Read dhopadhola Ezekiel 5 Bible Online

Ezekiel 5 - dhopadhola bible

Ezekiel 5

¹Rwoth owaco ni, “Awi wod dhano, kwany abor mabith, ior paka kamweso pa jaliedo aka iliel ye wiyin kodi ye tikin; kenyo ikwany rapim t'ipoko didek.

²Ilakwanyo adec acel t'iwaŋo gi mac i dier tindi madwoŋ, tekin ndelo ma thoko ma mako rumo, adec acel ilanyaro g'abor thoko tindi madwoŋ, aka adec acel ilaywoyo i koyo, to nyaka acelo abor yuŋey jo.

³Ikwany yer mogo wok kenyo t'itweyo i rinda ma kanzu perin.

⁴Ikwany kwoŋ yer no kendo, t'ibolo i mac aka owaŋ kadho malo; wok kenyo mac lawok kwoŋ ot je ma Isiraili.”

⁵Rwoth Were waco ama: Me Yerusalem, atieko ketho go i dier nonin, gi lowo je thoko go.

⁶To go ogwenyere kwoŋ cik paran to jotimo kidakana loyo nonin, kodi kwoŋ fonji paran loyo lowo je m'othoko go. Jokwero cik paran, aka jok'owotho i fonji paran.

⁷Riameno Rwoth Were waco ama: Kwoŋbedo withoth loyo nonin ma jothoko win, aka wikiluwo fonji paran kosa kuro cik paran, to wiluwo cik pa nonin ma jothoko win.

⁸Riameno Rwoth Were waco ama: An e, alakelo kwoŋ win thumo banja i dier win ka nonin joneno.

⁹Alatimo riwin gima fodi akitimo, aka m'akibino timo kendo kwoŋbedo amien mewin je.

¹⁰Riameno jonywol jolacamo nyithindho pajo i dier win, aka nyithindho jolacamo jonywol pajo; alathumo banja kwoŋ win, aka joma jodoŋ alakedho jo i kisi thenge je.

¹¹Riameno, paka akwo, Rwoth Were waco, kwoŋbedo wikoco Kabedo Maleŋ paran gi gigipiny m'adak kodi amien mewin je, alareyo win, akilaŋiyo win gi waŋan ma wor, aka ak'obedi riwin gi wor.

¹²Adec acel kwoŋ win jolatho two nundu aka jolarere gi kec i dier win, adec acel jolapodho g'abor; aka alakedho adec acel i kisi thenge je t'acelo abor yuŋey jo.

¹³Alaoro nge paran, aka alakweyo keme paran kwoŋ jo, alaculo kwor aka jolaŋeyo nike An Rwoth, atieko luwo i nyeko paran k'acowo keme paran kwoŋ jo.

¹⁴Alaloko win gunda kodi giwickwot i dier nonin ma jothoko win, i waŋ jono je ma joluw.

¹⁵Wilabedo giwickwot, gi yet, gir'anena, kodi gibwok ri nonin ma jothoko win; k'anokel thumo banja kwoŋ win i nge kodi keme kodi bwok ma gero. An Rwoth atieko luwo.

¹⁶K'anoceli kwoŋ jo aserin ma nek makec, ma lareyo woko jo, m'abino gonyo reyo woko win. Alamedo kec kwoŋ win t'akedho woko dere mewin.

¹⁷Aladhiro kwoŋ win kec kodi ogwaŋe madudi, jolaweyo win ma bu nyithindho. Two nundu kodi oyo remo layweyo woko win, aka alakelo abor kwoŋ win; An Rwoth atieko luwo.