Read dhopadhola Daniel 12 Bible Online

Daniel 12 - dhopadhola bible

Daniel 12

¹I hongo no Mikaili laay, wod kere madwoŋ, m'obedo jatel pa ji perin. Labedo hongo ma candirok, nger candirok ma fodi k'otimere wok cuka nonin cakere. To i hongo no ilabotho ji perin, kisi ŋat'onwaŋ nyinge ondiki i kitawo.

²Aka mathoth kwoŋ jono ma jonindo i fukefuke ma lowo jolacew, megi i kwo makirum, megi i wickwot ma cil gi cil megi i kwo ma bukony.

³Jomariek jolaliel paka lero ma pondeponde; aka jono ma jotelo ji kweth timo gim'otire jolaminyin paka micalin cil gi cil.

⁴To in, Daniel, kur wac me manyaliŋliŋ aka mwon i kitawo cuka hongo ma gike; ji kweth jolawoth kadho gi dwoko, aka rieko lamedere.

⁵Kenyo an Daniel, aŋiyo, t'aneno j'ario man, acel oyido ocungo i thengi malawa me, aka man i thenge ca.

⁶Acel openjo jacwo m'oyido oruko nanga mafoth, aka oyido ocungo wi pi ma mol ni, “Obedi kiri keraŋo aka nyaka gike ma gir'aura me obin?”

⁷Jacwo m'oyido oruko nanga mafoth orieyo cinge maracuc kodi maracam malo yupolo. Awinjo munyo go kwoŋere i nyingi ŋata kwo cil gi cil, ka waco ni; dicel, dirio, g'adec, tekin go cowo kedho meni pa jomaleŋ, gime je latundo i kare.

⁸Awinjo to oyido akiniaŋ; ameno apenjo ni, “Rwoth, aŋo ma lawok kwoŋ gime?”

⁹Go odwokan ni, “Awi Daniel, kadhi, wac me okan nyaliŋliŋ aka omwon tundo i hongo ma gike.

¹⁰Jomathoth jolacido woko reco pajo, jolaloko kwo pajo macil, ilalonyo jo, to jokidakana jolamedere timo kidakana. Ongoye jakidakana ma laniaŋ, to jono ma joriek jolaniaŋ.”

¹¹“Wok i hongo m'ilakwanyo woko mic awaŋa ma cil gi cil kodi amien ma kelo kidamba, latero ndelo 290.

¹²Josilwany a joma jotim adieri i ndelo 1,335 orum.”

¹³“To in kadhi i yo perin tundo i hongo ma gike. Ilaywomere t'iay jolo kemba perin i hongo ma gike.”