Read dhopadhola Ezekiel 9 Bible Online

Ezekiel 9 - dhopadhola bible

Ezekiel 9

¹Kenyo dwondi madwoŋ olwoŋo i ithan ka waco ni, “Gir'acula pa tindi madwoŋ ocore cegin, aka kisi dhano otiŋo i cinge gilweny pere ma reyo woko.”

²Neni to cwo aucel jobino wok yu waŋkac ma malo ma ŋiyo yumalo dicel, kisi dhano gi gilweny pere ma ŋinyo i cinge. I dier jo oyido nitie jacwo m'oruko nanga mafoth, gi kalam kodi vino ma ndiko i piere. Jobino to jocungo i thengi migam ma ywel.

³Dwoŋ pa Were pa Isiraili oyido oay malo wok i kerubim kam'oyido nitie i iye to pie i thengi ot. Rwoth olwoŋo jacwo m'oyido oruko nanga mafoth, m'oyido nitie gi kalam kodi vino ma ndiko i piere.

⁴Rwoth owaco rigo ni, “Luw i dier tindi madwoŋ, i dier Yerusalem, aka ikethi ranyuth i nyim jono ma jotuco aka joywak kwoŋ amien je m'otimi kenyo.”

⁵Ri joman go owaco i ithan ni, “Luw win go i tindi madwoŋ, wineki, ongoye weyo kosa nyutho wor.

⁶Neki win cwo m'oti, yac kodi nyir, nyithindho kodi mon, to wikiri wigeyi jono ma jonitie gi ranyuth; aka wicaki i kabedo paran maleŋ.” Ameno jocako gi jodongo m'oyido jonitie yuwaŋ ot.

⁷Go owaco rijo ni, “Koc win ot paran, aka poŋ win gi delkwoŋ jom'otho. Kadhi win.” Jokadho to joneko i tindi madwoŋ.

⁸Aka paka oyido joneko adoŋ kendan. Agore piny gi nyiman t'aywak ama: Awi Rwoth Were, ilareyo woko ji m'odoŋ i Isiraili je k'ikonjo keme perin kwoŋ Yerusalem?

⁹Go odwokan ni, “Reco ma ot pa Isiraili kodi Yuda dwoŋ swa adieri, piny opoŋ oyo remo aka tindi madwoŋ opoŋ banirok. Kole jowaco ni, Rwoth ojwango piny, go kinen.

¹⁰Paka ri an, akilaŋiyo jo gi waŋan ma wor, kosa nyutho wor to alaculo kwor i wi jo ro tim pajo.”

¹¹Aka neni, jacwo m'oyido oruko nanga mafoth, m'oyido nitie gi vino i piere odwoko wac ka waco ni, “Atieko timo paka iwodho ran or.”