Read dhopadhola Hoseya 12 Bible Online

Hoseya 12 - dhopadhola bible

Hoseya 12

¹Efrayim kwayo koyo, aka riemo koyo ma yuwok ceŋ ndelo gipi; jonyayo wac kicar g'akaka; jotimo cikirok gi Asiria, aka itiŋo mo tero Misir.

²Rwoth segeya Yuda, aka go lamiyo Yakobo gir'acula cungo kwoŋ tim pere, to culo go paka tim pere nitie.

³Omako omin go gi tiende i ici, aka munyo otegino olwenyo gi Were.

⁴Go olwenyo gi malaika to loyo malaika gi meni, go oywaki to rango silwany pere; go oromo gine i Bethel, aka oluwo gine kenyo.

⁵Rwoth Were pa lwak jolweny, Rwoth obedo nyingi go.

⁶To paka ri in, gik bongi Were, ridhi mar kodi tiro matek, aka medere ameda kuro Were perin.

⁷Jamitan, ma oro rapim ma twodo, go omaro diyo ji.

⁸Efrayim otieko waco ni, “Nga aŋaŋ.” Atieko limo lim paran won; i magowa paran je, ongoye banja m'otiek nwaŋo kwoŋan, ma dinyo bedo reco.

⁹An abedo Rwoth Were mewin, wok i piny ma Misir; alamiyo wibedi i wemin kendo, paka i hongo ma kalima m'oyik.

¹⁰Aluwo gi jotuci wac Were; obedo an m'onyayo menyirok, aka luwo kwoŋ jotuci wac Were alakelo rerok.

¹¹Ka nitie kidakana i Giliad adieri jolalokere gim'ongoye kony. Ka jomiyo bende cowirok ma thwondhe i Gilgal, migame pajo lacale gi kidhur telin, i fereji ma sa.

¹²Yakobo oringo iy'adec ma Aram, Isiraili otiyo ro dhako, aka ro dhako, go okuro mwendi.

¹³Gi jatuci wac Were, Rwoth owodho Isiraili wok Misir, aka gi jatuci wac Were, okuro go.

¹⁴Efrayim okwinyo nge pa Rwoth makec, ameno Rwoth pere laweyo banja pere kwoŋe, to culo go ri yet pere.