Read dhopadhola Daniel 8 Bible Online

Daniel 8 - dhopadhola bible

Daniel 8

¹I oro mar'adek ma dhum pa Kere Belsazar, an Daniel aneno menyirok man, rumacen munyo atieko neno marapena.

²Aneno i menyirok; aka munyo aneno, oyido anitie i Susa tindi madwoŋ, manitie iy'adec ma Elam, aka aneno i menyirok oyido anitie i thengi malawa Ulay.

³Atiŋo waŋan malo t'aneno wod rombo ocungo i thengi malawa, oyido nitie gi tunge ario. Tunge je oyido jobor, to acel oyido bor loyo man, aka mabor mere owok macowe.

⁴Aneno wod rombo lokere mager yuwok ceŋ, yumalo, kodi yupiny, m'ongoye ogwaŋ m'onyalo cungo ruwaŋ go, kosa ongoye ŋat'onyalo botho wok i cingi go, to go otimo paka yenyo aka olokere madwoŋ.

⁵Munyo fodi agawo, aneno wod diel owok yuwok ceŋ ruwaŋ piny gibe, to geyo piny; aka oyido nitie gi tunge ma neno i dier waŋe.

⁶Wod diel obino bongi wod rombo m'oyido nitie gi tunge ario, m'aneno ocungo i coŋino ma malawa, aka oŋweco bonge i keme ma meni pere.

⁷Aneno wod diel core bongi wod rombo gi nge kwoŋe, aka ogoyo wod rombo to turo woko tunge ario, ma wod rombo ongoye gi meni ma cungo ruwaŋe. Wod diel ofwodo piny wod rombo to nyono, aka oyido ongoye ŋat'obothi wod rombo wok i cinge.

⁸Kenyo to wod diel lokere madwoŋ swa, to i meni pere tunge madwoŋ otur, aka i liende otwi tunge aŋwen, ma joŋiyo yu koyin aŋwen ma i polo.

⁹Wok i tungi acel kwoŋ jo, owok tungi mathin, m'odongo madwoŋ swa yupiny kodi yuwok ceŋ, kodi yu lowo maŋon.[1]

¹⁰Tungi me odongo tundo kiri i Lwak ma i polo, aka obolo piny Lwak man kodi micalin, to nyono jo.

¹¹Go otiŋere malo kiri kwoŋ jadhum pa lwak, aka omayo go mic ma cil gi cil aka kabedo ma Kabedo Maleŋ pere omaki.

¹²Kwoŋbedo kidakana, omiy go Lwak kanyacel gi mic ma cil gi cil, aka obolo piny adieri, to medo timo maber i gima go otimo.

¹³Awinjo ŋataleŋ luwo, aka ŋataleŋ man owaco ri m'oyido luwo ni, “Gigipiny m'onenere i menyirok me omedere kiri keraŋo?”

¹⁴Go odwokan ni, “Ma ndelo 2,300 wor kodi odikin, aka Kabedo Maleŋ me lagik i kare.”

¹⁵Munyo an, Daniel atieko neno menyirok, atemo niaŋ kwoŋe; kenyo aneno cal pa dhano m'ocungo ruwaŋan.

¹⁶Kenyo awinjo dwondi dhano lwoŋo i dier coŋino ma Ulai ni, “Gabriel, miy jal me woniaŋi kwoŋ menyirok.”

¹⁷Munyo go obino cegin kam'oyido acung'iye, abwok aka apodho t'ariere piny gi nyiman. To go owaco ran ni, “Awi wod dhano, niaŋ ni menyirok me obedo ma hongo ma rumacen.”

¹⁸Paka go oluwo kodan, nindo okwalan gi waŋan piny. To go ogeyan, to miyan ay malo cungo.

¹⁹Go owaco ran ni, “Neni, alamiyin ŋeyo gima latimere i gike ma keme; kole i hongo m'oyikere gike latundo.”

²⁰“Wod rombo m'ineno nitie gi tunge ario, obedo kerin ario ma Medes kodi Pasia.

²¹Wod diel ma yer mere ojaŋ m'ineno obedo kere ma Gris, aka tungi madwoŋ manitie i dier waŋe obedo kere marapena.

²²Paka ri Tungi m'otur, to tunge aŋwen wok i liende obedo kerin aŋwen ma lawok i piny no, to kilabedo gi meni pere.”

²³“I gike ma dhum pajo, ka reco pajo oromo, kere manitie gi cal mager, ma jatwodo laay.

²⁴Go ladongo matek i meni, to ki gi meni pere, go lareyo woko ma kiwacere, aka lakiyindira i gima go timo. Go lareyo woko jomeni kodi ji pa jomaleŋ.

²⁵Kwoŋbedo go jabanirok, twodo lapoŋ i cinge kodi i cunye to won tiŋere malo. Go lareyo woko ji kweth ma k'ogwoko jo, aka lapiemo kiri gi Kere maloyo. T'ilaturo go ki gi cingi dhano.

²⁶Menyirok ma wor kodi odikin m'owaci rin me obedo adieri, riameno iripo kano nyaliŋliŋ kwoŋbedo latero ndelo kweth mafodi k'otundo i kare.”

²⁷An Daniel anyocere, aka abedo matwo ma ndelo mogo; kenyo aay malo timo tic pa kere. To oyido adhier gi menyirok, aka akiniaŋ kwoŋe.