Read dhopadhola Hoseya 4 Bible Online

Hoseya 4 - dhopadhola bible

Hoseya 4

¹Winji win wac pa Rwoth, win Joisiraili; kole Rwoth nitie gi misegey kwoŋ ji ma jobedo i piny. Ongoye genirok kosa kuro cikirok, aka ongoye ŋeyo Were i piny mewin.

²Nitie kwoŋirok, twodo, kodi nek, aka kwo gi cot cakere; oyo remo medere ameda.

³Riameno piny ywak, aka ji ma jobed'iye mbaka loyo jo; kanyacel g'ogwaŋe mager, kodi winyin ma koyo, kiri rec ma nam josika woko.

⁴Kucel weyi wongoye kiosa, aka weyi wongoye jamisegey, kole akigeŋisa kwoŋ win, win jocway ri Were i wi migam.

⁵Wilakitangatanga odieceŋ; jatuci wac Were bende lakimudamuda gi win wor, aka alareyo woko yok win Isiraili.

⁶Ireyo woko ji paran ro ngoye gi ŋeyo, kwoŋbedo wikwero ŋeyo, akwero win bedo ran jacway ri Were i wi migam. Aka paka wiyin owil gi cik pa Were perin, wiyan bende lawil gi nyithindho perin.

⁷Paka jomedere i welo, apaka bende jotimo reco i thotho kwoŋan. Alawiro dwoŋ pajo i wickwot.

⁸Joŋaŋ ka ji paran jotimo reco; jonitie g'awanya ri ji paran medo timo reco.

⁹Paka labedo ri ji, apaka ri jacway ri Were i wi migam; alamiyo jo gir'acula ro royo pajo, t'aculo jo ro tim pajo.

¹⁰Jolacemo, to jok'oyeŋ; jolatimo kidakana, to jok'onyay; kwoŋbedo jojwango Rwoth to joyodere gi werin man.

¹¹Vini kodi vini manyen kwanyo woko niaŋ.

¹²Ji paran jorango rieko wok bongi yath masisiri, aka luth waco rijo gima jomito ŋeyo. Kole cuny ma kidakana otieko rwenyo jo, aka jotieko timo gikidakana, gi jwango Were pajo.

¹³Jomiyo cowirok i kisul ma gote, to jomiyo mic i wi tendere, i tiendi olwa, kodi i tiendi yen ma yare, kwoŋbedo tipo pajo ber. Riameno nyiki jo jotimo gikidakana, aka mondiwot win jotimo cot.

¹⁴Ak'omiy nyiki win gir'acula ka jotimo gikidakana, kosa mondiwot win bende ka jotimo cot; kole cwo bende jokocere gi jokidakana aka jonindere gi malayin ma jolamo werin; meno apaka ji ma bu niaŋ josika.

¹⁵Kada witimo gikidakana, win Joisiraili, wikiri wimiy Yuda wolokere jabanja. Wikiri widonji i Gilgal, kosa wiidhi i Bethaven, aka wikiri wikwoŋere ka wiwaco ni, “Paka Rwoth kwo”.

¹⁶Paka roya dhiaŋ ma wiye tek, Isiraili wiye tek. Rwoth nyalo pidho jo pama paka rombo i lum malac?

¹⁷Efrayim oriwere gi cal weyi go kende.

¹⁸Ka jocowo medho, to jocako nindirok, jomaro kinyoro loyo dwoŋ pajo.

¹⁹Ilatiŋo jo woko paŋini gi koyo t'ibolo jo woko, to wiy jo kwot gi cowirok pajo manyakafir.