Read dhopadhola Daniel 7 Bible Online

Daniel 7 - dhopadhola bible

Daniel 7

¹I oro marapena ma dhum pa Kere Belsazar ma Babilon, Daniel oneno menyirok to leko munyo go nindo i kanindo pere. Go ondiko lek kodi gima go oneno me:

²Daniel oluwo ka waco ni: Aneno i menyirok paran wor, aka neni, koyo aŋwen ma i polo joyengo nam madwoŋ.

³Ogwaŋe aŋwen ma jopokere jowok i nam.

⁴Acel oyido cale gi simbwor, aka nitie gi bwombi ango. Kenyo munyo agawo, obudhi woko bwombe t'itiŋo malo wok piny, aka omiy cungo gi tiende paka dhano, t'imiyo cuny dhano.

⁵Ogwaŋ man, mar'ario owok, ma cal gi amudhe, aka otiŋere i thenge acel, oyido nitie gi kediŋete adek i dhoke, i dier lake; t'iwaco rigo ni, “Ay malo icami riŋo kweth.”

⁶Rumacen aneno kendo ogwaŋ mar'adek, ma cal gi kwac, oyido nitie gi bwombi winyo aŋwen, kodi wic mere aŋwen, aka omiy go dhum.

⁷Aneno i menyirok wor, aka neni, bulir mar'aŋwen, ma bwoko jo, ma ragaŋ, aka tek swa, oyido nitie gi lake ma nyweny aka oyido camo to ŋinyo woko mathindho thindho, ka nyono ŋinjeŋinje gi tiende. Go oyido opokere kwoŋ ogwaŋe m'atelo neno je aka oyido nitie gi tunge apar.

⁸Munyo fodi aparo kwoŋ tunge, tungi man mathin owok, aka mafodi k'owoki tunge marapena adek ofudhere gi fuce mere. I tunge mathin me, oyido nitie waŋ jo ma cal waŋ dhano, gi dhok jo ma luwo gigipiny madongo.

⁹Paka agawo, okethi kombere ma dhum aka Ŋatacene obed'iye, ma law pere oyido tar paka tor, aka yer wiye oyido cal gi pien rombo, kom pere ma dhum oyido cal mac maliel aka tiende oyido cal mac ma waŋo jo.

¹⁰Malawa ma mac otula to mol ruwaŋ go. Ganin gi ganin jotiyo rigo, aka ganin apar jocungo ruwaŋe, oyaw kapido, t'iyawo kitawin.

¹¹Aŋiyo munyo awinjo derino ma wac ma tungi oluwo, aka paka aŋiyo oneki ogwaŋ t'ibolo delkwoŋe i mac maliel.

¹²Paka ri ogwaŋ m'odoŋ, omay jo woko dhum pajo, to imedo kwo pajo ma hongo gi hongo.

¹³Aneno i menyirok wor, neni, ŋata cale Wod Dhano obino gi pondeponde wok i polo bongi Ŋatacene t'ikelo go ruwaŋe.

¹⁴Ri go omiy dhum, dwoŋ, kodi ker, ŋey ji je, nonin je, kodi dhodhok je jowotiy rigo. Dhum pere obedo dhum ma cil gi cil, ma kilarumo, aka ker pere kilarere.

¹⁵An Daniel, cunyan oraman, aka menyirok me ocando paro paran.

¹⁶Acore cegin gi acel kwoŋ jom'oyido ocungo cegin, t'apenjo go adieri ma gime. Ameno go owaco ran, to miyan ŋeyo dwoŋ ma gigipiny me.

¹⁷Ogwaŋe madongo aŋwen me jobedo kerin aŋwen ma jolaay i piny.

¹⁸To jomaleŋ pa Were ma Jamalo Swa jolatero ker, to jodhumo cil gi cil, makicutho.

¹⁹Kenyo amito ni aŋey adieri ma mako kwoŋ ogwaŋ mar'aŋwen, m'oyido opokere kwoŋ wadi, ma kelo lworo swa, m'oyido nitie gi lake ma nyweny, gi lwet cinge ma ywel, m'ocamo, oturo mathindho thindho, to nyono ŋinjeŋinje gi tiende;

²⁰kodi tunge aŋwen m'oyido nitie i wic mere, kodi m'owok mathin, rumacen ma tunge adek fudhirok, tunge m'oyido nitie gi waŋe, kodi dhoke m'oluwo gigipiny madongo, ma cal mere oyido loyo wadi.

²¹Paka aŋiyo, tunge me olwenyo gi jomaleŋ to loyo jo,

²²cuka Ŋatacene obino, t'ithumo banja ri jomaleŋ pa Jamalo Swa, to hongo tundo ma jomaleŋ jodhumo.

²³Me gima go owaco: Ogwaŋ mar'aŋwen labedo ker mar'aŋwen i piny, ma lapokere kwoŋ ker je, aka lacamo piny gibe, lanyono piny, to turo mathindho thindho.

²⁴Tunge apar m'owok i ker me obedo kerin apar ma jolaay, aka man laay yuŋey jo, aka go lapokere kwoŋ kerin marapena, aka go ladhumo kerin adek ca.

²⁵Go laluwo wac madongo kwoŋ Jamalo Swa, to paro wiro hongo kodi cik; aka ilamiyo i cingi go cuka oro gi oro kodi adec oro.

²⁶To ilayawo kapido t'ithumo banja, aka ilamayo go dhum, ilawaŋo kodi reyo woko kicutho.

²⁷Kenyo ker, dhum kodi dwoŋ ma kerin i pendi polo gibe ilamiyo jomaleŋ pa Jamalo Swa ma ker pere obedo ker ma cil gi cil, aka ker je jolatic rigo kodi winjo go.

²⁸“Me gike ma menyirok no. Paka ri an Daniel, paro paran ocandan swa, aka cal paran olokere; to akano wac me i cunyan.”