Read dhopadhola Hoseya 10 Bible Online

Hoseya 10 - dhopadhola bible

Hoseya 10

¹Isiraili obedo yath vini ma camo kwo, ma nyak olemo. Paka ranyak pere omedo bedo i thotho, apaka bende ogeto migame kweth; paka piny omedo dongo, go omedo dongo sirin pere.

²Adundo pajo k'obedo mar'adieri; pama onyo go latero jo paka jobanja. Rwoth laturo piny migame pajo, to reyo woko sirin pajo maleŋ.

³Kole pama onyo jolawaco ni: “Wangoye gi kere, kole wan wakilwor Rwoth kodi kere, go d'onyalo timo riwan aŋo?”

⁴Jotieko luwo wac; jotieko timo cikirok gi kwoŋirok ma twodo; ameno thumo banja otieko twi paka gim'opidhi manitie gi kwir, i buce ma ndelo m'ofur.

⁵Joma bedo Samaria jokirin, ri cal pajo ma jolamo m'orwadhi piny i Bethaven, ji mere jolaywak rigo, aka jocway ri were pajo ma jolamo cal jolagoyo ndur i wiye, ro dwoŋ pere m'oweyo go.

⁶Bende ilatiŋo ginago woko kiri Asiria, paka mic ri kere madwoŋ, bongi kere ma lakikengila jakwor. Wickwot lamako Efrayim, aka wickwot lamako Isiraili kwoŋ jamic rieko pere won.

⁷Ilareyo woko kere ma Samaria paka tworo ma wi pi.

⁸Udi ajwoka ma Aven, reco pa Isiraili, ilareyo woko. Kudhin g'ocoke joladongo malo, wi migame pajo. Aka jolawaco ri gote ni, umi wan, kodi ri tendere ni, podhi kwoŋ wan.

⁹Wok i hongo pa Gibeya, witieko timo reco, Awi Isiraili; kenyo jomedere timo reco. Lweny k'opodhi kwoŋ jo i Gibeya?

¹⁰Alabino i mito paran alamiyo joma timo reco gir'acula, aka ji jolacokere kwoŋ jo, munyo imiyo jo gir'acula ro reco pajo madirio.

¹¹Efrayim oyido cal roya dhiaŋ m'ofonji m'omaro piedhirok, t'aketho majogi i ŋute; Yuda ripo fur, Yakobo lafuro ri kwo pere.

¹²Cwoy ri wiwegi tiro; wifon mar makiwire; cak win furo lowo mewin m'oyido wikoyo; me hongo ma dwaro Rwoth, cuka go obin to cwe both kwoŋ win paka koth.

¹³Witieko pidho kidakana, witieko keco kite marac, witieko camo olemo ma twodo, kwoŋbedo wigeno kwoŋ meni mewin kodi i thotho pa jolweny mewin.

¹⁴Riameno mor ma lweny lacakere i dier ji mewin, aka cel mewin je ilareyo woko. Paka Saliman oreyo woko Betharbel i ndelo ma lweny, munyo megi ji oŋiny jo mathindho thindho gi nyithindho pajo.

¹⁵Ameno bende apaka ŋati mogo latimo riwin, Awi Bethel, kwoŋbedo kidakana mewin madwoŋ. I ŋamba kere ma Isiraili, ilareyo woko go kicutho.