Read dhopadhola Daniel 5 Bible Online

Daniel 5 - dhopadhola bible

Daniel 5

¹Kere Belsazar otimo kalima madwoŋ ri jodhum pere gana aka omadho vini ruwaŋ jo.

²Belsazar omiyo or i wi math nike wokel atewe ma zahabu kodi ma feza ma bamere Kere Nebukadineza okwanyo wok i Ot pa Were i Yerusalem, ŋey go, jodhum pere, mon pere, nyithindho pere kodi mon pere ma thenge jowomedh'iye.

³Ameno owodhi atewe ma zahabu kodi ma feza m'oyido okwany wok i Ot pa Were i Yerusalem, aka kere, jodhum pere, mon pere, nyithindho pere kodi mon pere ma thenge jowomedh'iye.

⁴Jomadho vini ka jopako werin m'otimi gi zahabu, feza, ywel, nyweny, mbawo, kodi tele.

⁵Piyo piyo lwet cingi dhano oneno to cako ndiko i kor ot ma peco pa kere cegin gi raŋaw. Kere oneno cingi jo no paka ondiko.

⁶Kenyo waŋ kere olokere matar, aka paro pere ocando go. Coko bambe olwogere, aka conge ocako gudirok kanyacel.

⁷Kere oywaki malo ni wokel jondijo ma jotimo gir'aura, Jokaldin, kodi jothieth. Kere owaco ri cwo mariek ma Babilon ni, “Ŋata nyalo kisoma kodi tito dwoŋ ma ndiko me ilaruko go gi law manyarangi ariŋo, thiwino ma zahabu i ŋute, aka labedo dhano mar'adek i dwoŋ i ker.”

⁸Kenyo cwo mariek je jobino, to jok'onyalo kisoma ndiko kosa tito ri kere dwoŋ mere.

⁹Kenyo Kere Belsazar obwok swa to cal ma waŋe lokere matar, aka jodhum pere jodhier.

¹⁰Onyo munyo yok kere owinjo kere joluwo kwoŋ wac me gi jodhum pere, obino i ot ma kalima. Yok kere owaco ni, “Awi kere, yindira cil gi cil! Ikir'iwey paro perin wobwokin kosa cal perin wolokere.

¹¹Nitie i ker perin jal ma cuny pa Were maleŋ nitie kwoŋe. I hongo pa benin onwaŋ nike go nitie gi lero, niaŋ kodi rieko paka rieko pa werin. Aka benin Nebukadineza oketho go bedo jadwoŋ pa jondijo ma joneno gima latimere, jondijo ma timo gir'aura, Jokaldin kodi jothieth.

¹²Daniel, ma kere oyido ocwoko rigo nyinge ni Beltesazar oyido nitie gi cuny ma gir'aura, ŋeyo, niaŋ, tito dwoŋ ma lek, sikoiyiko, kodi thango gim'opanere; aka go latito rin dwoŋ ma gime je.”

¹³Kenyo okeli Daniel ruwaŋ kere, aka kere openjo go ni, “Iŋat'ibedo Daniel, acel kwoŋ jotwec ma baba kere okelo wok i Yuda?

¹⁴Atieko winjo nike cuny pa Were nitie kwoŋin, aka nike initie gi lero, niaŋ, kodi rieko ma gir'aura.

¹⁵Onyo otiek kelo ruwaŋan cwo mariek kodi jondijo ma joneno gima latimere, to jok'onyalo kisoma kodi tito ran dwoŋ ma ndiko me.

¹⁶To atieko winjo nike inyalo tito dwoŋ ma gimoro kodi thango gim'opanere. Onyo ka inonyal kisoma ndiko me, kodi tito dwoŋ mere, ilaruko rin nanga manyarangi ariŋo kodi thiwino ma zahabu i ŋutin, aka ilabedo jadhum mar'adek i ker.”

¹⁷Daniel odwoko ka waco ruwaŋ kere ni, “Weyi mic perin wodoŋ rin, aka miy ŋatiman kemba perin; kucel alakisoma ri kere ndiko kodi tito dwoŋ mere.

¹⁸Awi kere, Were ma Jamalo Swa omiyo benin, Nebukadineza, ker, dhum, dwoŋ kodi wor:

¹⁹Kole kwoŋbedo dwoŋ ma Were omiyo go, ji je, nonin je, kodi dhodhok je jokirin gi lworo ruwaŋ go. Benin oneko jono ma go omito neko, oweyo jono ma go omito weyo jowokwo, omiyo wor ri jono ma go omito, aka odwoko piny jono ma go omito dwoko piny.

²⁰To munyo noro opoŋ i cunye, to paro pere lokere matek, okwany go woko wok i kom pere ma dhum, t'imayo go dwoŋ.

²¹Okwany go woko wok i dier ji, t'iloko cunye paka cuny ogwaŋ. Go obedo g'ogwaŋe aka ocamo lum paka merikwa; delkwoŋe odhiek gi thoyo ma polo, cuka go ofonjere nike Were ma jamalo Swa dhumo kiri ker pa ji, aka miyo ŋata go oyero.

²²To in wode, Belsazar, ikimwole i cunyin, makada nende oyido iŋeyo gime je.

²³In itieko tiŋere malo kwoŋ Rwoth ma i polo. Okeli atewe ma Ot pa Were ruwaŋin, aka in, jodhum perin, mon perin, nyithindho perin, kodi mon perin ma thenge wimadh'iye vini. Witieko pako werin ma feza, zahabu, ywel, nyweny, mbawo kodi tele, ma jokinen kosa winji kosa ŋey. To Were ma luya perin nitie i cinge, aka yo perin je nitie i go, ikiworo.

²⁴Am'omiyo go odhiro par cingi dhano ndiko gime.”

²⁵“Me ndiko m'ondiki: MENE, MENE, TEKEL kodi UPARISIN.

²⁶Me dwoŋ mere: MENE nyutho ni Were otieko kwano ker perin, aka okelo i gike.

²⁷TEKEL nyutho ni otiek kipima in i latir aka onwaŋ nike nitie gim'ongoye.

²⁸PERES nyutho ni ker perin otiakere aka omiy Jomedes kodi Jopasia.”

²⁹Belsazar omiyo or aka oruki ri Daniel nanga manyarangi ariŋo kodi thiwino ma zahabu i ŋute to langa nike go obedo jadhum mar'adek i ker.

³⁰Wor no won oneki Belsazar, kere pa Jokaldin.

³¹Dario Jamedes am'olunjo ker munyo oyido jaoro cegin piero aucel g'ario.