Read dhopadhola Daniel 10 Bible Online

Daniel 10 - dhopadhola bible

Daniel 10

¹I oro mar'adek ma dhum pa Siras kere ma Pasia, wac omenyere ri Daniel m'oyido ilwoŋo bende ni Beltesazar. Wac me oyido obedo adieri aka mako kwoŋ lweny madwoŋ. Daniel oniaŋ wac me kwoŋbedo, olimo niaŋ kwoŋe i menyirok.

²I hongo no, an Daniel, oyido aywak ma sabiti adek.

³Akicamo cemo maleny, dhokan k'obilo riŋo kosa vini; aka akiwire gi mo, ma sabiti adek.

⁴Ka piero ario g'aŋwen ma dwe marapena, munyo oyido acungo i thengi malawa madwoŋ, Tigris,

⁵atiŋo waŋan malo, t'aŋiyo, aka neni, jacwo m'oruko nanga mafoth, to tweyo piero gi del ma zahabu macil ma Ufaz.

⁶Delkwoŋe oyido minyin paka tele ma welo, nyime oyido cal lithkoth, aka waŋe oyido cal mac maliel, cinge kodi tiende kicin gi ywel, aka derino ma wac pere oyido cal derino pa Lwak.

⁷An, Daniel aneno menyirok kendan, to cwo m'oyido jonitie bongan jok'oneno menyirok. Kirin madwoŋ opodho kwoŋ jo, aka joŋweco pondo.

⁸Adoŋ cen kendan, t'aneno menyirok madwoŋ me. Meni oloyan aka waŋan olokere matar, akinyalo doŋ gi meni.

⁹Awinjo derino ma wac pere, aka paka awinjo, nindo otimo pa kwalan t'apodho gi nyiman piny.

¹⁰Kenyo cingi dhano ogeyan, aka omiyo congan kodi par cingan kirin.

¹¹Go owaco ran ni, “Awi Daniel, omarin swa, niaŋ wac m'akidho waco rin. Cungi gi tiendin, kole onyo atieko orin.” Munyo go luwo wac me ran, oyido acungo, k'akirin.

¹²Go owaco ran ni, “Ikir'ilwor Awi Daniel, kole wok i ndelo marapena m'iketho cunyin ma niaŋ, kodi mwolok ruwaŋ Were perin, owinji wac perin, aka atieko bino ro wac perin.

¹³Kere ma Pasia opiemo kodan ma ndelo piero ario g'acel. To Mikaili, acel kwoŋ jotel pa jomalaika, obino konyan, aka adoŋ cen kenyo gi kerin ma Pasia.

¹⁴Abino miyin niaŋ gima latimere ri ji perin i ndelo ma rumacen. Kucel menyirok latero ndelo kweth.”

¹⁵Paka go oluwo kodan wac no, aketho waŋan piny i lowo, aka akinyalo luwo.

¹⁶Aneno ŋata cale wot ji geyo dhokan, ayawo dhokan t'aluwo, aka awaco ri ŋat'oyido ocungo ruwaŋan ni, “Rwoth paran, menyirok me omiyan litho ma meni paran orumo.

¹⁷Anonyal nedi, an ŋeca pa rwoth, luwo gi rwoth paran? Kole pama ongoye meni kiri gi luya je m'odoŋ kwoŋan.”

¹⁸Kenyo ŋata cale wot ji ogeyan kendo, aka omiyan meni.

¹⁹Go owaco ran ni, “Awi jacwo m'omar swa, Ikir'ilwor, siem wobedi kodin, bedi matek, bedi matek.” Munyo go otieko luwo kodan, omiyan bedo gi meni, aka awaco ni, “Weyi rwoth paran woluwi, kole itieko miyan meni.”

²⁰Go openjan ni, “Iŋeyo raŋo abino bongin? Onyo pama aripo gik lweny gi wod kere ma Pasia, aka k'atieko gi go, nyaka wod kere ma Gris labino.

²¹To alanyuthin gim'ondiki i ndiko mar'adieri, aka ongoye ŋata nyutho teko kodan, kwanyowoko Mikaili wod kere perin.”