Read dhopadhola Daniel 6 Bible Online

Daniel 6 - dhopadhola bible

Daniel 6

¹Osiemo Dario ketho i ker jodhum miya acel gi piero ario, jowobedi i ker gibe

²kodi jodongo pajo adek, ma Daniel oyido obedo acel kwoŋ jo. Jodhum oyido joosa rijo ŋey kere wokiri wokeŋ gimoro.

³Daniel onyutho kite m'opokere kwoŋ jodongo adek kodi jodhum ro cuny ma gir'aura m'oyido nitie kwoŋe, aka kere ocano yero go dhumo ker gibe.

⁴Ameno jodongo kodi jodhum jorango nger ma nwaŋo kiŋunyaŋunya kwoŋ Daniel i gigipiny manyaker, to jok'onyalo nwaŋo kiŋunyaŋunya kosa komo i go; kole Daniel oyido timo adieri aka oyido ongoye gi komo kosa banirok.

⁵Kenyo cwo no jowaco ni, “Wakilanwaŋo nger ma kiŋunyaŋunya kwoŋ Daniel i gigipiny manyaker, kwanyowoko i cik ma mako kwoŋ Were pere.”

⁶Jodongo kodi jodhum jomiyere rieko to jokidho bongi kere, aka jowaco rigo ni, “Kere Dario yindira cil gi cil.

⁷Jodongo je ma ker me, jogavana, jodhum, jomic rieko kodi jotel, jotieko miyirok rieko ketho cik manyaker, kodi gima ridho nike ŋat'okway were mogo je kosa dhano ma ndelo piero adek, kwanyowoko in, Awi kere, wobol go i od simbwore.

⁸Onyo riameno, kere, kethi cik, i ndiko, aka iketh'iye cingin makiwire, cungo kwoŋ cik pa Jomedes kodi Jopasia.”

⁹Riameno kere Dario oketho cinge i ndiko kodi cik.

¹⁰Makada nende Daniel oyido oŋeyo nike kere oketho cinge i ndiko, go odonjo i ot pere kareno dirisa pere ma kisika ma malo oyido oyawere yuthenge ma Yerusalem; go oguro conge piny to kwayo ka miyo Were foyo didek paka go oyido timo noknok.

¹¹Cwo m'oyido joluwo tiendi go jobino to jonwaŋo Daniel munyo kwayo aka rango wor wok bongi Were pere.

¹²Kenyo jocore cegin gi kere aka jowaco rigo ni, “Awi kere ikiketho cingin i cik, nike ŋat'okway were mogo je kosa dhano kwanyowoko in, ma ndelo piero adek, wobol go i od simbwor?” Kere odwoko ni, “Apaka nitie ameno, cungo kwoŋ cik pa Jomedes kodi Pasia aka kiwire.”

¹³Jodwoko ka jowaco ruwaŋ kere ni, “Daniel, acel kwoŋ jotwec ma wok Yuda kiworin awi kere, kosa cik m'itieko keth'iye cingin; to go kwayo didek i ndelo.”

¹⁴Munyo kere owinjo wac me, k'osangala go swa, aka oketho i cunye botho Daniel, aka otemo gi kinen cuka waŋceŋ opodho botho go.

¹⁵Kenyo cwo no jocokere bongi kere, aka jowaco rigo ni, “Ŋey, awi kere, ni cik pa Jomedes kodi Jopasia obedo ni, Ongoye ndiko kosa cik ma kere otieko ketho ma wire.”

¹⁶Kere omiyo or t'ikelo Daniel, aka obol go i od simbwore. Onyo kere oluwo ka waco ri Daniel ni, “Were perin m'ikwayo noknok labothin.”

¹⁷Kenyo okeli tele t'iumo gine dhok od simbwore, aka kere omwono gi peta pere kodi peta pa rwodhe pere; r'atoŋa ni wongoye gima wowire kwoŋ Daniel.

¹⁸Kere ogik i muluwir pere, aka oriyo kec wor gibe m'ongoye wiro paro kaman, aka nindo k'omako waŋe.

¹⁹Kere omondo cew gi ŋamba, aka oredo kadho i od simbwore.

²⁰Munyo kere otundo i od simbwore, oywaki gi geregere ri Daniel ni, “Daniel, ŋeca pa Were makwo, Were perin m'ikwayo noknok onyalo bothin kwoŋ simbwore?”

²¹Daniel odwoko ni, “Awi kere, yindira cil gi cil.

²²Were paran ooro malaika pere m'ocego dhok simbwore, aka jok'omiyan litho, kwoŋbedo abu banja ruwaŋ go kodi ruwaŋin, awi kere, angoye gi komo.”

²³Kere osangala swa ri Daniel, aka omiyo or nike wofudhi Daniel wok i od simbwore. Ameno ofudhi Daniel aka ongoye adhola m'onwaŋ kwoŋe, kwoŋbedo Were obotho go.

²⁴Kere omiyo or aka okeli cwo m'oyido josegeya Daniel t'ibolo jo i od simbwore gi mon pajo kodi nyithindho pajo. Simbwore jopor kwoŋ jo to joŋinyo cokin pajo mafodi jok'otundo kada i pendi od simbwore.

²⁵Kere Dario ondiko ri ji je, nonin je, dhodhok je, ma jobedo i piny ni, “Siem gibe wobedi riwin.

²⁶Amiyo or ni, i kisi adec ma ker paran, ji joripo kirin kodi lworo Were pa Daniel.” “Kole go obedo Were mar'adieri makwo, go kiwire cil gi cil, ker pere kilarere, aka dhum pere ongoye gike.

²⁷Go gonyo aka botho, go timo ranyuth kodi gir'aura i polo kodi i piny, go m'otieko botho Daniel wok i meni pa simbwore.”

²⁸Ameno Daniel me oyindira i hongo ma dhum pa Dario, kodi i hongo ma dhum pa Siras Japasia.