Read dhopadhola Daniel 9 Bible Online

Daniel 9 - dhopadhola bible

Daniel 9

¹I oro marapena pa Dario wod Ahaswero, nyakwar Jomedes, m'oketh bedo kere dhumo Jokaldin,

²i oro marapena ma dhum pere, an Daniel aniaŋ i ndiko, cungo kwoŋ wac pa Rwoth m'obino ri Yeremia jatuci wac Were, nike Yerusalem lakisika ma oro piero ario.

³Kenyo awiro waŋan bongi Rwoth, rango radwok i kwayo kodi ywakirok gi riyo kec, ruko kutiya kodi bedo i buru.

⁴Akwayo Rwoth Were paran t'apusere k'awaco ni, “Awi Rwoth Were madwoŋ, ikelo lworo, aka ikuro cikirok kodi mar makiwire ri jono ma jomarin kodi jono ma jokuro or perin.”

⁵“Watieko timo reco, watimo gi komo, watimo gikidakana to wagwenyere, kiri gi wirok kwoŋ or perin kodi cik perin.

⁶Wakiwinjo ŋecin perin, jotuci wac Were, ma joluwo i nyingin gi kerin mawan, jodhum mawan, kwarere mawan, kodi ji ma piny.

⁷Awi Rwoth, itimo gim'otire, to wiwan okwot kamaler ndelo me, ji ma Yuda, ji ma jobedo i Yerusalem, kodi Joisiraili je, cegin kodi bor, i lowo je m'ikedh'iye jo, kwoŋbedo jotimo gibanirok rin.

⁸Awi Rwoth, wiwan okwot kamaler, kerin mawan, jodhum mawan, kwarere mawan, kwoŋbedo watimo gimarac kwoŋin.

⁹To in Rwoth, itimo wor aka icwako, makada nende watieko gwenyirok kwoŋin.

¹⁰Wakiwinjo dwondi Rwoth Were mawan gi luwo cik pere, ma go omiyo wan luwo kwoŋ ŋecin pere jotuci wac Were.

¹¹Joisiraili je joturo cik perin aka jowire gi thenge, jokwero winjo dwondin. Riameno lam kodi kwoŋirok m'ondiki i cik pa Musa ŋeca pa Were opodho kwoŋ wan, kwoŋbedo watimo gimarac kwoŋe.

¹²Itieko ridho wac perin, m'iluwo kwoŋ wan kodi jothum banja mawan ma jothumo riwan banja, gi kelo kwoŋ wan raco madwoŋ, m'oyido fodi k'otimere i pendi polo paka itimo kwoŋ Yerusalem.

¹³Paka ondiki i cik pa Musa, raco me je opodho kwoŋ wan, kucel wakirango waŋ Rwoth Were mawan, wirok kwoŋ reco mawan kodi luwo adieri pere.

¹⁴Riameno Rwoth oŋiyo raco me cuka okelo kwoŋ wan. Adieri Rwoth Were mawan otire i gima go otieko timo; to wakiwinjo dwondi go.”

¹⁵“Aka onyo pama, Awi Rwoth, Were mawan m'iwodho ji perin wok i lowo ma Misir gi cingin matek, t'itimo nyingin, paka i ndelo me watieko timo reco kodi kidakana;

¹⁶Awi Rwoth, cungo kwoŋ tim perin m'otire, akwayin, weyi nge perin kodi keme perin, wongoye woko kwoŋ tindi perin madwoŋ Yerusalem, got perin maleŋ. Kole reco mawan kodi reco pa kwarere mawan omiyo Yerusalem kodi ji perin jolokere wickwot i dier joger mawan.

¹⁷Onyo riameno, Awi Were mawan, winji kwayo pa ŋeca perin, kodi ywak pere, aka ro in won, Rwoth, weyi lero perin womenyi Ot pa Were m'orey woko.

¹⁸Awi Were paran, ciki ithin iwinji, yaw waŋin ineni, candirok mawan, kodi tindi perin madwoŋ, m'ilwoŋo gi nyingin. Kole wakikwayin kwoŋbedo watimo gim'otire, to kwoŋbedo wor perin dwoŋ.

¹⁹Awi Rwoth, winji, Awi Rwoth cwaki, Awi Rwoth winji aka tim, ikir'igali! Ro in won, Awi Were paran, kwoŋbedo ilwoŋo tindi perin madwoŋ kodi wan gi nyingin!”

²⁰Munyo oyido aluwo, kareno akwayo gi pusirok reco paran kodi reco pa ji paran Isiraili, gi ywak ruwaŋ Rwoth Were paran ri got maleŋ pa Were;

²¹munyo fodi aluwo i kwayo, jacwo Gabriel m'oyido atieko neno i menyirok, obino bongan, munyo ay mayil yil i sawa ma miyo cowirok m'othieno.

²²Go omiyan ŋeyo, oluwo kodan ka waco ni, “Awi Daniel abino miyin rieko kodi niaŋ.

²³I cakirok ma kwayo perin wac owok, aka abino nyuthin. Kole omarin swa; riameno niaŋ wac no kodi menyirok.”

²⁴“Oro piero ario dibirio, Were otieko luwo kwoŋ ji perin kodi tindi perin maleŋ, cowo raco kodi reco, kodi cwako reco, kelo tiro ma cil gi cil, kodi kelo i kare menyirok kodi jatuci wac Were, kodi wiro gi mo Kamaleŋ Loyo.

²⁵Riameno niaŋ nike wok i hongo m'owodhi or ma dwoko kodi geto kendo Yerusalem tundo i hongo pa ŋat'owir gi mo, Jadhum, latero dibirio ma oro abirio, ilageto kendo Yerusalem gi royin kodi kor ot matek aka lacungo dibirio ma oro piero aucel g'ario; to me labedo hongo ma teko.

²⁶Rumacen ma oro dipiero aucel g'ario no, ilakwanyo woko ŋat'owir gi mo aka go langoye gi gimoro, to ji pere jolabino reyo woko tindi madwoŋ kodi Ot pa Were. Gike mere labino paka mikula pi, kelo lweny, rerok ma kiwacere.

²⁷Go latimo cikirok matek gi ji kweth ma oro abirio, aka iy'adec ma oro me go lakelo gike ma cowirok kodi mic. I kabedo pajo ilaketho amien ma reyo woko, cuka tundo hongo ma Were lareyo woko ŋata reyo woko.”