopadhola bible

Ezekiel 48

¹Me nyingi nonin ma Isiraili. Cako i kew ma yumalo, i royo ma Hethlon, wok i Lebohamath, tundo kiri Harayenon manitie i kew ma Damasiko gi Hamath yumalo, yuthenge ma yuwok ceŋ nam tundo yupodho ceŋ, labedo adec pa nono Dan.

²Ma kewere g'adec pa Dan, wok yuwok ceŋ tundo yupodho ceŋ, labedo adec pa nono Aser.

³Ma kewere g'adec pa Aser, wok yuwok ceŋ tundo yupodho ceŋ, labedo adec pa nono Nafital.

⁴Ma kewere g'adec pa Nafital, wok yuwok ceŋ tundo yupodho ceŋ, labedo adec pa nono Manase.

⁵Ma kewere g'adec pa Manase, wok yuwok ceŋ tundo yupodho ceŋ, labedo adec pa nono Efrayim.

⁶Ma kewere g'adec pa Efrayim, wok yuwok ceŋ tundo yupodho ceŋ, labedo adec pa Ruben.

⁷Ma kewere g'adec pa Ruben, wok yuwok ceŋ tundo yupodho ceŋ, labedo adec pa nono Yuda.

⁸Adec ma kewere g'apa Yuda, wok yuwok ceŋ tundo yupodho ceŋ, labedo ma wiripo ketho gicen. Ripo bedo mita apar g'ario g'adec i laco aka boro mere ripo rom g'adec pa nonin, wok yuwok ceŋ tundo yupodho ceŋ, gi Ot pa Were i diere.

⁹Adec ma wilaketho gicen ri Rwoth labedo kilomita apar g'ario g'adec i boro kodi kilomita apar i laco.

¹⁰Me labedo adec maleŋ. Jocway ri Were i wi migam jolatero adec ma romo kilomita apar g'ario g'adec wok yuwok ceŋ tundo yupodho ceŋ kodi kilomita abic wok yumalo tundo yupiny gi Ot pa Rwoth i diere.

¹¹Adec me labedo apa jocway ri Were i wi migam ma jobedo nyikway Zadok, ma jotiyo ran g'adieri, ma jok'oriwere gi Joisiraili munyo jonyeko, paka Jolevi man jotimo.

¹²Adec me labedo apajo paka adec manyakare wok kwoŋ adec maleŋ ma lowo, Kabedo Maleŋ loyo, ma kewere kodi adec pa Jolevi.

¹³Ma kewere kodi adec pa jocway ri Were i wi migam, Jolevi bende jolabedo g'adec ma kilomita apar g'ario g'adec wok yuwok ceŋ tundo yupodho ceŋ, kodi kilomita abic wok yumalo tundo yupiny.

¹⁴Jokiripi kitana kosa wilo gi giman je aka jokiripi poko adec ma lowo m'oyer me, kwoŋbedo obedo maleŋ ri Rwoth.

¹⁵Adec m'odoŋ, kilomita apar g'ario g'adec kodi kilomita ario g'adec, ilaoro ri tindi madwoŋ, ma bed'iye kodi kam'othangere. I diere mere ripo bedo tindi madwoŋ.

¹⁶Me labedo rapim mere, yumalo mita 2,250 yupiny mita 2,250 yuwok ceŋ mita 2,250 kodi yupodho ceŋ mita 2,250.

¹⁷Tindi madwoŋ labedo gi kam'othangere, yumalo mita 125 yupiny mita 125 yuwok ceŋ mita 125 kodi yupodho ceŋ mita 125.

¹⁸Adec lowo ma kewere g'adec lowo maleŋ labedo kilomita abic yuwok ceŋ, kilomita abic yupodho ceŋ. Cemo m'ifuro iye labedo apa jotic ma tindi madwoŋ.

¹⁹Jotic ma tindi madwoŋ wok i kisi nono jolafur'iye.

²⁰Adec je ma wiripo ketho gicen ripo bedo kilomita apar g'ario g'adec i kisi thenge, aka wilawodho mic ma leŋo wobedi apa tindi madwoŋ.

²¹Adec m'odoŋ mar'adec maleŋ kodi lim ma tindi madwoŋ labedo apa wod kere. Ripo cako wok iy'adec ma kilomita 2,250 i kew ma yuwok ceŋ kodi i kew ma yupodho ceŋ kilomita 2,250 tirtir g'adec pa nonin.

²²Lim pa Jolevi ripo bedo i dier lim pa wod kere. Adec pa kere labedo i dier adec pa Yuda kodi adec pa Benyamin.

²³Paka ri nonin m'odoŋ, wok yuwok ceŋ tundo yupodho ceŋ, labedo adec pa nono Benyamin.

²⁴Ma kewere g'adec pa Benyamin, wok yuwok ceŋ tundo yupodho ceŋ, labedo apa nono Simeo.

²⁵Ma kewere g'adec pa Simeo, wok yuwok ceŋ tundo yupodho ceŋ, labedo adec pa nono Isakar.

²⁶Ma kewere g'adec pa Isakar, wok yuwok ceŋ tundo yupodho ceŋ, labedo adec pa nono Zebulun.

²⁷Ma kewere g'adec pa Zebulun, wok yuwok ceŋ tundo yupodho ceŋ, labedo adec pa nono Gad.

²⁸Ma kewere g'adec pa Gad yupiny, kew lawok Tamar kiri i pi ma Meriba Kades, aka wok kenyo i thengi kew ma Misir tundo kiri i Nam Madwoŋ.

²⁹Me lowo ma wilapoko paka lim alunja i dier nonin ma Isiraili, aka me adec pajo, Rwoth Were waco.

³⁰Me labedo ka wok ma tindi madwoŋ. Yumalo ma ripo bedo mita 2,250

³¹labedo waŋkace adek: Waŋkac pa Ruben, waŋkac pa Yuda, kodi waŋkac pa Levi. Waŋkace ma tindi madwoŋ wolwoŋi gi nyingi nonin ma Isiraili,

³²yuwok ceŋ ma ripo bedo mita 2,250 labedo waŋkace adek: Waŋkac pa Yozefu, waŋkac pa Benyamin kodi waŋkac pa Dan.

³³Yupiny ma ripo bedo mita 2,250 labedo waŋkace adek: Waŋkac pa Simeo, waŋkac pa Isakar kodi waŋkac pa Zebulun.

³⁴Yupodho ceŋ ma ripo bedo mita 2,250 labedo waŋkace adek: Waŋkac pa Gad, waŋkac pa Aser kodi waŋkac pa Nafital.

³⁵Boro ma tindi madwoŋ thoko ripo bedo mita 9,000. Nyingi tindi madwoŋ wok i ndelo no medirok yuwaŋe labedo ni: Rwoth nitie Kenyo.