Read dhopadhola Hoseya 13 Bible Online

Hoseya 13 - dhopadhola bible

Hoseya 13

¹Munyo Efrayim oluwo, kirin obedo; otiŋ go malo i Isiraili; to, obedo gi banja ro lamo Bal aka otho.

²Onyo pama jomedo timo reco, aka jotieko timo rijo wegi cal ma nyweny m'oleny, cal ma feza cungo kwoŋ niaŋ pajo, joje tic pa jondijo. Jowaco rijo ama: Ŋata miyo cowirok ma dhano cwiyo lembi cal!

³Riameno jolacale tor m'odikin, kosa paka thoyo maleny woko con, paka cuŋ ma duny wok i kapiedhirok, kodi paka yiro ma wok gi dirisa.

⁴Kucel atieko bedo Rwoth Were mewin, wok i piny ma Misir; ongoye Were ma wiŋeyo kwanyowoko an, aka ongoye jaboth man kwanyowoko an.

⁵An aŋeyo win i thim, i piny m'othwo;

⁶Munyo apidho jo gi nger lum ma jocamo, joyeŋ adieri, jobedo gi noro i cuny jo, riameno wiy jo owil kodan.

⁷Ameno alokere rijo paka simbwor, paka kwac alakuro jo i thengi royo.

⁸Alapodho kwoŋ jo paka arara m'okwal nyithindhe, aka alayeco m'oyawere giumo adundo pajo; kenyo alacuto jo paka simbwor, paka ogwaŋ madudi d'oyec jo mathindho thindho.

⁹Alareyin woko, awi Isiraili; kole an a jakony perin.

¹⁰Onyo pama nikune kere perin, ŋey wonyali thielin? Nikune jodhum perin ma tindin madongo perin je, ma wikwayo jo ni, “Miyan kere kodi jotel.”

¹¹Amiyin kere i nge paran, akwanyo go woko i keme paran.

¹²Reco pa Efrayim otwey, reco pere okan.

¹³Litho pa ŋata nywol labino rigo, to go obedo wodan mamiŋ; rupiri i hongo ma ripo go kinyuthere, i sawa ma colo nyathi.

¹⁴Anobothi jo wok i meni ma piny pa jom'otho? Anobothi jo kwoŋ tho? Awi tho, nikune meni perin, awi piny pa jom'otho, nikune loyo perin? Wor opanere woko ruwaŋan.

¹⁵Kada Isiraili obedi gi nyithindho i dier wutmin, koyo ma yuwok ceŋ labino, koyo ma wok bongi Rwoth i thim; aka waŋ pi pere lacwiyo woko, waŋ pi pere ma mol lathwo. Ilayweyo woko kakan pesa m'ongoye gim'odoŋ, ma kisi gimoro je ma dicwe.

¹⁶Samaria labielo banja pere, kwoŋbedo go otieko gwenyere kwoŋ Were pere; abor laneko jo, nyithindho pajo ilaŋidho piny mathindho thindho, aka ilabaro iy mon pajo ma joyac.