Read dhopadhola Hoseya 14 Bible Online

Hoseya 14 - dhopadhola bible

Hoseya 14

¹Gik win, awi Isiraili, bongi Rwoth mewin, kole witieko kimudamuda ro reco mewin.

²Kadhi win gi kwac, aka wigik bongi Rwoth; wiwaci rigo ni, “Kwany woko reco je; jol gimaber mere, aka walapakin gi dhok wan.”

³Asiria k'onyal botho wan; wak'ogwey kayinin; wak'owaci kendo ni, “Were Mawan.” Ri tic ma cingi wan ni, “I in nyathi kic nwaŋo ŋono.”

⁴Alacango kwo pajo m'ongoye adieri; alamiyo jo mar ma nono, kole nge paran owire woko kwoŋ jo.

⁵Alabedo paka thoyo ri Isiraili; go lathiwo paka mawuwa, go layaro tiende paka lule ma Lebanon.

⁶Withe lagulo; ŋono pere lacale yath oliv, aka ŋwece kur mere lacale ma Lebanon.

⁷Jolagik to jobedo i tiendi tipo paran, jolakilikalika paka ndelo; jolakilikalika paka yath vini, ŋwece kur pajo lacale vini ma Lebanon.

⁸Efrayim lapenjere ni, aŋo man kendo m'alatimo gi cal? An aŋat'adwokin t'akurin. Acalo yath ma boke mere kioy; silwany mewin wok bongan.

⁹Weyi ŋatariek, woniaŋi gigipiny me; weyi jameny gigipiny, woŋey jo. Kole yo pa Rwoth jotire, aka jom'otire jowotho i jo, to jogimareco jotangatanga i jo.